សម្ដេច ស ខេង ប្រាប់​ឲ្យ “​អ្នក​លូកដៃ​” ក្នុង​រឿង​ទំនាស់​ដីធ្លី ត្រូវ​ដកខ្លួន​ចេញ​ជាបន្ទាន់​

504

​ព្រះសីហនុ​៖ សម្តេច​ក្រឡាហោម ស ខេង ឧបនាយករដ្ឋមន្ត្រី និង​ជា​រដ្ឋមន្ត្រី​ក្រសួងមហាផ្ទៃ បានប្រកាស​ប្រាប់ដ​ល់អ​ស់លោក​ទាំងឡាយណា ដែល​ជាប់​ពាក់ព័ន្ធ​នៅក្នុង​កិច្ច​អន្តរាគមន៍​រឿង​ទំនាស់​ដីធ្លី នៅ​ខេត្ត​ព្រះសីហនុ ត្រូវ​ដកខ្លួន​ចេញ​ជាបន្ទាន់ ដើម្បី​ទុក​ឱកាស​ឲ្យ​រដ្ឋបាលខេត្ត​ព្រះសីហនុ ចាត់ការ​ដោះស្រាយ​ទៅតាម​នីតិវិធី​ច្បាប់​។​

សម្ដេច ស ខេង

​ការប្រកាស​នេះ បាន​ធ្វើឡើង​នៅក្នុង ពិធី​បិទ​អង្គសន្និបាត បូកសរុប​លទ្ធផល​ការងារ​ឆ្នាំ​២០១៨ និង​លើក​ទិសដៅ​សម្រាប់​ឆ្នាំ​២០១៩ របស់​រដ្ឋបាលខេត្ត​ព្រះសីហនុ នា​ព្រឹក​ថ្ងៃទី​១ ខែមីនា ឆ្នាំ​២០១៩​នេះ​ក ក្រោម​អធិបតីភាព​សម្តេច​ក្រឡា​ហោម ស ខេង​។​

​សម្តេច​ក្រឡាហោម ស ខេង បាន​ឲ្យ​ដឹងថា ទំនាស់​ដីធ្លី​វា​បានកើត​យូរ​មកហើយ ក្នុងនោះ​មិនមែន​មានតែ​នៅ​ខេត្ត​ព្រះសីហនុ​នោះទេ ខេត្ត​ដទៃ​ក៏មានដែរ តែ​សំរាប់​ខេត្ត​ព្រះសីហនុ មាន​អ្នក​ដណ្តើម​ដី​គ្នា​កាន់កាប់ បង្ក​ជា​ទំនាស់​ជា​បន្តបន្ទាប់ នៅពេលដែល​ដី​ឡើងថ្លៃ ហើយ​បញ្ហា​នេះ វា​មាន​អ្នក​លូកដៃ​ចូល​អន្តរាគមន៍​ពី​ខាងក្រៅ​ថែមទៀត ដែលជា​មូលហេតុ​នាំ​ឲ្យ​មាន​បញ្ហា កាន់តែ​ស្មុគស្មាញ​មួយកម្រិត​ទៀត​។​

​សម្តេច​ក្រឡាហោម បាន​ក្រើនរំលឹក ដល់​មន្ត្រីក្រោមឱវាទ​ខេត្ត​ព្រះសីហនុ ត្រូវ​យកចិត្តទុកដាក់​បម្រើ​ប្រជាពលរដ្ឋ​ឲ្យ​បានល្អ និង​បានស្នើ​ឲ្យ​មន្ត្រី​យកចិត្តទុកដាក់​លើ ការបង្ក្រាប​បទល្មើស​គ្រឿងញៀន​, ការគ្រប់គ្រង​សំណល់​រឹង​-​រាវ​, ការការពារ​ដី​រដ្ឋ​ឲ្យ​បានល្អ​, ការទប់ស្កាត់​ការចូល​ទន្ទ្រាន​ដី​រដ្ឋ​ដោយ​ខុសច្បាប់​, ព្យាយាម​ដោះស្រាយ​ទំនាស់​ដីធ្លី កុំ​ឲ្យ​កើត​ថ្មី​, គ្រប់គ្រង​ជនបរទេស និង​អាជីវកម្ម​អ្នកវិនិយោគ​ដោយ​ច្បាប់ និង​ជំរុញ​លើក​កំពស់​សមត្ថភាព​របស់​ខ្លួន​ជាដើម​៕