តើ​អាមេរិក ព្រម​ទេ ដែល ចិន ឲ្យ​លុបចោល​ការដំឡើង​ពន្ធ ទាំងអស់ សម្រាប់​កិច្ចព្រមព្រៀង​នៃ​សង្គ្រាម​ពាណិជ្ជកម្ម​?

773

នៅ​ថ្ងៃទី ៦ ខែកក្កដា ឆ្នាំ​២០១៩ ស្អែក​នេះ គឺជា​ខួប​១​ឆ្នាំ នៃ សង្គ្រាម​ពាណិជ្ជកម្ម អាមេរិក និង​ចិន តែ​ភាគី​ទាំង​២​នៅតែ​មិនទាន់​ឈានដល់​ដំណោះស្រាយ​ល្អ​ទាំងសងខាង​នៅឡើយ ពីព្រោះ​ប្រទេស​ទាំង​២ ចង់បាន​តុល្យភាព​នៃ​ជញ្ជីងពាណិជ្ជកម្ម ដោយ​គ្មាន​ប្រទេស​ណាមួយ អាច​កេងចំណេញ​លើ​ប្រទេស​មួយទៀត​បានឡើយ​។​

ព័ត៌មាន​ចុងក្រោយ​នៃ​សង្គ្រាម​ពាណិជ្ជកម្ម អាមេរិក និង​ចិន គឺ ក្រសួង​ការ​ពាណិជ្ជកម្ម​ចិន កាលពី​ថ្ងៃ​ព្រហស្បតិ៍​ទី​៤​កក្កដា​នេះ បាន​បញ្ជាក់ថា អាមេរិក​ត្រូវតែ​លុបចោល ការដំឡើង​ពន្ធ​នៅ​សេសសល់ លើ​ផលិតផល​ចិន បើសិនជា​អាមេរិក​ចង់​សម្រេចបាន កិច្ចព្រមព្រៀង​ពាណិជ្ជកម្ម​មួយ​រវាង​ភាគី​ទាំងពីរ​។​

​ការលើកឡើង​នេះ គឺ​បាន​ធ្វើឡើង​ក្រោយ​ជំនួប​លោក ប្រធានាធិបតី​អាមេរិក​លោក ដូ​ណា​ល់ ត្រាំ និង​ប្រធានាធិបតី​ចិន​លោក ស៊ី ជិន​ពីង នៅ​ទីក្រុង​អូ​សា​ការ ប្រទេស​ជប៉ុន កាលពី​សប្ដាហ៍​មុន ដោយ​ភាគី​ទាំងពី បាន​យល់ព្រម​ឲ្យ​ចាប់ផ្ដើម​បើក​កិច្ចចរចា​ពាណិជ្ជកម្ម​ឡើងវិញ ក្រោយពី​វា​បាន​ជាប់គាំង​កាលពី​ខែឧសភា​កន្លងទៅ​។​

​លោក ប្រធានាធិបតី​អាមេរិក​លោក ដូ​ណា​ល់ ត្រាំ បានសម្រេច​ចិត្ត​មិន​ដំឡើង​ពន្ធ​លើ​ចិន ដែលមាន​តម្លៃ​ជាង ៣០០​ពាន់​លាន​ដុល្លារ ព្រមទាំង​បន្ធូរបន្ថយ​ការ​រឹតត្បិត​លើ​ក្រុមហ៊ុន​បច្ចេកវិទ្យា​ចិន Huawei ផងដែរ ហើយ​ឲ្យ​ភាគី​ចិន បន្ត​ទិញ​ផលិតផល​អាមេរិក ក្នុង​វិស័យ​ឧស្សាហកម្ម និង​ថាមពល ហើយ​ជាពិសេស​នោះ​គឺ​ផលិតផល​វិស័យ​កសិកម្ម​ឡើងវិញ ដោយសារតែ​អាមេរិក​បានទទួល​រង​ការប៉ះពាល់​ជាខ្លាំង​។​

​ប្រធានាធិបតី​អាមេរិក​លោក ដូ​ណា​ល់ ត្រាំ នា​ថ្ងៃ​ចន្ទ​សប្តាហ៍​នេះ បាន​ថ្លែងថា លោក​ចង់បាន​កិច្ចព្រមព្រៀង​ដែល​ពុំ​អាច​ស្មើគ្នា​ឡើយ គឺ​ត្រូវតែ​ល្អៀង​មក​ខាង​សហរដ្ឋអាមេរិក ដោយ​លោក​និយាយថា ចិន​បាន​កេងចំណេញ​លើ​សហរដ្ឋអាមេរិក ក្នុង​វិស័យ​ពាណិជ្ជកម្ម​ជា​យូរ​ឆ្នាំ​មកហើយ ដូច្នេះ​យោងតាម​ភាពជាក់ស្តែង​ប្រទេស​ទាំងពីរ មិនអាច​សម្រេច​កិច្ចព្រមព្រៀង ដែល​ស្មើភាព​ទាំងស្រុង​លក្ខណៈ ៥០ ទល់នឹង ៥០ បាន​នោះទេ​។​

​លោក ប្រធានាធិបតី​អាមេរិក​លោក ដូ​ណា​ល់ ត្រាំ ធ្លាប់បាន​លើកឡើងថា “​វា​នឹង​ក្លាយជា​ប្រវត្តិសាស្ត្រ បើសិនជា​យើង​អាច​សម្រេចចិត្ត​កិច្ចព្រមព្រៀង ពាណិជ្ជកម្ម​ប្រកបដោយ​ភាពយុត្តិធម៌​”​។​

​ចំណែក​លោក ស៊ី ជិន​ពីង វិញ​បាន​អះអាង​ដែរ​ថា កិច្ចសន្ទនា​គឺ​វា​ប្រសើរ​ជាង​ការប្រឈមមុខ​ដាក់គ្នា ហើយ​ផលប្រយោជន៍​រវាង​ប្រទេស​ទាំងពីរ គឺ​បានមក​ដោយសារ​កិច្ចសហប្រតិបត្តិការ​។​

​គួរ​រំ​ម្លឹ​ក​ផងដែរ​ថា​ឧបនាយករដ្ឋមន្ត្រី​ចិន លោក លីវ ហេ (Liu He) មេដឹកនាំ​ក្រុម​ចរចា​របស់​ចិន បាន​ធ្លាប់​ប្រាប់ថា ទីក្រុង​វ៉ាស៊ីនតោន បាន​បដិសេធ លុបចោល​ពន្ធគយ​ទាំងអស់ និង​ការទាមទារ​ដ៏​វែងឆ្ងាយ ដែលជា​មូលហេតុ នាំ​ឲ្យ​ការចរចា ត្រូវ​ជាប់គាំង​កាលពី​ខែឧសភា​កន្លងទៅ​។​

​ចុះបើ​ទីក្រុង​វ៉ាស៊ីនតោន នៅតែ​ប្រកាន់​ជំហរ​នេះ ហើយ​ទីក្រុង​ប៉េកាំង ក៏​មិន​ចុះ​ញ​ម វិញ​នោះ​?​ ​តើ​អាមេរិក ព្រម​ដាក់ខ្លួន ស្របតាម​ការចង់បាន​របស់​ប្រទេស​ចិន​ទេ​?