សម្តេច​តេ​ជោ ហ៊ុន សែន និង​ឯកអគ្គរដ្ឋទូត​ជប៉ុន នឹង​ដឹក​ដៃ​គ្នា​ដើរកាត់ ស្ពាន​ជ្រោយចង្វារ​ទី​១ នៅ​ថ្ងៃស្អែក​

48507

ភ្នំពេញ​៖ សម្តេច​តេ​ជោ ហ៊ុន សែន នាយករដ្ឋមន្ត្រី នៃ​កម្ពុជា បាន​ថ្លែងថា នៅ​ថ្ងៃទី​០៣ ខែមេសា ឆ្នាំ​២០១៩​ខាងមុខនេះ សម្ដេច និង​ឯកអគ្គរដ្ឋទូត​ជប៉ុន ហូ​រី​ណូ​អូ​ជិ ហ៊ី​ដេ​អ៊ី​ហ្សា (Horinouchi Hidehisa) នឹង​ដឹក​ដៃ​គ្នា​ដើរកាត់ ស្ពាន​ជ្រោយចង្វារ​ទី​១ ពោលគឺ​នៅ​ថ្ងៃ​បើកដាក់​ឲ្យ​ដំណើរការ​ឡើងវិញ បន្ទាប់ពី​ស្ពាន​មិត្តភាព​កម្ពុជា​-​ជប៉ុន ឬ​ស្ពាន​ជ្រោយចង្វារ​ទី​១ បាន​ជុស​ជុល​រួចរាល់​ជា​ស្ថាប​ពរ​ដោយ​ចំណាយ​ថវិកា​អស់​ប្រមាណ ៣០​លាន​ដុល្លារ​អាមេរិក ក្រោម​ជំនួយឥតសំណង​របស់​រដ្ឋាភិបាល​ជប៉ុន​។​

ស្ពាន​មិត្តភាព​កម្ពុជា​-​ជប៉ុន ឬ​ស្ពាន​ជ្រោយចង្វារ​ ទី១

​សម្ដេច​តេ​ជោ ថ្លែង​បែបនេះ​នៅក្នុង​ឱកាស ដែល​សម្ដេច​អញ្ជើញ​បើកសម្ពោធ​ដាក់ ឱ្យ​ដំណើរការ​ជា​ផ្លូវការ នូវ​ប្រព័ន្ធ​ផ្គត់ផ្គង់​ទឹកស្អាត​ខេត្តកំពត សាងសង់ឡើង​ក្រោម​ជំនួយ​របស់​រដ្ឋាភិបាល​ជប៉ុន​តម្លៃ​ជាង ២៦​លាន​ដុល្លារ​សហរដ្ឋអាមេរិក​។​

​ប្រព័ន្ធ​ផ្គត់ផ្គង់​ទឹកស្អាត​ខេត្តកំពត​នេះ បានចាប់ផ្តើម​សាងសង់​កាលពី​ខែកក្កដា ឆ្នាំ​២០១៦ ហើយ​បញ្ចប់​ការសាងសង់​ជា​ស្ថាពរ​កាលពី​ខែសីហា ឆ្នាំ​២០១៨​។ តាមរយៈ​ប្រព័ន្ធ​ផ្គត់ផ្គង់​ទឹកស្អាត​នេះ នឹង​ជួយ​ឱ្យ​អង្គភាព​រដ្ឋាករទឹក​ខេត្តកំពត មាន​សមត្ថភាព​ផលិត​ទឹកស្អាត​សរុប ប្រមាណ ១៣,២៦០​ម៉ែត្រគូប​ក្នុង​មួយថ្ងៃ គឺ​ស្មើនឹង​ជាង​២​ដង​នៃ​សមត្ថភាព​ផលិត​ពីមុន​។​

​យោងតាម​សេចក្តីប្រកាស​ព័ត៌មាន​របស់​ក្រសួង​ឧស្សាហកម្ម និង​សិប្បកម្ម បាន​ឲ្យ​ដឹងថា វត្តមាន​ប្រព័ន្ធ​ផ្គត់ផ្គង់​ទឹកស្អាត​ថ្មី​នេះ រួមជាមួយ​បណ្តាញ​ចែកចាយ​សរុប​ប្រវែង ១៧៦.៩​គីឡូម៉ែត្រ ធ្វើឱ្យ​អង្គភាព​រដ្ឋាករទឹក​ខេត្តកំពត​អាចមាន​លទ្ធភាព​ផ្គត់ផ្គង់​ទឹកស្អាត​ដែលមាន​គុណភាព សុវត្ថិភាព និរន្តរភាព និង​តម្លៃ​សមរម្យ ដោយ​គិត​ជា​ថ្លៃ​មធ្យម ១៤០០​រៀល​/​ម​៣ ជូន​ប្រជាពលរដ្ឋ​នៅ​ក្រុង​កំពត និង​ស្រុក​ទឹកឈូ សរុប​ជាង ១៣,០០០​គ្រួសារ​។​

​វត្តមាន​ប្រព័ន្ធ​ផ្គត់ផ្គង់​ទឹកស្អាត​នេះ ក៏​ជាការ​រួមចំណែក​ធ្វើឱ្យ​អង្គភាព​រដ្ឋាករទឹក​ខេត្តកំពត សម្រេចបាន​នូវ​គោលនយោបាយ​របស់​រដ្ឋា​ភិ​បាល​ដែល​បាន​កំណត់ថា «​ត្រូវ​ពង្រីក​វិសាលភាព​នៃ​ការផ្គត់ផ្គង់​ទឹកស្អាត​នៅ​ទីក្រុង ទីប្រជុំជន​ឱ្យបាន​៩០% ត្រឹម​ឆ្នាំ​២០២៣ និង​១០០% ត្រឹម​ឆ្នាំ​២០២៥ សម្រាប់​បម្រើ​តម្រូវការ​ចាំបាច់​របស់​ប្រជាជន ក៏ដូចជា​សម្រាប់​ផលិតកម្ម និង​សេវាកម្ម​នានា​»​។​

​វត្តមាន​ប្រព័ន្ធ​ផ្គត់ផ្គង់​ទឹកស្អាត​នៅក្នុង​ខេត្តកំពត កើតចេញពី​ជំនួយឥតសំណង​របស់​រដ្ឋាភិបាល​ជប៉ុន រួមចំណែក​យ៉ាងសំខាន់​ក្នុងការ​លើកកម្ពស់​សុខ​មាល​ភាព​របស់​ប្រជាពលរដ្ឋ ការអភិវឌ្ឍន៍​សេដ្ឋកិច្ច និង​សង្គម ជាពិសេស​ក៏​ជាការ​ទាក់ទាញ​ឱ្យមាន​ការវិនិយោគ កាន់តែច្រើន​បន្ថែមទៀត​នៅ​ទីក្រុង​ឆ្នេរសមុទ្រ​មួយ​នេះ​ផងដែរ​៕