ភ្នំពេញ៖ លោកស្រី Miwako Fujiwara ដែលជាតន្ត្រីករជនជាតិជប៉ុន បានផ្តួចផ្តើមរៀបចំឲ្យមានការប្រគុំតន្ត្រីសប្បុរសធម៌មួយ ដើម្បីប្រមូលថវិការជួយដល់ កុមារមានពិការភាព នៅកម្ពុជា នៅថ្ងៃអាទិត្យទី២ ខែមិថុនា ឆ្នាំ២០១៩ ខាងមុខនេះ នៅសណ្ឋាគារ សូហ្វីតែលភ្នំពេញភូគីត្រា ចាប់ពីម៉ោង ៦ល្ងាច តទៅ។
![](https://www.cambodianews.today/wp-content/uploads/2019/05/Musica-Felice-5.jpg)
ក្រុមតន្ត្រី ‘Musica Felice’ ដែលប្រែជាភាសាខ្មែរថា ‘ចម្រៀងសប្បាយរីករាយ’ មានតន្ត្រីករ ចំនួន២៥ នាក់ ដឹកនាំដោយលោកស្រី Miwako Fujiwara បានរៀបចំការប្រគុំតន្ត្រីសប្បុរសធម៌នេះ អស់រយៈពេល ៤ឆ្នាំមកហើយ ហើយនៅឆ្នាំនេះ គឺជាលើកទី ៥ ដោយមានគោលបំណង មិនខុសពីឆ្នាំកន្លងទៅនោះឡើយ គឺដើម្បីប្រមូលថវិការ ដែលបានមកពីការលក់សំបុត្រ ចូលទស្សនាទាំងអស់ បរិច្ចាគទៅសាលាតន្ត្រី Khrousar និងអង្គការ Light of Mercy Home។
![](https://www.cambodianews.today/wp-content/uploads/2019/05/Musica-Felice-4.jpg)
តាមរយៈសកម្មភាពសប្បុរសធម៌នេះ អ្នករៀបចំកម្មវិធីរំពឹងថា នឹងអាចជួយឲ្យ កុមារមានពិការភាព នៅកម្ពុជា ជាច្រើននាក់បន្ថែមទៀត ដើម្បីទទួលបាននូវទីកន្លែងស្នាក់នៅសមរម្យ ឬមជ្ឈមណ្ឌល សម្រាប់ពួកគេអាចទទួលបានការបណ្ដុះបណ្ដាល និងរស់នៅជាមួយកុមារដទៃទៀត ដែលមានបញ្ហាប្រឈមស្រដៀងគ្នា។
![](https://www.cambodianews.today/wp-content/uploads/2019/05/Musica-Felice-3.jpg)
បើយោងតាមអ្នករៀបចំកម្មវិធី បានឲ្យដឹងថា ក្រុមតន្ត្រី ‘Musica Felice’ នឹងប្រគុំជូននូវបទភ្លេងល្បីៗ ដូចជាបទ Canon ដែលនិពន្ធដោយលោក Pachelbel និងបទភ្លេងល្បីៗមួយចំនួនទៀត របស់លោក Mozart ក៏នឹងត្រូវប្រគុំនៅក្នុងរាត្រីនោះផងដែរ។
លើសពីនេះទៅទៀត នៅពាក់កណ្តាលវគ្គទី២ នៃកម្មវិធី អ្នកចូលរួម នឹងបានលំហែអារម្មណ៍ជាមួយបទភ្លេងពិរោះៗ ដែលត្រូវបានគេប្រើប្រាស់ក្នុងរឿងល្បីៗ ក៏ដូចជាបទភ្លេងដែលនិពន្ធផ្ទាល់ ដោយលោក សាយ តុលា ដែលនឹងសម្តែងរួមគ្នាជាមួយក្រុមកុមារ មកពីអង្គការ Light of Mercy Home។
![](https://www.cambodianews.today/wp-content/uploads/2019/05/Musica-Felice-2.jpg)
មួយវិញទៀត ទស្សនីយភាពល្អគ្មានពីរ នៃការប្រគុំបទភ្លេងជាក្រុម ដោយប្រើប្រាស់ឧបករណ៍ភ្លេងប្រពៃណីបុរាណខ្មែរ រួមជាមួយឧបករណ៍ភ្លេងសម័យ ដែលអ្នកពិតជាមិនធ្លាប់បានស្ដាប់ពីមុនមក នឹងធ្វើឲ្យអ្នកចូលរួមទាំងអស់ មានការភ្ញាក់ផ្អើលជាក់ជាមិនខានឡើយ។
![](https://www.cambodianews.today/wp-content/uploads/2019/05/Musica-Felice-1.jpg)
លោកស្រី Miwako Fujiwara បានលើកឡើងថា៖ “ទេពកោសល្យរបស់តន្ត្រីករនៅកម្ពុជា តែងតែធ្វើឲ្យខ្ញុំមានភាពស្ញប់ស្ញែងខ្លាំងបំផុត។ ខ្ញុំពិតជាសប្បាយរីករាយជាពន់ពេក ក្នុងការសម្តែងជាថ្មីម្តងទៀតជាមួយក្រុមតន្ត្រីករ Musica Felice ក្នុងកម្មវីធីដ៏សំខាន់មួយនេះ។ ខ្ញុំក៏ធ្លាប់បានធ្វើការជាមួយកុមារមកពី Light of Mercy Home អស់រយៈពេលជាច្រើនឆ្នាំមកហើយដែរ ពួកគេគឺជាក្មេងល្អខ្លាំងណាស់”។
ការប្រគុំតន្ត្រីសប្បុរសធម៌នេះ ទទួលបានការផ្ដល់ទីតាំងជូនដោយ សណ្ឋាគារសូហ្វីតែលភ្នំពេញភូគីត្រា ដែលតែងតែគាំទ្រសិល្បៈយ៉ាងខ្លាំង នៅក្នុងព្រះរាជាណាចក្រកម្ពុជា។
![](https://www.cambodianews.today/wp-content/uploads/2019/05/Musica-Felice-6.jpg)
លោក Charles-Henri Chevet អ្នកចាត់ការទូទៅនៃ សណ្ឋាគារសូហ្វីតែលភ្នំពេញភូគីត្រា បានប្រាប់ឲ្យដឹងថា៖ “ការប្រគុំតន្ត្រីនេះ គឺជាឱកាសដ៏ល្អមួយដើម្បីចែករំលែកតន្ត្រី ជាមួយប្រជាពលរដ្ឋនៅរាជធានីភ្នំពេញ ដ៏ដូចជាជម្រុញឲ្យប្រជាពលរដ្ឋ ចូលរួមចំណែកជួយបរិច្ចាកថវិការ ដើម្បីផ្តល់ក្តីសង្ឃឹមថ្មីមួយ ដល់កុមារកម្ពុជា ដែលកំពុងមានបញ្ហាលំបាក។”
ការប្រគុំតន្ត្រីសប្បុរសធម៌នេះ នឹងប្រព្រឹត្តទៅនៅថ្ងៃអាទិត្យទី២ ខែមិថុនា ចាប់ពីម៉ោង ៦ ល្ងាច នៅសណ្ឋាគារ សូហ្វីតែលភ្នំពេញភូគីត្រា។ សំបុត្រចូលទស្សនា ដែលនឹងត្រូវបរិច្ចាកទាំងស្រុងនោះ មានតម្លៃ ១០ ដុល្លារសម្រាប់មនុស្សធំ និង ៥ ដុល្លារសម្រាប់កុមារអាយុក្រោម ១២ ឆ្នាំ ហើយសំបុត្រ កំពុងត្រូវបានដាក់លក់នៅសណ្ឋាគារ សូហ្វីតែលភ្នំពេញភូគីត្រា និងនៅហាងកាហ្វេ Socials ស្ថិតនៅតាមបណ្ដោយមហាវិថីព្រះនរោត្តម៕