ជប៉ុន បង្ហាញ​ពី​ការទទួលខុសត្រូវ ដោយ​បង្កើតជា​មូលនិធិ ជួយ​គ្រួសារ​បុរស​រត់​តាក់ស៊ី ដែល​ត្រូវ​ជប៉ុន ២ នាក់​សម្លាប់​

18494

​ភ្នំពេញ​៖ មូលនិធិ​មួយ ត្រូវបាន​បង្កើតឡើង ដើម្បី​បង្ហាញ​ពី​សន្ដាន​ចិត្ត​ដ៏​ស្មោះស របស់​រដ្ឋាភិបាល​ជប៉ុន និង​ប្រជាជន​ជប៉ុន ក៏ដូចជាការ​ទទួលខុសត្រូវ ចំពោះ​គ្រួសារ​ជនរងគ្រោះ ដែល​ត្រូវបាន​ជនជាតិ​ជប៉ុន​២​នាក់ បានរៀប​គម្រោង​ទុកជាមុន ដើម្បី​ប្លន់​សម្លាប់​យក​រថយន្ត​ផងដែរ​។

​កាលពី​ថ្ងៃទី​១៧ ខែមីនា ឆ្នាំ​២០១៩ ជនជាតិ​ជប៉ុន​ពីរ​នាក់ ត្រូវបាន​ចាប់ខ្លួន ដោយ​កងកម្លាំង​សមត្ថកិច្ច​ខេត្តសៀមរាប ក្នុងករណី​ប្លន់​សម្លាប់​បុរស​ជា​អ្នករត់​តាក់ស៊ី​ម្នាក់ ដើម្បី​ប្លន់​យក​រថយន្ត នៅលើ​កំណាត់​ផ្លូវជាតិ​លេខ ៦ ត្រង់ចំណុច​ជញ្ជីង​ថ្លឹង​រថយន្ត​ពួក ក្នុង​ទឹកដី​ភូមិ​ពួក​ថ្មី ឃុំ​ពួក ស្រុក​ពួក ខេត្តសៀមរាប​។ ជនរងគ្រោះ​ដែល​បាន​ស្លាប់​នោះ មានឈ្មោះ ហ៊ឹម ចាន់ រស់នៅ​ភូមិ​ជាន់​ត្រាច ឃុំ​ឈូក​ដាច់ ស្រុក​បារាយណ៍ ខេត្តកំពង់ធំ មាន​ប្រពន្ធ និង​កូន ៤​នាក់​ក្នុងបន្ទុក​។​

ប្រអប់​បរិច្ចាគ របស់មូលនិធិ

ប្រជាជន​ជប៉ុន ដែល​រស់នៅក្នុង​ប្រទេស​កម្ពុជា ក៏ដូចជា​ប្រជាជន​ជប៉ុន ដែល​រស់នៅក្នុង​ប្រទេស​ជប៉ុន បាន​សម្ដែង​នូវ​សេចក្ដីសោកស្ដាយ​, ចូលរួម​រំលែក​ទុក្ខ និង​ព្រួយបារម្ភ​ចំពោះ​ផលប៉ះពាល់ ដល់​ជំនឿ​ចិត្ត ក៏ដូចជា​មិត្តភាព​ដ៏​រឹងមាំ​អស្ចារ្យ របស់​ប្រទេស​ជប៉ុន និង​ប្រទេស​កម្ពុជា អស់​រយៈពេល​ជាង ៦៥​ឆ្នាំ​កន្លងមកនេះ ក្រោយពី​ករណី​ឃាតកម្ម ដ៏​គួរ​ឲ្យ​ភ្ញាក់ផ្អើល និង​ជា​លើកទីមួយ​នៅ​ប្រទេស​កម្ពុជា ដែលមាន​ជនល្មើស ជា​ជនជាតិ​ជប៉ុន កន្លងមកនេះ​។​

ទោះជា​និយាយ ពាក្យ​ថា​សុំទោស ចំពោះ​គ្រួសារ​ជនរងគ្រោះ មួយ​ពាន់​ដង មួយ​ម៉ឺន​ដង មួយ​លាន​ដង ក៏​មិន​អាចធ្វើ​ឲ្យ​អ្វីៗ​គ្រប់យ៉ាង វិល​ត្រលប់មក​ដូចដើម​វិញ​បាន​ឡើង ហេតុ​ដូចនេះហើយ មានតែ​ការចូលរួមចំណែក​ធ្វើការ​ប៉ះប៉ូវ ចំពោះ​ក្រុមគ្រួសារ​ជនរងគ្រោះ រួមមាន​ប្រពន្ធ និង​កូន ៤​នាក់ ខាង​ផ្នែក​ជីវភាព​រស់នៅ​ប្រចាំថ្ងៃ និង​ការសិក្សារ​សម្រាប់​កូនៗ​របស់គាត់ ដើម្បី​កសាង​អនាគត​ដ៏​ភ្លឺស្វាង​របស់​ពួកគេ នោះទេ​ទើប​ជា​ជម្រើស​ដ៏​ល្អ​បំផុត​មួយ​។​

ប្រអប់​បរិច្ចាគ របស់មូលនិធិ នៅផ្សារទំនើបអ៊ីអន

​មូលនិធិ​នេះ បានចាប់ផ្ដើម​ប្រមូល​ថវិកា​ចាប់ពី​ថ្ងៃទី​១៩ រហូតដល់​ថ្ងៃទី​៣១ ខែមីនា ឆ្នាំ​២០១៩​។ បើ​គិត​ត្រឹម​ព្រឹក​ថ្ងៃទី​២២ ខែមីនា​នេះ ក្រុម​ស្ម័គ្រចិត្ត ដែល​ត្រូវ​បានអនុម័ត​ដោយ​សមាគម​ជប៉ុន​នៅ​កម្ពុជា ដែលមាន​ទាំង​ប្រជាជន​ជប៉ុន​រស់នៅក្នុង​ប្រទេស​កម្ពុជា ព្រមទាំង​ប្រជាជន​ជប៉ុន​រស់នៅក្នុង​ប្រទេស​ជប៉ុន ដែលមាន​ចំនួន​លើសពី ២៥០​នាក់ បាន​បរិច្ចាគ​ជា​ថវិកា​ផ្ទាល់ខ្លួន ដើម្បី​ជួយ​ដល់​មូលនិធិ​នេះ​។ គេ​រំពឹងថា នឹងមាន​ប្រជាជន​ជប៉ុន​ជាច្រើនរូប​ទៀត ដែល​នឹងចូលរួម​សម្រាប់​មូលនិធិ​ដូចដែល​បាន​រៀបរាប់​ខាងលើនេះ​។​

លើសពីនេះ​ទៀត សប្បុរសជន​ទាំងអស់ ក៏​អាច​ចូលរួម​បានដែរ ដោយ​អាច​ស្វែងរក ប្រអប់​បរិច្ចាគ ដែល​ត្រូវបាន​រៀបចំឡើង នៅក្នុង​ផ្សារ​ទំនើប​អ៊ី​អន​ទី ១ និង ទី ២​។​

​ម្យ៉ាងវិញទៀត កាលពី​ព្រឹក​ថៃ្ង​ទី​២០ ខែមីនា កន្លងទៅនេះ ក្រុមកីឡា​បាល់ទាត់ អង្គ​រថា​យ​ហ្គឺ​រ សៀមរាប ដែលមាន​មូលដ្ឋាន​នៅ​ខេត្តសៀមរាប ដែល​ដឹកនាំ​ដោយ​លោក កា​តូ អា​គិ​ហ៊ិ​រ៉ុ (KATO AKIHIRO) បាន​ជួយឧបត្ថម្ភ​ថវិកា​សរុប​ជាង ៤,០០០​ដុល្លារ សហរដ្ឋ​អា​មេ​រិច ដែល​នៅ​ក្នុងនោះ​មាន​ថវិកា​ផ្ទាល់ខ្លួន​របស់លោក កា​តូ ចំនួន ១,០០០​ដុល្លារ​សហរដ្ឋ​អា​មេ​រិច ត្រូវបាន​ផ្ដល់ជូន​ក្រុមគ្រួសារ​ជនរងគ្រោះ សម្រាប់​ការចំណាយ​បន្ទាន់ ដែលមាន​ដូចជា​ការយ​ក​ទៅ​ចាត់ចែង​រៀបចំ​ពិធី​បុណ្យសព​ទៅតាម​ប្រពៃណី​ខ្មែរ​។​

ប្រអប់​បរិច្ចាគ របស់មូលនិធិ នៅផ្សារទំនើបអ៊ីអន

​ស្ថានទូត​ជប៉ុន​ប្រចាំ​នៅ​ប្រទេស​កម្ពុជា និង​ប្រជាជន​ជប៉ុន​ទាំងអស់ សូម​ចូលរួម​រំលែក​ទុក្ខ​ដ៏​ក្រៀមក្រម​នេះ ចំពោះ​ក្រុមគ្រួសារ​ជនរងគ្រោះ និង​សូម​បួងសួង​សូមអោយ​វិញ្ញាណក្ខន្ធ​ជនរងគ្រោះ​ឈ្មោះ ហ៊ឹម ចាន់ បាន​ទៅកាន់​សុគតិភព កុំបី​ឃ្លៀងឃ្លាត​ឡើយ​។​

​គួរបញ្ជាក់​ផងដែរ​ថា ប្រជាជន​ជប៉ុន​ដែល​កំពុង​រស់នៅ​ប្រទេស​កម្ពុជា តែងតែ​ចូលរួម​ជាស​កម្ម ដើម្បី​គាំទ្រ​នូវ​សកម្មភាព​សង្គម​នានា ដែលមាន​ដូចជា​សកម្ម​ភាព​ផ្លាស់ប្ដូរ និង​ណែនាំ​អំពី​វប្ប​ធ៌​ម​ប្រទេស​ជប៉ុន និង​កម្ពុជា​, សកម្មភាព​កីឡា​, អប់រំ​, សកម្មភាព​សម្អាត​ទីក្រុង ដោយ​ការប្រមូល​សំរាម​ជាដើម​។

​ទោះបីជា​យ៉ាងណាក៏ដោយ ការចូលរួមចំណែក​ស្វែងរក​សន្តិភាព​, សកម្មភាព​សប្បុរសធម៌ និង​ការជួយ​អភិវឌ្ឍន៍​នៅ​ប្រទេស​កម្ពុជា យ៉ាងច្រើន​សន្ធឹក​សន្ធប់​កន្លងមក ដោយ​រដ្ឋាភិបាល​ជប៉ុន ក៏ដូចជា​ប្រជាជន​ជប៉ុន​ទាំងអស់ នឹង​នៅតែ​ស្ថិតនៅក្នុង​ការចងចាំ ក្នុង​ក្រអៅបេះដូង​របស់​ប្រជាជន​កម្ពុជា​ជានិច្ច​និរន្តរ៍ មិនមាន​អ្វី​អាចមក​កាត់ផ្ដាច់​បានឡើយ​៕