ថៃ៖ លោក ប្រាយុទ្ធ ចាន់អូចា ត្រូវបានគណបក្សនយោបាយតូចៗចំនួន ១១ ដែលមានអសនៈម្នាក់មួយៗនៅក្នុងសភាតំណាងរាស្ដ្រ ប្រកាសបោះឆ្នោតគាំទ្រ ឲ្យធ្វើជានាយករដ្ឋមន្ត្រី។
គណបក្សនយោបាយទាំង ១១ នោះ បានបញ្ជាក់ផងដែរថា ពួកគេគាំទ្រឲ្យគណបក្ស ផាឡាំង ប្រាចា រ៉ាត់ (Palang Pracha Rath) ដែលស្និទ្ធនឹងយោធាថៃ និងទទួលបានអសនៈសរុប ១១៥នៅសភាតំណាងរាស្ត្រនោះ ឲ្យដឹកនាំរដ្ឋាភិបាលចម្រុះ ដោយបក្សរបស់ពួកគេមកពី ១១ គណបក្ស នឹងចូលរួមជាមួយ។
![](https://www.cambodianews.today/wp-content/uploads/2019/03/thailand-election-2019.jpeg)
គណបក្ស ផាឡាំង ប្រាចា រ៉ាត់ មានគូប្រជែងធំមួយ គឺបក្សភឿថៃ (Pheu Thai) ដែលមានអតីតនាយករដ្ឋមន្ត្រីថៃលោក ថាក់ស៊ីន ស៊ីណាវ៉ាត់ នៅពីក្រោយ និងទទួលបានអសនៈច្រើនជាងគេ ក្នុងការបោះឆ្នោតកាលពីពេលថ្មីៗកន្លងទៅនេះ រហូតដល់ ១៣៥ នៅក្នុងសភាតំណាងរាស្ត្រ។
![](https://www.cambodianews.today/wp-content/uploads/2019/03/thailand-election-2019-1.jpeg)
គួររំម្លឹកផងដែរថា សភាតំណាងរាស្ត្រថៃដែលមានសមាជិក ៥០០នាក់ និងព្រឹទ្ធសភាថៃ ដែលមានសមាជិក ២៥០នាក់ នឹងរួមគ្នាបោះឆ្នោតជ្រើសរើសនាយករដ្ឋមន្ត្រីថ្មី តាមបែបលទ្ធិប្រជាធិបតេយ្យក្នុងពេលឆាប់ៗខាងមុខ តែសមាជិកទាំង ២៥០នាក់នៅព្រឹទ្ធសភាដែលត្រូវបានជ្រើសរើស ដោយក្រុមប្រឹក្សាជាតិដើម្បីសន្តិភាព និងសណ្តាប់ធ្នាប់ថៃដឹកនាំដោយលោក លោក ប្រាយុទ្ធ ចាន់អូចា ហេតុដូច្នេះពួកគេទាំង ២៥០នាក់ ត្រូវបានអ្នកវិភាគលើកឡើងថា ប្រាកដជាគាំទ្រគណបក្ស ផាឡាំង ប្រាចា រ៉ាត់ របស់លោក ប្រាយុទ្ធ ចាន់អូចា ជាមិនខាន។ ដើម្បីជាប់ជានាយករដ្ឋមន្ត្រី បេក្ខភាពនីមួយៗ ត្រូវការសំឡេងគាំទ្រ ៣៧៦សំឡេង៕