ភ្នំពេញ៖ ប្រទេសចិន ដែលតំណាងដោយ លោក ខុង សៀនយ៉ូវ (Kong Xuanyou) អនុរដ្ឋមន្ត្រីក្រសួងការបរទេសចិន បានបញ្ជាក់យ៉ាងច្បាស់ថា ការវិនិយោគ និងជំនួយរបស់ចិននៅកម្ពុជាមិនមែនជាអន្ទាក់នោះទេ គឺជាការជួយដោយស្មោះ ក្នុងនាមជាបងប្អូនល្អ។
លោក ខុង សៀនយ៉ូវ ថ្លែងបែបនេះ នៅក្នុងពិធីសម្ពោធ បើកការដ្ឋានសាងសង់ ផ្លូវល្បឿនលឿនភ្នំពេញ-ព្រះសីហនុ ដែលជាផ្លូវល្បឿនលឿនដំបូងគេរបស់កម្ពុជា នៅថ្ងៃទី២២ ខែមីនា ឆ្នាំ២០១៩នេះ។
លោកអនុរដ្ឋមន្ត្រីក្រសួងការបរទេសចិន ខុង សៀនយ៉ូវ បានលើកឡើងថា ក្រុមដែលមានចេតនាមិនល្អមួយចំនួន បានប្រែសជាខ្មៅ លាបពណ៌ ទៅលើការវិនិយោគរបស់ចិនថាជាអន្ទាក់។ ការវិនិយោគរបស់ចិន មិនមែនជាអន្ទាក់ទេ រឹតតែមិនមែនជាការគំរាមកំហែង តែវាជាការជួយដ៏ស្មោះ ជាកម្លាំងជំរុញដល់សមត្ថភាព អភិវឌ្ឍរបស់ប្រទេសកម្ពុជា និងជាទង្វើនាំមកនូវផលប្រយោជន៍ ដល់ប្រទេសកម្ពុជា។
គួររំម្លឹកផងដែរថា ប្រទេសចិន គឺប្រទេសដែលបានផ្ដល់ជំនួយច្រើនជាងគេ ដល់ប្រទេសកម្ពុជា និងការវិនិយោគរបស់ចិននៅប្រទេសកម្ពុជា ក៏មានការកើនឡើងយ៉ាងខ្លាំង ជាពិសេសនៅខេត្តព្រះសីហនុ។ ដោយសារតែឥទ្ធិពលរបស់ចិន កាន់តែខ្លាំងឡើងនៅក្នុងតំបន់អាស៊ី បានធ្វើឲ្យអ្នកដែលមាននិន្នាការ ទៅខាងប្រទេសលោកខាងលិច បានធ្វើការលើកឡើង និងព្រមានថា កម្ចីឥណទាន, ការវិនិយោគ និងជំនួយរបស់ប្រទេសចិន គឺជាអន្ទាក់។ កាផ្ដល់ជំនួយរបស់ចិន ទៅលើប្រទេសណាមួយ នឹងនាំឲ្យប្រទេសនោះ ធ្លាក់ទៅក្នុងអន្ទាក់របស់ចិន ព្រោះប្រទេសនោះនឹងបាត់បងនូវផ្នែកណាមួយ ឲ្យទៅប្រទេសចិន ដោយសារតែពុំមានលទ្ធភាព សងបំណុលឲ្យទៅប្រទេសចិនវិញ៕
