ផ្លូវ​ល្បឿន​លឿន​ពី​ភ្នំពេញ ខេត្ត​ព្រះសីហនុ តម្លៃ ២​ពាន់​លាន​ដុល្លារ​អាមេរិក ចាប់ផ្តើម​សាងសង់ និងអាចប្រើប្រាស់បាន នៅឆ្នាំ ២០២៣​

49585

​ភ្នំពេញ​៖ ផ្លូវ​ល្បឿន​លឿន​ដំបូង​គេ ភ្នំពេញ​-​ព្រះសីហនុ នៅ​ប្រទេស​កម្ពុជា បាន​បើក​ការដ្ឋាន​សាងសង់​ហើយ នៅ​ថ្ងៃទី​២២ ខែមីនា ឆ្នាំ​២០១៩​នេះ ដោយ​ចំណាយ​ថវិកា​ប្រមាណ ២​ពាន់​លាន​ដុល្លារ​អាមេរិក និង​ប្រើពេល​សាងសង់​ចំនួន​៤៨​ខែ ដោយ​គិត​ចាប់ពី​ខែមីនា ឆ្នាំ​២០១៩ ដល់​ខែមីនា ឆ្នាំ​២០២៣​។​

ពិធីបើកការដ្ឋាន​សាងសង់​ផ្លូវ​ល្បឿន​លឿន ភ្នំពេញ ខេត្ត​ព្រះសីហនុ ធ្វើឡើង​ក្រោម​អធិបតីភាព​សម្តេច​តេ​ជោ ហ៊ុន សែន នាយករដ្ឋមន្ត្រី​នៃ​កម្ពុជា​, លោក ខុង សៀន​យ៉ូ​វ (KONG XUANYOU) អនុរដ្ឋមន្ត្រី​ក្រសួងការបរទេស​ចិន និង​លោក​ទេសរដ្ឋមន្ត្រី ស៊ុន ចាន់ថុល ក្នុង​លក្ខណៈ​បែប​វិនិយោគ​សម្បទាន ដោយ​ឱ្យ​ក្រុមហ៊ុន​វិនិយោគ មាន​សិទ្ធ​ប្រមូល​កម្រៃ​សេវា ពី​អ្នកប្រើប្រាស់​ផ្លូវ​ក្នុង​អត្រា​កំណត់​មួយ ទៅតាម​ទំហំ និង​ប្រភេទ​នៃ​យានយន្ត​នីមួយៗ ដូច​មានចែង​នៅក្នុង​កិច្ចព្រមព្រៀង​សម្បទាន​។​

លោក​ទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួង​សាធារណការ និង​ដឹកជញ្ជូន បាន​ឲ្យ​ដឹងផង​ដែរ​ថា គម្រោង​សាងសង់​ផ្លូវ​ល្បឿន​លឿន​ភ្នំពេញ​-​ក្រុងព្រះសីហនុ នឹង​ក្លាយជា​ខ្សែ​ផ្លូវ​នៃ​ប៉ូល​សេដ្ឋកិច្ច (Cambodia Economic Corridor) និង​ទេសចរណ៍​ដ៏​មាន​សក្តានុពល របស់​ព្រះរាជាណាចក្រ​កម្ពុជា ត​ភ្ជាប់​ពី​រាជធានី​ភ្នំពេញ ទៅកាន់​ក្រុងព្រះសីហនុ និង​ដើរតួនាទី​យ៉ាងសំខាន់​ក្នុងការ​លើកកម្ពស់ ប្រសិទ្ធភាព​នៃ​ការធ្វើដំណើរ និង​ប្រព័ន្ធ​ភស្តុភារ​កម្ម​របស់​កម្ពុ​ជា (Cambodia Logistic) សំដៅ​សម្រួល​ដល់​ការដឹកជញ្ជូន​ផលិតផល ដំណាំ​កសិផល និង​ផលិតផល​ក​សិ​-​ឧស្សាហកម្ម របស់​ក្រុមហ៊ុន​វិនិយោគ និង​ប្រជាពលរដ្ឋ​មកពី​គ្រប់​តំបន់​នៅ​ទូទាំងប្រទេស ទៅកាន់​ទីផ្សារ​ក្នុងស្រុក និង​ជាពិសេស​ទៅកាន់​ទីផ្សារ​អន្តរជាតិ តាមរយៈ​កំពង់ផែ​សមុទ្រ​អន្តរជាតិ​ទឹក​ជ្រៅ (Cambodia deep seawater port) របស់​យើង ប្រកបដោយ​ភាពងាយស្រួល ចំណាយ​តិច និង​ឆាប់រហ័ស សំដៅ​បង្កើន​សមត្ថភាព​ប្រកួតប្រជែង​ធុរកិច្ច និង​ទាញយក​អត្ថប្រយោជន៍​ឱ្យបាន​ច្រើន​លើសលប់​ពី​សមាហរណកម្ម​សេដ្ឋកិច្ច​អាស៊ាន តំបន់ និង​ពិភពលោក​។​

​ផ្លូវ​ល្បឿន​លឿន​ភ្នំពេញ​-​ក្រុងព្រះសីហនុ មាន​ប្រវែង​សរុប​ជាង ១៩០​គីឡូម៉ែត្រ ត​ភ្ជាប់​ពី​ភូមិ​១ សង្កាត់​សំរោងក្រោម ខណ្ឌ​ពោធិ៍​សែន​ជ័យ រាជធានី​ភ្នំពេញ ដល់​ភូមិ​១ សង្កាត់​លេខ​៣ ក្រុងព្រះសីហនុ​។ ផ្លូវ​នេះ​ឆ្លងកាត់​រាជធានី​ភ្នំពេញ​ប្រវែង ៨.៣០​គីឡូម៉ែត្រ ខេត្តកណ្តាល ប្រវែង ៩.១០​គីឡូម៉ែត្រ ខេត្តកំពង់ស្ពឺ​ប្រវែង ៨០.៨០​គីឡូម៉ែត្រ ខេត្តកោះកុង​ប្រវែង ១.៩២​គីឡូម៉ែត្រ និង​ខេត្ត​ព្រះសីហនុ​ប្រវែង ៨៩.៨៩​គីឡូម៉ែត្រ​។​

​លក្ខណៈ​ទូទៅនៃ​ផ្លូវ​ល្បឿន​លឿន​ភ្នំពេញ​-​ក្រុងព្រះសីហនុ គឺមាន​ទទឹង​តួ​ផ្លូវ​សរុប ២៤.៥​ម៉ែត្រ ដោយ​ក្រាល​បេតុង​កៅស៊ូ (AC) កម្រាស់ ១០​សង់ទីម៉ែត្រ ទទឹង​២៣​ម៉ែត្រ ដែល​ក្នុងនោះ​រួមមាន​៖

  • ​គន្លង​ផ្លូវ​ធ្វើ​ចរាចរណ៍​សម្រាប់​រថ​យន្ដ ទទឹង​១៥​ម៉ែត្រ ចែកជា ៤​គន្លង (២​គន្លង ទៅ ២​គន្លង​មក​) ដែល​គន្លង​នីមួយៗ​មាន​ទទឹង ៣.៧៥​ម៉ែត្រ ដែល​អនុញ្ញាតឱ្យ​យានយន្ត​គ្រប់​ប្រភេទ​អាច​បើកបរ​ក្នុង​ល្បឿន​រហូតដល់ ១០០​គ​.​ម ក្នុង​មួយ​ម៉ោង និង​កន្លែង​ខ្លះ​អាច​ដល់​១២០​គ​.​ម ក្នុង​មួយ​ម៉ោង​។​
  • ឃឿន​សួន​ចែក​ទិស​ចរាចរណ៍​នៅ​ចំ​កណ្តាល​ទ្រូងផ្លូវ ទទឹង ៣​ម៉ែត្រ​។
  • ​ចិញ្ចើមផ្លូវ​ក្រាល​បេតុង​កៅស៊ូ ទទឹង ២,៥០​ម៉ែត្រ សងខាង និង​ចិញ្ចើមផ្លូវ​ក្រាល​ក្រួស​ក្រហម ទទឹង ០,៧៥​ម៉ែត្រ​សងខាង​។​
  • ​សាងសង់​លូ​គ្រប់​ប្រភេទ​ចំនួន ២៦៣​កន្លែង ស្ពាន​តូច​ចំនួន ៥​កន្លែង ប្រវែង​សរុប ១០៥​ម៉ែត្រ ស្ពាន​ធំ និង​ស្ពាន​មធ្យម​ចំនួន ៨០​កន្លែង ប្រវែង​សរុប ៦០១៥​ម៉ែត្រ​។​
  • ​សាងសង់​ផ្លូវ​ប្តូរ​ទិស​ចរាចរណ៍​ចំនួន ៧​កន្លែង ផ្លូវ​ប្រសព្វ​ចំនួន ២៨​កន្លែង ផ្លូវ​ក្រោម​ផ្លូវ​ល្បឿន​លឿន​ចំនួន ២៣៧​កន្លែង និង​ស្ពាន​រំលង​ផ្លូវ​ចំនួន ២០​កន្លែង​។​
  • ​សាងសង់​តំបន់​សេវាកម្ម ឬ​ចំណត​ឈប់សម្រាក​ចំនួន ៣​កន្លែង ចំណតរថយន្ត​ចំនួន​១​កន្លែង មណ្ឌល​ប្រតិបត្តិការ និង​ថែទាំ​ផ្លូវ​ចំនួន​៤​កន្លែង និង​បញ្ជរ​បង់ប្រាក់​ចំនួន​៩​កន្លែង​។​
  • ​បំពាក់​គ្រឿង​បរិក្ខារ​ផ្លូវថ្នល់ រួមមាន ផ្លាកសញ្ញា​ចរាចរណ៍ ភ្លើង​សញ្ញា​ចរាចរណ៍ និង​គំនូស​សញ្ញា​ចរាចរណ៍​៕

​រាជរដ្ឋាភិបាល​កម្ពុជា បានស្នើ​សុំ និង​ទទួល​បានការ​ឯក​ភា​ពី​ក្រុមហ៊ុន ដោយ​មិន​យក​ថ្លៃ​យានយន្ត​គ្រប់​ប្រភេទ ដែល​បើកបរ​លើផ្លូវ​ល្បឿន​លឿន​នេះ ក្នុង​រយៈពេល​១ ខែ​ដំបូង និង​បញ្ចុះតម្លៃ​២០% សម្រាប់​រយៈពេល​១​ឆ្នាំ​បន្ទាប់ពីនោះ និង​ធ្វើការ​កែសម្រួល​កម្រៃ​សេវា​ឆ្លងកាត់​ក្នុង​រយៈពេល ៥​ឆ្នាំ​ម្តង នៃ​ប្រតិ​ប​តិ្ត​ការ​អាជីវកម្ម​របស់ខ្លួន​៕