លោក ផែង វណ្ណៈ ត្រូវបាន​ប៉េអឹម​ចាប់ខ្លួន បញ្ជូនទៅ​សាលាដំបូង​ហើយ​

50869

ភ្នំពេញ​៖ តារា​ហ្វេ​ស​ប៊ុ​ក មិន​សំចៃមាត់ លោក ផែង វណ្ណៈ ត្រូវបាន​កម្លាំង​កងរាជអាវុធហត្ថ​លើ​ផ្ទៃ​ប្រទេស ចាប់ខ្លួន​បញ្ជូនទៅ​សាលា​សាលាដំបូង​រាជធានី​ភ្នំពេញ​ហើយ នៅ​ព្រឹក​ថ្ងៃទី​០២ មេសា ឆ្នាំ​២០១៩​នេះ​។​

​ការចាប់ខ្លួន បញ្ជូនទៅ​សាលាដំបូង​នេះ ធ្វើឡើង​ដោយយោង​ទៅតាម​ដីកា​បញ្ជា ពី​សំណាក់​ព្រះរាជអាជ្ញា និង​យោងតាម​ពាក្យបណ្តឹង របស់​មេធាវី​ការពារ​ក្តី​របស់​សម្តេច​តេ​ជោ​នាយករដ្ឋមន្ត្រី ហ៊ុន សែន ចោទប្រកាន់​ពីបទ​ប្រើប្រាស់​បណ្តាញ​សង្គម​របស់ខ្លួន ផ្សព្វផ្សាយ​ជា​សាធារណៈ ក្នុង​បំណង​ឱ្យ​សាធារណៈជន​យល់ច្រឡំ​ថា សម្តេច​តេ​ជោ ហ៊ុន សែន ពាក់ព័ន្ធ​នឹង​ឃាតកម្ម​របស់លោក​បណ្ឌិត កែម ឡី ។​

លោក គី តិច

​លោក គី តិច មេធាវី​របស់​សម្តេច​តេ​ជោ ហ៊ុន សែន បានបញ្ជាក់​នៅក្នុង​ពាក្យបណ្តឹង​ថា ឈ្មោះ ផែង វណ្ណៈ បានធ្វើ​សំណេរ​ផ្សព្វផ្សាយ​តាម​ទំព័រ​ហ្វេ​ស​ប៊ុ​ក របស់ខ្លួន​ថា “​គំនិត​គួរ​ពិចារណា !!! ១- លោក ផែង វណ្ណៈ ចាងហ្វាង​ការផ្សាយ និង​ជា​និពន្ធ​នាយក គេហទំព័រ Pheng Vannak News តំណាងអោយ​ម្ចាស់​រថយន្ត​លេខ 2AF-7777 យក​ថវិកា​ចំនួន ៥០០០ ដុល្លារ ទៅ​ចូល​បុណ្យ​ដល់​ក្រុមគ្រួសារ​សព​និស្សិត ឌុំ រី​ដា ត្រូវ​លោក​ទេសរដ្ឋមន្ត្រី ពេជ្រ ស្រស់ ប្តឹងទៅ​អង្គភាព​ប្រឆាំង​អំពើពុករលួយ​។ បញ្ជាក់​៖ ម្ចាស់​រថយន្ត 2AF-7777 គឺ ឈ្មោះ យិន វ៉ិ​ច លោក យិន វ៉ិ​ច មិនមែនជា​ជនបង្ករ​ទេ កូន​ទេ​ដែល​បង្ករ​ត្រូវ​ចែកគ្នា​អោយដាច់​រវាង​ម្ចាស់​រថយន្ត និង​ជនបង្ករ​។ ២- លោក លឹម ជា​យុ​ត្ថា អគ្គនាយក អង្គភាព Fresh News តំណាងអោយ​ថ្នាក់ដឹកនាំ នាំយក​ថវិកា ចំនួន ៥០០០០ ដុល្លារ ទៅ​ចូល​បុណ្យ​ដល់​ក្រុមគ្រួសារ​លោក​បណ្ឌិត កែម ឡី ដើម្បី​ធ្វើ​ចេតិយ ម្តេច​លោក​ទេសរដ្ឋមន្ត្រី ពេជ្រ ស្រស់ មិន​ប្តឹងទៅ​អង្គភាព​ប្រឆាំង​អំពើពុករលួយ​? ខុសគ្នា​ដូចម្តេចខ្លះ បើ​កាន់​លុយ​ជា​តំណាង​ទៅ​ចូល​បុណ្យ​ដូចគ្នា​?”​។​

លោក ផែង វណ្ណៈ

​លោក គី តិច បាន​បញ្ជាក់ថា ឈ្មោះ ផែង វណ្ណៈ ធ្វើការ​ប្រៀបធៀប ក្នុង​បំណង​ចោទប្រកាន់ និង​ទម្លាក់កំហុស​ទៅលើ​សម្តេច​តេ​ជោ ហ៊ុន សែន ថា គឺជា​ឃាតក​សម្លាប់​លោក​បណ្ឌិត កែម ឡី​។

​លោក គី តិច បានធ្វើ​សំណូមពរ​ទៅ​លោក​ព្រះរាជអាជ្ញា ធ្វើការ​ពិនិត្យ​សម្រេច​ឃាត់ខ្លួន ឬ​ចាប់ខ្លួន និង​ឃុំខ្លួន ឈ្មោះ ផែង វណ្ណៈ ជាបន្ទាន់ ដើម្បី​ទប់ស្កាត់​ការប្រព្រឹត្ត​អំពើ​ល្មើស​ជា​បន្តបន្ទាប់ ដែល​អាច​នាំ​ឲ្យ​មាន​ភាពវឹកវរ ធ្ងន់ធ្ងរ​ដល់​សន្តិសុខ​សង្គម​៕