កម្ពុជា នឹង​អនុវត្ត​ច្បាប់ ចាប់ខ្លួន ទណ្ឌិត សម រង្ស៊ី និង​បក្ខពួក យកមក​ផ្តន្ទាទោស​តាមច្បាប់​

707

​ភ្នំពេញ​៖ អគ្គស្នងការដ្ឋាន​នគ​របាល​ជាតិ ដែល​បានចេញ​សេចក្ដីប្រកាស​នៅ​ថ្ងៃទី​២៧ ខែកក្កដា ឆ្នាំ​២០១៩​នេះ​ថា អគ្គស្នងការដ្ឋាន​នគ​របាល​ជាតិ ដែលជា​ភ្នាក់ងារ​អនុវត្ត​ច្បាប់ នឹង​ចាត់វិធានការ​តាម​គ្រប់​រូបភាព និង​គ្រប់​មធ្យោបាយ​ស្របតាម​ច្បាប់ ក្នុងការ​ស្វែងរក និង​ចាប់ខ្លួន​ទណ្ឌិត សម រង្ស៊ី និង​បក្ខពួក យកមក​ផ្តន្ទាទោស តាមច្បាប់​ជា​ធរមាន តាម​ដីកា​របស់​តុលាការ​។​

​សេចក្ដីប្រកាស​ព័ត៌មាន បានសរសេរថា ៖

“​អ្នកនាំពាក្យ​របស់​អគ្គ​ស្នងការដ្ឋាន​នគរបាល​ជាតិ សូម​ជម្រាបជូន​សាធារណៈ​ជនជាតិ និង​អន្តរជាតិ​ឲ្យ​បាន​ជ្រាបថា អគ្គស្នងការដ្ឋាន​នគ​របាល​ជាតិ បានទទួល​ដីកា​បង្គាប់​ឲ្យ​ចាប់ខ្លួន ទណ្ឌិត សម រង្សី និង​បក្ខពួក ដែល​ត្រូវ​តុលាការ​សម្រេច​ផ្តន្ទាទោស ហើយ​បច្ចុប្បន្នកំពុង​គេចខ្លួន​។​

​ក្នុងតួនាទី​ជា​ភ្នាក់ងារ​អនុវត្ត​ច្បាប់ អគ្គស្នងការដ្ឋាន​នគ​របាល​ជាតិ នឹង​ចាត់វិធានការ​តាម​គ្រប់​រូបភាព និង​គ្រប់​មធ្យោបាយ​ស្របតាម​ច្បាប់ ដើម្បី​អនុវត្ត​ឲ្យ​មាន​ប្រសិទ្ធភាព​តាម​ដីកា​របស់​តុលាការ ក្នុងការ​ស្វែងរក និង​ចាប់ខ្លួន​ទណ្ឌិត សម រង្ស៊ី និង​បក្សពួក យកមក​ផ្តន្ទាទោស តាមច្បាប់​ជា​ធរមាន​។​”

​បន្ថែម​ពីលើ​នេះ​ទៀត អគ្គស្នងការដ្ឋាន​នគ​របាល​ជាតិ បាន​សូម​អំពាវនាវ​ដល់​សាធារណៈ​ជនជាតិ និង​អន្តរជាតិ ចូលរួម​គាំទ្រ​ដល់​ការអនុវត្ត​ភារកិច្ច​របស់​កងកម្លាំង​អនុវត្ត​ច្បាប់ និង​កុំ​ធ្លាក់​ទៅក្នុង​ឧបាយកល ញុះញង់​របស់​ជន​អគតិ​មួយ​ក្តាប់​តូច ដែល​កំពុង​បំផុស​ឲ្យ​ប្រជាពលរដ្ឋ បះបោរ​ប្រឆាំង​អាជ្ញា​ធរមាន​សមត្ថកិច្ច ដែល​សកម្មភាព​នេះ គឺជា​ទង្វើ​ខុសច្បាប់ ហើយក៏​ជា​ទង្វើ​ដែល​បង្ក​ឲ្យ​មាន​អសន្តិសុខ​ដល់​សង្គម​។​

ម្យ៉ាងវិញទៀត អគ្គស្នងការដ្ឋាន​នគ​របាល​ជាតិ សុំ​ឲ្យ​បញ្ឈប់​ជាបន្ទាន់ នូវ​រាល់​ចេតនា​រារាំង​ការអនុវត្ត​ដីកា​របស់​តុលាការ ព្រោះ​សកម្មភាព​រារាំង​ការអនុវត្ត​ដីកា​របស់​តុលាការ គឺជា​អំពើ​ដែល​ត្រូវ​ផ្តន្ទាទោស​តាមច្បាប់​ជា​ធរមាន​។​

​គួរ​រំ​ម្លឹ​ក​ផងដែរ​ថា លោក សម រង្ស៊ី អតីត​មេដឹកនាំ​អតីត​គណបក្សប្រឆាំង ដែល​កំពុង​និរទេស រហូតមកដល់​ពេលនេះ បាន​រង​នូវ​ពាក្យបណ្តឹង​ចំនួន ១០ ក្នុងនោះ​បណ្តឹង​ចំនួន ៨ ត្រូវបាន​ជំនុំជម្រះ​រួចរាល់​ជា​ស្ថាប​ពរ ខណៈ​បណ្តឹង ២​ទៀត កំពុងស្ថិត​នៅក្រោម​នីតិ​វិធី​ច្បាប់​របស់​តុលាការ ៕​