តើ​ចិន មាន​ចំណុច​អ្វីខ្លះ នៅក្នុង​ដៃ ដែល​អាច​វ៉ៃ​បក ទៅលើ​សហរដ្ឋអាមេរិក​​វិញ នៅក្នុង​សង្គ្រាម​ពាណិជ្ជកម្ម​?

1224

​ប្រទេស​ចិន ហាក់ដូចជា​មិនទាន់​បញ្ចេញ​សកម្មភាព​វ៉ៃ​បក ទៅ​សហរដ្ឋអាមេរិក​វិញ​ភ្លាម​ទេ ចំពោះ​ការ​ធ្វើទុក្ខបុកម្និញ នៅក្នុង​សង្គ្រាម​ពាណិជ្ជកម្ម កាលពីពេល​ថ្មីៗ​នេះ ទៅលើ​ក្រុមហ៊ុន​បច្ចេកវិទ្យា Huawei របស់​ចិន ដែល​ស្ទើរតែ​ធ្វើ​ឲ្យ​ក្រុមហ៊ុន​មួយ​នេះ​អស់​ផ្លូវ​នឹង​ដើរ​។​

​ក្រុមអ្នកវិភាគ​បានធ្វើការ​គន់គូរ ប្រ​មើ​មើលឃើញថា ប្រទេស​ចិន នៅមាន​ចំណុចខ្លាំង​ចំនួន ២ ទៀត សម្រាប់​វ៉ៃ​បក​ទៅ​សហរដ្ឋអាមេរិក​វិញ បាន​យ៉ាង​ចាស់ដៃ ប្រសិន​ប្រទេស​ចិន​បើ​ចង់​វ៉ៃ​បក​នោះ​។

​តែ​រហូតមក​ដល់ពេលនេះ លោក ស៊ី ជិន​ពីង មិនទាន់មាន​សកម្មភាព​អ្វី​ធំដុំ ជាការ​ដាក់បន្ទុក​ខ្លាំង​ទៅលើ​សហរដ្ឋអាមេរិក​វិញ​សោះ ខណៈ​ក្រុមហ៊ុន​បច្ចេកវិទ្យា Huawei ហាក់ដូចជា​កំពុងតែ​ស្ថិតនៅក្នុង​ទឹក​ដាំ​ពុះ ចាប់​តាំងពីដើម​សប្ដាហ៍​នេះ​រហូតមក ហើយ​បានប្រកាស​ចេញ​វិធានការ​ដោះស្រាយ​ជា​បន្តបន្ទាប់ ទៅលើ​ផលប៉ះពាល់​ចំពោះ​ក្រុមហ៊ុន​របស់ខ្លួន ហើយ​ចំណែកឯ​រដ្ឋាភិបាល​ចិន បានសម្រេច​លើកលែង​ពន្ធ សម្រាប់​ក្រុមហ៊ុន​ផលិត​ឈី​ប និង អភិវឌ្ឍន៍ Software រយៈពេល​៥​ឆ្នាំ ក្នុង​គោលបំណង​លើកស្ទួយ​ឧស្សាហកម្ម បច្ចេកវិទ្យា​របស់ខ្លួន ដើម្បី​ឈប់​ពឹងផ្អែក ទៅលើ​បរទេស​។​

​តើ ប្រទេស​ចិន មាន​អ្វីខ្លះ នៅក្នុង​ដៃ ដែល​អាច​តតាំង​ជាមួយ សហរដ្ឋអាមេរិក ?

​នៅ​ដើម​សប្តាហ៍​នេះ លោក ស៊ី ជិន​ពីង បានធ្វើ​ទស្សនកិច្ច​ទៅកាន់​រោងចក្រ​កែច្នៃ ធនធាន​រ៉ែ ដ៏​កម្រ​របស់​ផែនដី (Rare Earth Element) នៅឯ​ទីក្រុង កាន់​ចូ​វ (Ganzhou) ភាគ​ខាងកើត​ប្រទេស​ចិន​។ តាមរយៈ​ដំណើរ​ទស្សនកិច្ច​នេះ អ្នកវិភាគ​ស្ថានការណ៍​អន្តរជាតិ យល់ឃើញថា ប្រទេស​ចិន អាច​នឹង​យក​ធនធាន​រ៉ែ​ដ៏​សំខាន់​នេះ ធ្វើជា​អាវុធ​ដ៏​មុត​ស្រួច​មួយ សម្រាប់ធ្វើ​សង្គ្រាម​ពាណិជ្ជកម្ម ជាមួយ​សហរដ្ឋអាមេរិក​។​

​ហេតុអ្វី បានជា​ធនធាន​រ៉ែ ដ៏​កម្រ​របស់​ផែនដី (Rare Earth Element) ជា​អាវុធ​ដ៏​មុត​ស្រួច​?

​ពីព្រោះ ធនធាន​រ៉ែ ដ៏​កម្រ​របស់​ផែនដី Rare Earth គឺជា​ក្រុម​ធាតុ​រ៉ែ​ចំនួន ១៧ ដែលជា​សមាសធាតុ​ផ្សំ​យ៉ាង​ចាំបាច់ នៃ​គ្រឿង​បរិក្ខា​យោធា និង​សម្ភារៈ​ទំនើប នាពេល​បច្ចុប្បន្ន រួមមាន​ទាំង​កុំព្យូទ័រ​យួរដៃ រហូតដល់​យានជំនិះ​អេ​ឡិច​ត្រូ​និ​ច និង​ប្រព័ន្ធ​សព្វាវុធ ហើយ​ប្រទេស​ចិន គឺជា​អ្នក​ផ្ដ​ត់​ផ្គង់ ៩០​ភាគរយ នៃ​ការផលិត​និង​កែច្នៃ​ធនធាន​នេះ នៅ​ទូទាំង​ពិភពលោក​។ សូម្បីតែ​សហរដ្ឋអាមេរិក ក៏​ពឹងផ្អែក​យ៉ាង​ធំធេង​លើ​ការ​នាំចូល​ធនធាន ធនធាន​រ៉ែ ដ៏​កម្រ​របស់​ផែនដី Rare Earth ពី​ប្រទេស​ចិន​ដែរ ហើយ​ធនធាន​នេះ សហរដ្ឋអាមេរិក​ពុំទាន់ មាន​គម្រោង​ដំឡើង​ពន្ធ​នៅឡើយ​ទេ​។​

​គ្រាន់តែ​កាលពី​ឆ្នាំ​២០១០ នៅពេលដែល​ប្រទេស​ចិន បាន​កាត់បន្ថយ​កូតា​នាំចេញ ៤០​ភាគរយ​សោះ បានធ្វើ​ឲ្យ សហភាព​អឺរ៉ុប អាមេរិក និង​ជប៉ុន រត់​ទៅ​ប្តឹងតវ៉ា អង្គការ​ពាណិជ្ជកម្ម​ពិភពលោក​ភ្លាមៗ ព្រោះតែ​រង​ការប៉ះពាល់​យ៉ាងខ្លាំង​ចំពោះ​ខ្លួន​។ ប្រសិនបើ​ប្រទេស​ចិន មិន​ផ្ដល់ ធនធាន​រ៉ែ ដ៏​កម្រ​របស់​ផែនដី Rare Earth នេះ​ទៅ​ឲ្យ​សហរដ្ឋអាមេរិក​ទេ អាច​នឹងធ្វើ​ឲ្យ​ឧស្សាហកម្ម​មួយ​ភាគ​ធំ របស់​សហរដ្ឋអាមេរិក ជាប់គាំង​ស្មេញ ដូចជា​ខាង ចម្រាញ់​ប្រេង ថាមពល​កម្លាំង​ខ្យល់​បក់ និង​វិស័យ​ផលិត​បរិក្ខា​ការពារជាតិ​ជាដើម​។​

​សម្រាប់​ចំណុច​មួយទៀត​នោះ​គឺ ប្រទេស​ចិន​ជា​ម្ចាស់បំណុល​ធំជាងគេ​បង្អស់ របស់​រដ្ឋាភិបាល​អាមេរិក ដោយ​ប្រទេស​ចិន មាន​មូល​ប​ត្រ​បំណុល​អាមេរិក​នៅក្នុង​ដៃដល់​ទៅ​ជាង ១.២ ទ្រី​លាន​ដុល្លារ (​ពាន់​ពាន់​លាន​) ឬ​ស្មើនឹង​០៧​ភាគរយ នៃ​តម្លៃ​ទីផ្សារ​ពិភពលោក​ទាំងមូល​។​

​ប្រទេស​ចិន អាច​លក់​មូល​ប​ត្រ​បំណុល​អាមេរិក​នេះ ដើម្បី​យកប្រាក់​បំពេញ​ទុនបម្រុង​របស់ខ្លួន​ឡើងវិញ ឬក៏​ដើម្បី​លើកកម្ពស់​ប្រាក់​យ័ន​របស់ខ្លួន​។​

បើ​ប្រទេស​ចិន សម្រេច​ជ្រើសរើស​លក់​មូល​ប​ត្រ​បំណុល​អាមេរិក​ទាំងអស់ វា​នឹងធ្វើ​ឲ្យ​លុយ​ដុល្លារ​អាមេរិក​ចុះខ្សោយ​ខ្លាំង ហើយ​ការប្រាក់​ដែល​អាមេរិក ត្រូវ​បង់​ក៏​នឹង​ឡើង​ខ្ពស់កប់ពពក ដែល​អាច​បណ្តាល​ឲ្យ​សេដ្ឋកិច្ច​របស់​អាមេរិក​ទាំងមូល​ជួប​បញ្ហា​ធំ​។ តែ​ការធ្វើ​ដូចនេះ ក៏​ផ្ដល់​ផល​អវិជ្ជមាន ដល់​ប្រទេស​ចិន​ខ្លួនឯង​វិញ​ផងដែរ ព្រោះ​ការលក់​មូល​ប​ត្រ​បំណុល​អាមេរិក វា​អាចធ្វើ​លុយ​យ័ន​រឹងមាំ តែ​នៅពេល​ជាមួយគ្នា​នោះ បានធ្វើ​ឲ្យ​ការនាំចេញ​ផលិតផល​របស់​ចិន​កាន់តែ​ថ្លៃ និង​ពិបាក​លក់​ជាដើម​។​

​យើង​នឹង​រក​ចាំមើល ថា​តើ​ប្រទេស​ចិន នឹងធ្វើ​អ្វី​បន្តទៀត​ចំពោះ​ចំណាត់ការ​របស់​សហរ​ដ្ឋ​អាមេរិក ហើយ​ថា​តើ​សង្គ្រាម​ពាណិជ្ជកម្ម​រវាង ប្រទេស​ធំ​ទាំង​២ ចិន​-​អាមេរិក ចុងក្រោយ​វា​នឹង​ទៅជា​យ៉ាងណា និង​ផ្ដល់​ផលប៉ះពាល់​អ្វីខ្លះ​ដល់​ពិភពលោក​ទាំងមូល​៕​