Huawei ថា ការផ្ដល់ឲ្យ របស់​អាមេរិក ពុំមាន​ឥទ្ធិពល​អ្វី​ធំដុំ​ឡើយ ខ្លួន​នៅតែ​បន្ត​នូវ​អ្វីៗ ដើម្បី​រស់​ដោយ​ខ្លួនឯង​

717

លោក រិ​ន ចេង​ហ្វ៊ៃ (Ren Zhengfei) បាន​ប្រាប់​ទៅ សារព័ត៌មាន Financial Times ថា ការបន្ធូរបន្ថយ​បម្រាម​ពាណិជ្ជកម្ម​ចំពោះ Huawei ដោយ​លោក​ប្រធានាធិបតី​អាមេរិក ដូ​ណា​ល់ ត្រាំ ពុំមាន​ឥទ្ធិពល​អ្វី​ធំដុំ​ឡើយ ព្រោះ Huawei បាន​សម្រប​ខ្លួន​ក្នុង​បរិបទ​សម័យកាល​ថ្មី ចង់​មាន​ភាព​ឯករាជ្យ និង​មិន​ចង់​ស្ថិតនៅក្រោម​ការកៀបសង្កត់​របស់​អាមេរិក ដែលមាន​ច​រិ​ក​ចង់តែ​បង្កបញ្ហា​នោះទេ​។​

​លោក លោក រិ​ន ចេង​ហ្វ៊ៃ ស្ថាបនិក​ក្រុមហ៊ុន​បច្ចេកវិទ្យា Huawei បាន​លើកឡើងថា​៖ “​ការសម្រេចចិត្ត​របស់​លោក ត្រាំ គឺ​ល្អ​សម្រាប់​ក្រុមហ៊ុន​អាមេរិក ហើយ​ក្រុមហ៊ុន Huawei ក៏ នៅតែ​ចង់​បន្ត​ទិញ​ផលិតផល​បច្ចេកវិទ្យា​ពី​ក្រុមហ៊ុន​អាមេរិក​ដែរ​។ ប៉ុន្តែ​យើង​មើលមិនឃើញ​ថា វា​មាន​ឥទ្ធិពល​ធំដុំ​ប៉ុន្មាន​ឡើយ​មកលើ​អ្វីដែល​ពួកយើង​កំពុង​ធ្វើ ហើយ​យើង​នឹង​បន្ត​ផ្តោត​សំខាន់ លើ​ការធ្វើការងារ​របស់ខ្លួន​ឲ្យ​កាន់តែ​ល្អ និង​ត្រឹមត្រូវ​”​។​

លោក រិ​ន ចេង​ហ្វ៊ៃ (Ren Zhengfei)

​នៅក្នុង​ដំណាក់​ក្ដៅ ក្រោម​សម្ពាធ​របស់​អាមេរិក លោក លោក រិ​ន ចេង​ហ្វ៊ៃ បាន​លើកឡើងថា អាមេរិក​បាន​ជួយ ក្រុមហ៊ុន Huawei តាមរយៈ​ការបង្ក​ផល​លំបាក ព្រោះ​នៅក្រោម​សម្ពាធ​ដ៏​ខ្លាំង​របស់​អាមេរិក ក្រុមហ៊ុន Huawei កាន់​តែមាន​ភាពរឹងមាំ​ខ្លាំងក្លា​ទៅវិញ ទោះ​ត្រូវ​ឆ្លងកាត់​ឧបសគ្គ​មួយចំនួន​ក្តី ថមថយ​ការលក់​នៅក្នុង​ប្រទេសមួយ​ចំនួន​ក្ដី​។​

​គួរ​រំ​ម្លឹ​ក​ផងដែរ​ថា រដ្ឋាភិបាល​អាមេរិក​បានចាប់ផ្តើម​បើកចំហ​ឲ្យ​ក្រុមហ៊ុន​អាមេរិក ដាក់ពាក្យ​ស្នើសុំ​អាជ្ញាប័ណ្ណ​សម្រាប់​ការលក់​ផលិតផល​បច្ចេកវិទ្យា​ទូទៅ ដែល​មិន​ប៉ះពាល់​ដល់​បញ្ហា​សន្តិសុខ​ជាតិ​ទៅ​ឲ្យ​ក្រុមហ៊ុន Huawei បន្ទាប់ពី​លោក ដូ​ណា​ល់ ត្រាំ បាន​ជួប​ជាមួយ​ប្រធានាធិបតី​ចិន ស៊ីន ជិន​ពីង នៅ​ទីក្រុង​អូ​សា​កា ប្រទេស​ជប៉ុន កាលពី​ថ្ងៃ​សៅរ៍​សប្តាហ៍​មុន នៅក្នុង​ជំនួប​ដាច់ដោយឡែក នៃ​កំឡុង​កិច្ចប្រជុំ​កំពូល G20 ដើម្បី​ស្វែងរក​ដំណោះស្រាយ សង្គ្រាម​ពាណិជ្ជកម្ម​រវាង​ប្រទេស​ទាំង​២​។​

​ទោះជា​យ៉ាងណាក៏ដោយ នេះ​មិនមែន​មានន័យថា ក្រុមហ៊ុន Huawei ត្រូវបាន​លុបចេញ​ពី​បញ្ជីខ្មៅ​នោះទេ​។ ការ​បើ​ទូលាយ​បន្តិច​របស់​អាមេរិក គឺជា​ការដោះដូរ​ជាមួយនឹង​ការដែល ឲ្យ​ប្រទេស​ចិន បន្ត​ទិញ​ផលិតផល​អាមេរិក ក្នុង​វិស័យ​ឧស្សាហកម្ម និង​ថាមពល ហើយ​ជាពិសេស​នោះ​គឺ​ផលិតផល​វិស័យ​កសិកម្ម​ឡើងវិញ ដោយសារតែ​អាមេរិក​បានទទួល​រង​ការប៉ះពាល់​ជាខ្លាំង​៕ ​