កម្ពុជា មិន​ទទួល​ការជួយ​ជួសជុល​មូល​ដ្ឋាន​កងទ័ពជើងទឹក នៅរាម នាំ​ឲ្យ​អាមេរិក ចោទថា មានមូលដ្ឋានយោធាចិន​

1877

​ភ្នំពេញ​៖ សហរដ្ឋអាមេរិក បានទាមទារ​ឱ្យ​ប្រទេស​កម្ពុជា ពន្យល់​ពី​មូលហេតុ ដែល​ប្រទេស​កម្ពុជា បាន​បដិសេធ​ចំពោះ​សំណើរសុំ ​របស់​ទីក្រុង​វ៉ាស៊ីនតោន ក្នុងការ​ជួយជួសជុល​មូលដ្ឋាន​កងទ័ពជើងទឹក ដែលមាន​ទីតាំង​ស្ថិតនៅ​សមុទ្រ​រាម​។

​សេត​វិមាន កាន់តែ​សង្ស័យ​ខ្លាំង​ថែមទៀត នៅពេលដែល​រដ្ឋាភិបាល​កម្ពុជា បាន​បដិសេធ​ទៅនឹង​សំណើរ មិនទទួលយកការ​ជួយ​ជួសជុល​កន្លែង​ហ្វឹកហ្វឺន នៅ​មូលដ្ឋាន​កងទ័ពជើងទឹក​រាម ពីសហរដ្ឋអាមេរិក ក្រោយតែ​រយៈ​ពេលប៉ុន្មាន​ខែ ​បន្ទាប់ពី​មន្ត្រី​ការពារជាតិរបស់​អាមេរិក បាន​ទៅ​ទស្សនា​នៅក្នុង​តំបន់​នោះ​។

​មូលដ្ឋាន​នេះ គឺ​គ្រប់គ្រង​ដោយ​កងទ័ពជើងទឹក​ក​ម្ពុ​ជា ហើយក៏​ជា​មូលដ្ឋាន​នៃ​ការហ្វឹកហ្វឺន​ប្រចាំឆ្នាំ រវាង​សហរដ្ឋអាមេរិក​និង​កម្ពុជា ចាប់តាំងពី​ឆ្នាំ ២០១០មក​។ មន្ត្រី​មន្ទីរ​បញ្ច​កោណអាមេរិក​ជឿថា ការផ្លាស់ប្តូរ​ឥរិយាបថ​ភ្លាមៗ​របស់​កម្ពុជា អាចជា​សញ្ញា​មួយ​ដែល​កម្ពុជា មាន​គម្រោងទុក​ឲ្យ​ប្រទេស​ចិន​វិញ ខណៈ​ទីក្រុង​ប៉េកាំង កាន់តែ​ពង្រីក​ខ្លួន​ធំ​ឡើង ពាក់ព័ន្ធទៅនឹងជម្លោះនៅ​សមុទ្រ​ចិន​ខាងត្បូង​។​

​មន្ដ្រី​យោធា​អាម៉េរិក​លោក Joseph Felter បាន​ផ្ញើលិខិត​មួយច្បាប់ ទៅ​រដ្ឋមន្ត្រី​ការពារជាតិ​កម្ពុជា លោក ទៀ បាញ់ ទាមទារ​ចម្លើយ​ចំពោះ​ការផ្លាស់ប្តូរ​ឥរិយាបថ​មួយ​នេះ​។​

មន្ដ្រី​យោធា​អាម៉េរិក​លោក Joseph Felter

សារ​លិខិត​នោះបាន​សរសេរថា​៖ “​លិខិត​ជូនដំណឹង​ចុះ​នៅ​ថ្ងៃទី ៦ ខែមិថុនា​ឆ្នាំ ២០១៩ បានទទួល​ដោយ​រដ្ឋាភិបាល​សហរដ្ឋ​អាមេរិក ហើយ​វា​បាន​ជំរុញឱ្យមាន​កា​ប៉ាន់​ស្មានថា ការផ្លាស់ប្តូរ​គោលនយោបាយ​នេះ អាច​បង្ហាញ​ពី​ផែនការ​ធំៗ សម្រាប់​ការផ្លាស់ប្តូរ​នៅ​មូលដ្ឋាន​កងទ័ពជើងទឹក​រាម ជាពិសេស​ពាក់ព័ន្ធ​ទៅនឹង មូលដ្ឋាន​យោធា​របស់​ប្រទេស​ចិន​”​។​

ខ្លឹមសារ​នៃ​លិខិត​នោះបាន​បន្តថា​៖ “​ខ្ញុំ​សូម​ថ្លែងអំណរគុណ​យ៉ាង​ជ្រាលជ្រៅ ចំពោះ​ការពន្យល់​លម្អិត​បន្ថែមទៀតថា ហេតុអ្វី​បានជា​សំណើរ​នៃ​ការជួយជួសជុល ដែល​បុគ្គលិក​របស់​អ្នក​បាន​ស្នើសុំ ប្រែ​ក្លាយទៅជា​មិនចាំបាច់ ក៏ដូចជា​ផែនការ​អនាគត​របស់​អ្នក សម្រាប់​មូលដ្ឋាន​នេះ ​ដែល​ធ្លាប់​ទទួលបាន​មូលនិធិ​ពី​សហរដ្ឋអាមេរិក​”​។​

សម្តេចពិជ័យសេនា ទៀ បាញ់ រដ្ឋមន្ត្រី​ក្រសួងការពារជាតិ​កម្ពុជា​លោក បាន​ប្រាប់​ទៅ​កាសែត​ភ្នំពេញ​ប៉ុស្ដិ៍ថា ​លោក​មិន​យល់​ពី​គម្រោង​របស់​សហរដ្ឋអាមេរិក ហើយ​តើ​អាមេរិក​មាន​បំណង​អ្វី ដែល​ចង់​មកជួយ​ជួសជុល ​អគារ​បញ្ជាការ​សន្តិសុខ​លំហ​សមុទ្រ​នៅ​ទីតាំង​ចាស់​ ហើយកម្ពុជា​ស្វាគមន៍​ បើ​អាមេរិក ចង់​ជួយ​កសាង​អគារ​បញ្ជាការ​សន្តិសុខ​លំហ​សមុទ្រ​រាម​ថ្មី​។​

សម្តេចពិជ័យសេនា ទៀ បាញ់

​សម្តេចពិជ័យសេនា ទៀ បាញ់ បាន​ប្រាប់ទៀតថា លោក​បាន​ជូនដំណឹង និង​ពន្យល់​យ៉ាងច្បាស់​លាស់​ជា​ច្រើនដង​ហើយ​ទៅ​ភាគី​អាមេរិក តែ​អាមេរិក​នៅតែ​មិន​ពេញចិត្ត ហើយ​នៅតែ​ចោទថា កម្ពុជា មាន​ផែនការ​ឲ្យ​ប្រទេស​ចិន សាងសង់​មូលដ្ឋាន​កងទ័ព​ទៅវិញ​។​

​មូលហេតុ​ដែល កម្ពុជា មិន​ទទួលយក​សំណើរ​របស់​ភាគី​អាមេរិក ក្នុងការ​ជួសជុល​មូលដ្ឋាន​កងទ័ពជើងទឹក​ ព្រោះ ទីតាំង​ចាស់ វា​មិនចាំបាច់ ហើយ​មូលដ្ឋាន​ចាស់​នេះ កំពុងតែ​ត្រៀម​រើ​ទៅ​កន្លែង​ផ្សេង​។​

​សម្តេចពិជ័យសេនា ទៀ បាញ់ បញ្ជាក់ថា​៖ “​គេ (​អាមេរិក​) ថា យើង​រើ​ទៅ​ហ្នឹង​ដើម្បី​ទទួល​ទ័ព​ចិន​អី​ណា យើង (​កម្ពុជា​) បាន​ឆ្លើយ​ជា​បន្តបន្ទាប់​ហើយ តែ​គេ (​អាមេរិក​) នៅតែ​មិន​អស់ចិត្ត​ទេ គេ (​អាមេរិក​) នៅតែ​ចិញ្ចឹម​មហិច្ឆតា​របស់គេ (​អាមេរិក​)”​។​

​លោក​រដ្ឋមន្ត្រី​ក្រសួងការពារជាតិ​កម្ពុជា បានប្រកាស​ស្វាគមន៍ ឲ្យ​ភាគី​អាមេរិក​ឬ​អ្នកណា​ក៏ដោយ ចុះមក​ពិនិត្យមើល​បើ​មិន​អស់ចិត្ត ក៏ដូចជា​ការចោទប្រកាន់​របស់​អាមេរិក ចំពោះ​ការធ្វើ​ព្រលានយន្តហោះ និង​ធ្វើ​កំពង់ផែ នៅក្នុង​ខេត្តកោះកុង របស់​ក្រុមហ៊ុន ញូ​ញៀន ថា​ជា​មូលដ្ឋានទ័ព​ចិន​ផងដែរ ដោយ​បិទបាំង​មិន​ឲ្យ​អាមេរិក​ចុះទៅ​មើល​។

សម្តេចពិជ័យសេនា ទៀ បាញ់ បាន​អះអាងថា​៖ “​សូម​អញ្ជើញ​អស់លោក​ទាំងឡាយណា​ចង់ទៅ​មើល ទៅ​ចុះ​”​។​

ការមើលឃើញ​របស់​អា​មេ​រិ​ក បានកើត​ឡើង ដោយសារតែ​ប្រទេស​កម្ពុជា ជា​សម្ព័ន្ធមិត្ត​ជិត​ស្និ​ទ្ធិ​បំផុត​មួយ​របស់​ទីក្រុង​ប៉េកាំង​។ ប្រទេស​កម្ពុជា ទទួលបាន​ជំនួយ​ពី​ប្រទេស​ចិន​រាប់ពាន់​លាន​ដុល្លារ សម្រាប់​កសាង​ហេដ្ឋារចនាសម្ព័ន្ធ​រួមមាន ផ្លូវ ស្ពាន ជាដើម ហើយ​សំខាន់​ជាងនេះទៀត​នោះ គឺ​ការគាំទ្រ​របស់​ទីក្រុង​ប៉េង​កាំ​ង ចំពោះ​នយោបាយ​ដឹកនាំ​របស់​សម្ដេច​តេ​ជោ ហ៊ុន សែន នាយករដ្ឋមន្ត្រី​នៃ​កម្ពុជា​។​

មូលដ្ឋានទ័ព​នៅ​សមុទ្រ​រាម គឺជា​មូលដ្ឋាន​យោធា​ធំ​មួយ​នៅ​កម្ពុជា ស្ថិតនៅ​ជិត​កំពង់ផែ​ក្រុងព្រះសីហនុ ខេត្ត​ព្រះសីហនុ ជា​ខេត្ត​ដែល​ទទួលបាន​ការវិនិយោគ​យ៉ាងខ្លាំងបំផុត​មកពី​ប្រទេស​ចិន​នាពេល​បច្ចុប្បន្ន​៕