ចិន អះអាងថា នឹង​ធានា​និរន្តរភាព​ការវិនិយោគ នៅ​ខេត្ត​ព្រះសីហនុ​

827

ភ្នំពេញ​៖ លោក វ៉ាង យ៉ា​ជុន (Wang Yajun) អនុរដ្ឋមន្ត្រី​ក្រសួង​ទំនាក់ទំនង​អន្តរជាតិ នៃ​គណបក្ស​កុម្មុយនីស្ត​ចិន បាន​អះអាងថា នឹងធ្វើ​យ៉ាងណា​ឲ្យ​ការវិនិយោគ និង​ហេដ្ឋារចនាសម្ព័ន្ធ​វិស័យ​ឧស្សាហកម្ម នៅ​ក្រុងព្រះសីហនុ មានការ​អភិវឌ្ឍ​ប្រកបដោយ​និរន្តរភាព​។ ការអះអាង​របស់លោក បាន​ធ្វើឡើង​នៅក្នុង​ជំនួប​សម្តែង​ការគួរសម និង​ពិភាក្សា​លើ​ការងារ​មួយចំនួន​ជាមួយ​សម្តេច​តេ​ជោ ហ៊ុន សែន នាយករដ្ឋមន្ត្រី​នៃ​កម្ពុជា ក្នុងពេល​បំពេញ​ទស្សនកិច្ច​នៅ​កម្ពុជា នៅ​ថ្ងៃទី​២៤ ខែឧសភា ឆ្នាំ​២០១៩​នេះ​។​

លោក វ៉ាង យ៉ា​ជុន និងសម្ដេចតេជោ ហ៊ុន សែន

នៅក្នុង​ជំនួប​នេះ លោក វ៉ាង យ៉ា​ជុន បាន​ផ្តាំផ្ញើ​សាកសួរ​សុខទុក្ខ​ពី ឯកឧត្តម​ប្រធានាធិបតី​ចិន ស៊ី ជីន​ពីង និង​នាយករដ្ឋមន្ត្រី​ចិន លី ខឺ​ឈាំ​ង និង ឯកឧត្តម សុង តាវ ជូន​ចំពោះ សម្ដេច​តេ​ជោ​នាយករដ្ឋមន្ត្រី​។​

​ដំណើរ​ទស្សនកិច្ច​មក​កាន់​ព្រះរាជាណាចក្រ​កម្ពុជា​រប​ស់លោក វ៉ាង យ៉ា​ជុន នាពេលនេះ គឺ​ដើម្បី​ជំរុញ​នឹង​បន្ត​ការធ្វើការ​រាល់​កិច្ចការ​ទាំងឡាយ​ដែល​ថ្នាក់ដឹកនាំ​កំពូល​នៃ​ប្រទេស​ទាំងពីរ ដែលមាន​សម្ដេច​តេ​ជោ​នាយករដ្ឋមន្ត្រី និង​ឯកឧត្តម​ប្រធានាធិបតី​ចិន ស៊ី ជីន​ពីង បាន​ចុះហត្ថលេខា​នាពេល​កន្លងមក​។

​ខេត្ត​ព្រះសីហនុ

​លោក វ៉ាង យ៉ា​ជុន បាន​បញ្ជាក់ថា កម្ពុជា​និង​ចិន​គឺជា​មិត្ត​ដែកថែប ហើយ​ទំនាក់ទំនង​រវាង​កម្ពុ​ជា និង​ចិន​នៅពេលនេះ​ស្ថិតនៅ​លំដាប់​ល្អ​បំផុត​។ ចំពោះ​ឯកសារ​ទាំងឡាយ​ដែល​បាន​ចុះហត្ថលេខា​ជាមួយគ្នា​នៅពេល​កន្លងមក​នៅក្នុង​កិច្ចប្រជុំ​ខ្សែក្រវាត់ និង​ផ្លូវ​នៅ​ប្រទេស​ចិន​នា គឺ​នឹង​ជំរុញ​ទំនាក់​ទំ​ន​រវាង​ប្រទេស​ទាំងពីរ​អោយ​កាន់តែ​រឹងមាំ​ថែមទៀត ជាពិសេស​គឺ​នាំមក​នូវ​ផលប្រយោជន៍​រួម​សម្រាប់​ប្រជាជន​និង​ប្រទេស​ទាំងពីរ ដែល​នឹង​ជួយ​ជំរុញ​ដល់​ការអភិវឌ្ឍ និង​ពង្រីក​នូវ​កិច្ចសហប្រតិបត្តិការ​អោយ​កាន់តែ​រឹងមាំ​ថែមទៀត​។​

​លោក វ៉ាង យ៉ា​ជុន បាន​ជម្រាបជូន​សម្តេច​តេ​ជោ​ថា នៅពេលដែល​លោក​បាន​ចុះ​ពី​យន្តហោះ​មកដល់​រាជធានី​ភ្នំពេញ គឺ​លោក​បាន​សង្កេតឃើញ​រាជធានី​ភ្នំពេញ​មាន​ភាពរស់រវើក​ស្រស់ស្អាត និង​មាន​សក្តានុពល​ជាច្រើន​ផងដែរ​។ ក្នុងពេល​ស្នាក់នៅ​កម្ពុជា លោក​នឹង​ទៅធ្វើ​ទស្សនកិច្ច​នៅ​ខេត្ត​ព្រះសីហនុ ដើម្បី​សិក្សា​អំពី​ហេដ្ឋារចនាសម្ព័ន្ធ​សម្រាប់​ការវិនិយោគ​លើ​វិស័យ​ឧស្សាហកម្ម​ផ្សេងៗ​ដែល​កំពុង​រីកដុះដាល​យ៉ាងខ្លាំង​នៅ​ក្រុងព្រះសីហនុ​។ លោក យ៉ា​ជុន បញ្ជាក់ថា ចិន​នៅតែ​បន្ត​ជំរុញ​ការវិនិយោគ​មកកាន់​ព្រះរាជាណាចក្រ​កម្ពុជា និង​ជំរុញ​ការបើក​ទីផ្សារ​សម្រាប់​កម្ពុជា និង​ជួយ​ដល់​កម្ពុជា​លើ​គ្រប់​វិស័យ​។​

​ខេត្ត​ព្រះសីហនុ

​ជាការ​ឆ្លើយតប សម្ដេច​តេ​ជោ​នាយករដ្ឋមន្ត្រី បាន​ថ្លែងអំណរគុណ​ចំពោះ​ការ​ផ្តាំផ្ញើ​សាកសួរ​សុខទុក្ខ​ពី​ថ្នាក់ដឹកនាំ​កំពូល​របស់​ចិន និង​បាន​យល់ស្រប​ទាំងស្រុង​ចំពោះ​ការលើកឡើង​របស់ លោក វ៉ាង យ៉ា​ជុន ពាក់ព័ន្ធ​ទៅនឹង​ទំនាក់ទំនង​ផង ជាមួយនឹង​សក្តានុពល​ក្នុងការ​ពង្រីក​កិច្ចសហប្រតិបត្តិការ​ផង ជាពិសេស​ឈរលើ​ឯកសារ​ដែល​បាន​ចុះហត្ថលេខា​រួចហើយនោះ ដែលជា​ឯកសារ​ប្រវត្តិសាស្ត្រ​ពាក់ព័ន្ធ​ទៅនឹង​សហគមន៍​មួយ ជោគវាសនា​មួយ ដែល​បាន​ចុះហត្ថលេខា​នៅពេល​កន្លងមក​។ សម្ដេច​តេ​ជោ​បាន​ថ្លែងអំណរគុណ​ចំពោះ​ប្រទេស​ចិន​ជា​មិត្ត​ក្នុង​ការជួយ​ជំរុញ​ការវិនិយោគ​ចិន​អោយបាន​កាន់តែច្រើន​មកកាន់​កម្ពុជា ស្របពេល​នឹង​ការជួយជ្រោមជ្រែង​បើកចំហរ​ទីផ្សារ​កសិផល និង​ផលិតផល​ផ្សេងៗ​ជាច្រើន​ទៀត​របស់​កម្ពុជា​ទៅកាន់​ទីផ្សារ​របស់​ប្រទេស​ចិន​នោះ​៕​