តើ​អនាគត​របស់ គណបក្ស​សង្គ្រោះ​ជាតិ នឹង​ទៅជា​យ៉ាងណា​? មន្ត្រី​របស់​បក្សប្រឆាំង​ប្រមាណ​២៦​រូប នឹង​ស្នើសុំ​ធ្វើ​នយោបាយ​ឡើងវិញ ឯ​មួយចំនួនទៀត ត្រូវ​តុលា​ការចេញ​ដីកា​តាម​ចាប់ខ្លួន​

2875

​ភ្នំពេញ​៖ តើ​គណបក្ស​សង្គ្រោះ​ជាតិ កំពុងតែ​មានការ​បែកបាក់​ផ្ទៃក្នុង​ឬ​យ៉ាងណា ឬក៏​ជា​យុទ្ធសាស្ត្រ​ថ្មី​? តើ​អនាគត​របស់​បក្សប្រឆាំង​មួយ​នេះ នឹង​ទៅជា​យ៉ាងណា​? ពីព្រោះ​បើតាម​ការ​ឲ្យ​ដឹង​ពី​អ្នកនាំពាក្យ​របស់​ក្រសួងមហាផ្ទៃ បាន​ប្រាប់​ទៅ សារព័ត៌មាន​កោះសន្តិភាព​ថា នឹងមាន​មន្ត្រី​អតីត​គណបក្ស​សង្គ្រោះ​ជាតិ ប្រមាណ​២៦​រូប ដែល​ត្រូវបាន​តុលាការ​កំពូល​ហាមឃាត់​ធ្វើ​នយោបាយ​កន្លងមក​នោះ នឹងដាក់​ពាក្យ​ស្នើរ​សុំ​សិទ្ធិ​ធ្វើ​នយោបាយ​ឡើងវិញ ជាមួយគ្នានេះដែរ លោក កូយ សៅ ចៅក្រម​ស៊ើបសួរ នៃ​សាលាដំបូង​រាជធានី​ភ្នំពេញ បានចេញ​ដីកា​បង្គាប់​ឱ្យ​សមត្ថកិច្ច តាម​ចាប់ខ្លួន​លោក សម រ​ង្ស៉ី​, លោក អេង ឆៃអ៊ាង​, លោកស្រី មូរ សុខ​ហួរ​, លោក អ៊ូ ច័ន្ទ​ឫទ្ធិ​, លោក ហូ វ៉ាន់​, លោក ឡុង រី​, លោក ម៉ែន សុថា​វរិ​ន្ទ្រ និង លោក តុ វ៉ាន់​ចាន់​។​

​លោក រៀល ខេ​ម​រិ​ន្ទ្រ បានដាក់​ពាក្យសុំ​សិទ្ធិ​ធ្វើ​នយោបាយ​ឡើងវិញ ហើយ​ត្រូវបាន​លោក ខៀវ សុភ័ក អ្នកនាំពាក្យ​របស់​ក្រសួងមហាផ្ទៃ បញ្ជាក់ថា​គឺ​វា​ជា​ការពិត និង​ត្រូវបាន​គេ​ដកស្រង់​សម្ដី​របស់លោក​ថា​៖ “​ពិត​ហើយ​លោក រៀល ខេ​ម​រិ​ន្ទ្រ សុំ​សិទ្ធិ​ធ្វើ​នយោបាយ​ឡើងវិញ ហើយ​សម្តេច​ក្រឡាហោម ស ខេង បាន​យល់ព្រម ។ គាត់​បាន​សុំ​កាលពី​ថ្ងៃទី​១៤ ខែមីនា កន្លងមក ។ ឥឡូវ​សម្តេច​ឯកភាព​ហើយ ប៉ុន្តែ​នៅ​រង់ចាំ​ព្រះរាជក្រឹត្យ​មួយទៀត​ទើប​ទទួលបាន​សិទ្ធិ​ជា​ស្ថាពរ​ព្រោះថា ជាគោលការណ៍​រាជរដ្ឋាភិបាល​ឯកភាព​ហើយ​”​។​

លោក រៀល ខេ​ម​រិ​ន្ទ្រ

​លោក រៀល ខេ​ម​រិ​ន្ទ្រ បានដាក់​ពាក្យស្នើសុំ​នីតិសម្បទា ធ្វើ​នយោបាយ​ឡើងវិញ ដោយ​លោក​មានបំណង​បង្កើត​គណបក្សនយោបាយ​ថ្មី​មួយ ដើម្បី​ចូលរួម​ប្រកួតប្រជែង ក្នុងការ​បោះឆ្នោត ឆ្នាំ​២០២២ – ២០២៣ ខាងមុខនេះ ហើយ​ត្រូវបាន​រង​ការរិះគន់​ជា​បន្តបន្ទាប់ ពី​សំណាក់​មន្ត្រី​នៃ​អតីត​គណបក្ស​សង្គ្រោះ​ជាតិ​ផ្សេងទៀត​ផងដែរ​។​

​សូមបញ្ជាក់ថា លោក រៀល ខេ​ម​រិ​ន្ទ្រ គឺជា​អ្នក​ទី​៤ នៃ​អតីត​ថ្នាក់ដឹកនាំ​គណបក្ស​សង្គ្រោះ​ជាតិ ដែល​បានដាក់​លិខិត​ស្នើសុំ​សិទ្ធិ​ធ្វើ​នយោបាយ បន្ទាប់ពី លោក ស៊ីម សុវណ្ណនី ហៅ ស៊ីម វ៉ាន់​នី ដែលជា​អតីត​សមាជិក​គណៈកម្មាធិការ​នាយក របស់​អតីត​គណបក្ស​សង្គ្រោះ​ជាតិ ដែល​ទទួលបាន​នីតិសម្បទា​នយោបាយ បន្ទាប់ពី លោក គង់ គាំ អតីត​ទីប្រឹក្សា​ជាន់ខ្ពស់​គណបក្ស​សង្គ្រោះ​ជាតិ និង លោក គង់ បូរ៉ា អតីត​តំណាងរាស្ត្រ​គណបក្ស​សង្គ្រោះ​ជាតិ​។​

លោក សម រ​ង្ស៉ី

​ចំណែកឯ​លោក សម រ​ង្ស៉ី​, លោក អេង ឆៃអ៊ាង​, លោកស្រី មូរ សុខ​ហួរ​, លោក អ៊ូ ច័ន្ទ​ឫទ្ធិ​, លោក ហូ វ៉ាន់​, លោក ឡុង រី​, លោក ម៉ែន សុថា​វរិ​ន្ទ្រ និង លោក តុ វ៉ាន់​ចាន់ ដែល​បច្ចុប្បន្ននេះ​អ្នក​ទាំងអស់​កំពុង​រស់​នៅក្រៅ​ប្រទេស ត្រូវបាន​តុលាការ​ចោទប្រកាន់​ពីបទ «​រួមគំនិត​ក្បត់ និង​ញុះញង់​ឱ្យ​ប្រព្រឹត្តិ​បទឧក្រិដ្ឋ​ជាអាទិ៍​» បន្ទាប់ពី លោក សម រ​ង្ស៉ី និង​បក្ខពួក បាន​ញុះញង់​ឱ្យ​ប្រជាពលរដ្ឋ និង​ទាហាន ងើប​ប្រឆាំង​រាជរដ្ឋាភិបាល​។​

​មហាជន​កំពុង​រងចាំ​មើល ថា​តើ​វាសនា​របស់​គណបក្ស​ស​ង្គ្រោះ​ជាតិ នឹង​ក្លាយទៅជា​យ៉ាងណា​នាពេល​ខាងមុខនេះ​៕