សម្តេច​តេ​ជោ ហ៊ុន សែន មិន​បារម្ភ​រឿង​បាត់ EBA ទេ តែ​បារម្ភ​រឿង​ស្ពឹក​ស្រពន់​របស់​មន្ត្រី​ក្នុង​ការធ្វើការងារ​

794

​ជាថ្មី​ម្ដងទៀត សម្តេច​តេ​ជោ ហ៊ុន សែន បាន​ថ្លែងថា ការបាត់បង់ EBA មិនបាន​ធ្វើឱ្យ​កម្ពុជា​ស្លាប់ ហើយ​ការ​មាន EBA ក៏​មិនអាច​ធ្វើឱ្យ​កម្ពុ​ជាមាន​បានដែរ អ្វីដែល​សម្ដេច បារម្ភ​នេះ​គឺ​ភាព​ស្ពឺ​ក​ស្រពន់​របស់​មន្ត្រី ក្នុងការ​អនុវត្ត​ការងារ​ពង្រឹង​លទ្ធភាព​របស់ខ្លួន​។​

​សម្ដេច​តេ​ជោ ហ៊ុន សែន បាន​ថ្លែង​បែបនេះ ក្នុងឱកាស​ដែល​សម្តេច​បាន​អញ្ជើញ​សំណេះសំណាល ជាមួយ​ប្រជាពលរដ្ឋ​ខ្មែរ នៅ​ប្រទេស​ស្វី​ស​ជាង​១២០០​នាក់ នា​យប់​ថ្ងៃទី​០៤ ខែកក្កដា ឆ្នាំ​២០១៩​នេះ​។​

​ប្រព័ន្ធ​អនុគ្រោះ​ពន្ធ អ្វីៗ​ទាំងអស់​លើកលែងតែ​អាវុធ (EBA) នឹង​បាត់បង់​ដោយ​ស្វ័យប្រវត្តិ​នៅពេល ដែល​ប្រទេស​កម្ពុជា ក្លាយជា​ប្រទេស​មាន​ចំណូល​មធ្យម​កម្រិត​ខ្ពស់​។​
​សម្ដេច​តេ​ជោ ហ៊ុន សែន បាន​បន្តថា​៖ “​បើសិនជា​គេ​តម្រូវ​ឲ្យ​យើង​រកស៊ី​បង់ពន្ធ យើង​ក៏​បង់ពន្ធ​ទៅ ហើយ​យើង​មិន​អោនក្បាល​ដាច់ខាត​ហើយ រឿង​លក់​អធិបតេយ្យ ឬ​យក​អធិបតេយ្យ ទៅ​ដូរ​ជាមួយ​អ្នកណា​”​។​

​សម្តេច​តេ​ជោ ហ៊ុន សែន ក៏បាន​លើកឡើង​ផងដែរ​ថា​៖ “​សូម​ធ្វើការ​ពិចារណា​ឱ្យបាន​ដិតដល់​មុននឹង​ដាក់​វិធាន​ការព្យួរ ឬ ដកចេញ​នូវ​ភាពអនុគ្រោះ​ពី​ប្រទេស អភិវឌ្ឍន៍​តិចតួច ព្រោះ​ការព្យួរ ឬ ដកចេញ​នេះ នឹង​ធ្វើឱ្យ​ប្រទេស​ទាំងនោះ មិន​អាចជួយ​ពិភពលោក​ឱ្យសម្រេចបាន​នូវ​គោលដៅ​អភិវឌ្ឍន៍ ប្រកបដោយ​ចីរភាព និង​មិន​អាចជួយ​ពួកគេ​ឱ្យ​ចាក​ចេញពី​ឋានៈ​ជា​ប្រទេស​អភិវឌ្ឍន៍​តិចតួច​បានឡើយ ដែល​ចលនា​នេះ​គឺជា​ដំណើរ​ផ្ទុយ​ទាំងស្រុង​ទៅនឹង​គោលការណ៍ របស់​អង្គការសហប្រជាជាតិ និង អង្គការ​ពាណិជ្ជកម្ម​ពិភពលោក​”​។​

​កាលពី​ខែកុម្ភៈ ឆ្នាំ​២០១៩ កន្លងទៅ សហភាព​អឺរ៉ុប​បានប្រកាស​អំពី​ការចាប់ផ្តើម​ដំណើរការ​នីតិវិធី ដែល​អាច​នាំឱ្យ​មានការ​ផ្អាក​ជា​បណ្តោះអាសន្ន នូវ​ប្រព័ន្ធ​អនុគ្រោះ​ពន្ធ​នេះ ក្រោម​ការចោទប្រកាន់ថា រដ្ឋាភិបាល​កម្ពុជា មិន​គោរព​សិ​ទិ្ធ​មនុស្ស និង​សិទ្ធិ​ការងារ​សំខាន់ៗ និង​ធ្វើ​ឲ្យ​លទ្ធិប្រជាធិបតេយ្យ​ធ្លាក់ចុះ​ធ្ងន់ធ្ងរ​។​

​កម្ពុ​ជាមាន​រយៈពេល​៦​ខែ ក្នុងការ​ជជែក​តវ៉ា និង​លើក​ហេតុផល​ផ្សេងៗ ពន្យល់​ទៅ​គណៈកម្មការ​អឺរ៉ុប​។​ប្រសិនបើ​គណៈកម្មការ​អឺរ៉ុប មិន​ទទួលយក​ការពន្យល់​របស់​កម្ពុជា ហើយ​នៅតែ​សម្រេច​ព្យួរ​ប្រព័ន្ធ​អនុគ្រោះ​ពន្ធ​នេះ​មែន គឺ​ត្រូវ​ប្រើ​រយៈពេល​ចំនួន​១៨​ខែ គិត​ចាប់​ពីថ្ងៃ​ចាប់ផ្តើម (១២ កុម្ភៈ ២០១៩) រហូតដល់​ការចូល​ជា​ធរមាន​។ ពោល​ទំនិញ​របស់​កម្ពុជា​នៅតែ​បន្ត នាំចូល​ទៅកាន់​សហភាព​អឺរ៉ុប ដោយ​មិន​ជាប់ពន្ធ​រយៈពេល​ជាង​១​ឆ្នាំ​ទៀត មុននឹង​មានការ​សម្រេច​ជាថ្មី​។​

​រាជរដ្ឋាភិបាល​កម្ពុជា ចាត់ទុកថា ការសម្រេចចិត្ត​អឺរ៉ុប​នេះ​ជា​រឿង​ភាពអយុត្តិធម៌​បំផុត​។ ទោះជា​យ៉ាងណា រាជរដ្ឋាភិបាល​កម្ពុជា ក៏បាន​ត្រៀមខ្លួន​រួចជាស្រេច ព្រមទាំង​ដាក់ចេញ​នូវ​យន្តការ​ផ្សេងៗ​ទៀត ដើម្បី​ឆ្លើយតប​នឹង​ការដក​ប្រព័ន្ធ​អនុគ្រោះ​ពន្ធ EBA មានដូចជា៖

  • ការកែសម្រួលស្ថាប័នគយ ការដកកាំកុងត្រូលចេញពីតាមច្រក ព្រំដែន និងការលុបចោលនូវភ្នាក់ងារ កម្ពុជានាវាចរ (កាត់ថាកាំសាប) ជាដើម។
  • បន្ថែមលើនេះ ក៏ មានការកាត់បន្ថយការស្កេន (Scan) ទំនិញ តាម ទូកុងតឺន័រដែលត្រូវដឹកចេញ ឬ នាំចូល ជាពិសេស ការនាំចេញផលិតផលសម្លៀកបំពាក់ និង ស្បែក ជើង
  • ការកាត់បន្ថយថ្លៃសេវាលើកដាក់នៅតាមកំពង់ផែ ការដឹកជញ្ជូនតាមផ្លូវទឹក
  • និងការកាត់បន្ថយថ្លៃអគ្គិសនីជាដើម៕​