ផ្លូវបេតុង ប្រវែង ៧០គីឡូម៉ែត្រ នឹង​ត្រូវចាប់ផ្តើម​សាងសង់​នៅ​តំបន់​អភិវឌ្ឍន៍​កោះរ៉ុង ដោយ​ចំណាយ​ថវិកា ៣៥លានដុល្លារ

39

ព្រះសីហនុ៖ ក្រុមហ៊ុន Royal Group Koh Rong Development Company របស់អ្នកឧកញ៉ា គិត ម៉េង នៅព្រឹកថ្ងៃទី១៤ ខែកក្កដា ឆ្នាំ២០២០នេះ បានចុះហត្ថលេខាលើកិច្ចព្រមព្រៀងសាងសង់ផ្លូវបេតុងអាមេកម្រាស់២.៥ដេស៊ីម៉ែត្រ ប្រវែង៧០គីឡូម៉ែត្រ ទទឹង៨ម៉ែត្រ នៅលើតំបន់អភិវឌ្ឍន៍កោះរ៉ុង ក្រុងកោះរ៉ុង ខេត្តព្រះសីហនុ ជាមួយក្រុមហ៊ុន Sinohydro Corporation Limited ។

ពិធីចុះហត្ថលេខានេះ បានធ្វើឡើងនៅសណ្ឋាគារ Goddess of Liberty Hotel & Resort ក្នុងខេត្តព្រះសីហនុ ក្រោមអធិបតីភាពលោក គួច ចំរើន អភិបាលខេត្តព្រះសីហនុ, លោក ជា វុទ្ធី អគ្គលេខាធិការរងក្រុមប្រឹក្សាអភិវឌ្ឍន៍កម្ពុជា តំណាងរបស់លោក សុខចិន្តា សោភា រដ្ឋមន្ត្រីប្រតិភូអមនាយករដ្ឋមន្ត្រី និងជាអគ្គលេខាធិការក្រុមប្រឹក្សាអភិវឌ្ឍន៍កម្ពុជា និងមានការចូលរួមពីអភិបាលរងខេត្ត អភិបាលក្រុង ប្រធានមន្ទីរស្ថាប័ន ពាក់ព័ន្ធ ព្រមទាំងមន្ត្រីសាលាខេត្តព្រះសីហនុជាច្រើនរូបទៀត។

យោងតាមកិច្ចព្រមព្រៀង គម្រោងសាងសង់ផ្លូវបេតុង នៅលើតំបន់អភិវឌ្ឍន៍កោះរ៉ុងនេះ នឹងត្រូវចំណាយថវិកាចំនួន ៣៥លានដុល្លារអាមេរិក ដែលនឹងត្រូវបញ្ចប់ការសាងសង់ក្នុងរយៈពេល១៦ខែ ស្របតាមផែនការមេអភិវឌ្ឍន៍ហេដ្ឋារចនាសម្ព័ន្ធ ដែលគណៈកម្មការអន្តរក្រសួងរបស់ក្រុមប្រឹក្សាអភិវឌ្ឍន៍កម្ពុជា បានអនុម័តកាលពីថ្ងៃទី០៩ ខែតុលា ឆ្នាំ២០១០។

ថ្លែងក្នុងឱកាសនោះ លោក គួច ចំរើន បានកោតសរសើរ និងវាយតម្លៃខ្ពស់ចំពោះអ្នកឧកញ៉ា គិត ម៉េង និងក្រុមហ៊ុន Sinohydro Corporation Limited ដែលបានរួមគ្នាសាងសង់នូវផ្លូវបេតុងប្រវែង៧០គីឡូម៉ែត្រនេះ។ លោកអភិបាលខេត្ត បន្តថា ផ្លូវនេះ នឹងផ្តល់ភាពងាយស្រួលក្នុងការធ្វើដំណើររបស់ប្រជាពលរដ្ឋផង និងភ្ញៀវទេសចរ ដែលមកម្សាន្តនៅកោះរ៉ុងផងដែរ។

ដោយឡែក លោក ជា វុទ្ធី អគ្គលេខាធិការរងក្រុមប្រឹក្សាអភិវឌ្ឍន៍កម្ពុជា បានបង្ហញនូវក្ដីសង្ឃឹមថា ទន្ទឹមនឹងការសាងសង់ផ្លូវបេតុង៧០គីឡូម៉ែត្រនេះ អ្នកឧកញ៉ា គិត ម៉េង នឹងខិតខំចាប់ផ្តើមអភិវឌ្ឍន៍គម្រោងផ្សេងៗទៀត ដើម្បីប្រែក្លាយកោះរ៉ុង ទៅជាទីក្រុងមួយដ៏ស្រស់បំព្រង មានផាសុកភាពល្អ តាមបែបធម្មជាតិ នៃឆ្នេរខ្សាច់ និងព្រៃប្រឹក្សានៅទីនោះ សំដៅទាក់ទាញ ឱ្យកាន់តែច្រើនឡើងនូវភ្ញៀវទេសចរជាតិ និងអន្តរជាតិមកទស្សនា និងលំហែកាយនៅកោះរ៉ុង។

នៅក្នុងឱកាសនេះ អ្នកឧកញ៉ា គិត ម៉េង អគ្គនាយកក្រុមហ៊ុន Royal Group Koh Rong Development Company បានថ្លែងអំណរគុណដល់ស្ថាប័នពាក់ព័ន្ធទាំងអស់ ដែលបានចូលរួមចំណែកក្នុងការជម្រុញឱ្យការស្ថាបនាផ្លូវនៅលើតំបន់អភិវឌ្ឍន៍កោះរ៉ុងនេះ បានកើតឡើង។

អ្នកឧកញ៉ា គិត ម៉េង មានប្រសាសន៍ថា នៅខណៈនេះ ក្រុមហ៊ុន បានចាប់ផ្តើមសាងសង់ផ្លូវបេតុង ៧០គីឡូម៉ែត្រ ហើយតទៅមុខទៀតក្រុមហ៊ុន នឹងត្រូវសាងសង់រោងចក្រអគ្គិសនី កំពង់ផែ និងព្រលានយន្តហោះ នៅលើតំបន់អភិវឌ្ឍន៍កោះរ៉ុងបន្ថែមទៀត។

សូមបញ្ជាក់ថា ក្រុមហ៊ុន រ៉ូយ៉ាល់ គ្រុប បានចុះហត្ថលេខាជួលកោះរ៉ុង ស្ថិតក្នុងខេត្តព្រះសីហនុ ជាមួយក្រុមប្រឹក្សាអភិវឌ្ឍន៍កម្ពុជា ដែលជាភាគីតំណាងឱ្យ រាជរដ្ឋាភិបាលកម្ពុជា នៅថ្ងៃទី២៨ ខែកុម្ភៈ ឆ្នាំ២០០៨ ដើម្បីអភិវឌ្ឍជាតំបន់អភិវឌ្ឍន៍ ពាណិជ្ជកម្ម និងរមណីយដ្ឋានទេសចរធម្មជាតិ៕