ស្ថាបនិក Huawei មិន​គាំទ្រ​ការយក​ក្រុមហ៊ុន Apple ជា​ឧបករណ៍ ដើម្បី​សងសឹក​សហរដ្ឋអាមេរិក​វិញទេ

467

ប៉េកាំង ​(Bloomberg)៖ លោក រិ​ន ចេង​ហ្វី (Ren Zhengfei) ដែលជា​ស្ថាបនិក និង​ជានា​យក​ប្រតិបត្តិ​ក្រុមហ៊ុន​បច្ចេកវិទ្យា Huawei Technologies របស់​ចិន បាន​លើកឡើងថា ប្រទេស​ចិន ទំនង​នឹងមិន​ចាត់វិធានការ ទៅលើ​ក្រុមហ៊ុន​បច្ចេកវិទ្យា Apple Inc របស់ស​ហរដ្ឋអាមេរិក ដើម្បី​ជាការ​សងសឹក​ចំពោះ​អ្វីដែល​សហរដ្ឋអាមេរិក បានធ្វើ​មកលើ​ក្រុមហ៊ុន Huawei កន្លងមក​នោះឡើយ ហើយ​បើទោះជា​ប្រទេស​ចិន ចេញ​ចំណាត់ការ​បែបនេះ​ក្តី ក៏​លោក រិ​ន ចេង​ហ្វី (Ren Zhengfei) នឹងមិន​គាំទ្រ​ចំពោះ​ការធ្វើ​បែបនេះដែរ​។​

ការលើកឡើង​នេះ បាន​ធ្វើឡើង​នៅក្នុង​កិច្ចសម្ភាសន៍​មួយ​ជាមួយ Bloomberg ចំពោះ​សំនួរ​ដែល បាន​ចោទសួរ​ទៅ​លោក រិ​ន ចេង​ហ្វី (Ren Zhengfei) ថា តើ​រដ្ឋាភិបាល​ចិន គួរតែ​ធ្វើតាម​ប្រជាជន ដែល​បាន​ប្រកូក​ប្រកាស ឲ្យ​មាន​វិធានការ​ប្រឆាំងនឹង​ក្រុមហ៊ុន Apple ដែលជា​អ្នក​ផលិត​ស្មា​ត​ហ្វូ​ន iPhone ដ៏​ល្បី​នៅលើ​ពិភពលោក ដែរឬទេ​។​

លោក រិ​ន ចេង​ហ្វី (Ren Zhengfei) បាន​និយាយថា​៖ “​ការសង​សឹក​ពី​រដ្ឋាភិបាល​ចិន ទៅលើ​ក្រុមហ៊ុន Apple ប្រហែលជា​នឹងមិន​អាច​កើតឡើង​ឡើយ ប្រសិនបើ​វា​កើតឡើង​មែន​នោះ ខ្ញុំ​នឹង​ចេញមុខ​ប្រឆាំង​មុនគេ​។ Apple គឺ​ប្រៀបដូចជា​គ្រូ​របស់ខ្ញុំ ដូច្នេះហើយ​ក្នុងនាម​ជា​កូនសិស្ស តើ​ហេតុអ្វី​បានជា​ខ្ញុំ ត្រូវ​ទៅ​ប្រឆាំងនឹង​គ្រូ​របស់ខ្ញុំ គឺ​ខ្ញុំ​នឹង​គ្មាន​ថ្ងៃ​ធ្វើ​យ៉ាង​ដូច្នោះ​ឡើយ​”​។​

​សម្រាប់​សំណួរ​ដែល​បាន​លើកឡើងថា ក្រុមហ៊ុន Huawei អាច​រីកចម្រើន​បាន​ដូច​សព្វថ្ងៃនេះ គឺ​ដោយសារតែ​ការ​លួច​បច្ចេកវិទ្យា​ពី​សហរដ្ឋអាមេរិក ត្រូវបាន​លោក រិ​ន ចេង​ហ្វី (Ren Zhengfei) បកស្រាយ​បែប​ចាក់​ដោត​វិញ​ថា “​បើ​មើល​ទៅលើ​បច្ចេកវិទ្យា 5G គឺ​សហរដ្ឋអាមេរិក មិនទាន់​អភិវឌ្ឍន៍​បាន​នោះទេ តើ​ឲ្យ​ក្រុមហ៊ុន​ខ្ញុំ ទៅ​លួច​បច្ចេកវិទ្យា​នោះ​មកពីណា ខណៈដែល​ក្រុមហ៊ុន Huawei បាន​នឹង​កំពុងតែ​នាំមុខគេ​ទៅហើយនោះ និយាយ​រួម​ទៅ បើ​យើង​ដើរ​ក្រោយ​សហរដ្ឋអាមេរិក​វិញ​នោះ លោក ដូ​ណា​ល់ ត្រាំ ប្រហែលជា​មិន​មករ​វល់​ខំប្រឹង តាម​រុក​គួ​ន​ពួកយើង​បែបនេះ​ឡើយ​”​។​

​ពាក់ព័ន្ធ​នឹង​ការថយចុះ​នៃ​ចំនួន​ក្រុមហ៊ុន​ផ្គត់ផ្គង់​គ្រឿងបន្លាស់ និង Software ពី​អាមេរិក លោក រិ​ន ចេង​ហ្វី (Ren Zhengfei) បាន​បញ្ជាក់ថា​៖ “​សហរដ្ឋអាមេរិក អាច​គ្រប់គ្រង និង​ហាមប្រាម​ក្រុមហ៊ុន​របស់គេ ប៉ុន្តែ​សហរដ្ឋអាមេរិក គឺ​មិនមែនជា គោលការណ៍​អន្តរជាតិ ឡើយ គឺ​សហរដ្ឋអាមេរិក មិនអាច​គ្រប់គ្រង​ពិភពលោក ទាំងមូល​បាន​នោះទេ​។ ហេតុនេះ ប្រទេស​ដទៃទៀត​នៅ​ជុំវិញ​ពិភពលោក អាច​សម្រេច​ថា​គួរ​ឬ​មិនគួរ​រកស៊ី​ជាមួយ​យើង (​ក្រុមហ៊ុន Huawei) ដោយ អាស្រ័យ​លើ​ផលប្រយោជន៍​ពាណិជ្ជកម្ម និង​គោលជំហរ​របស់​ពួកគេ​”​។

​លោក រិ​ន ចេង​ហ្វី (Ren Zhengfei) បាន​បន្ថែមថា​៖ “​បើ​អាមេរិក​នៅតែ​បន្ត​ដាក់​កំហិត​លើ​យើង (​ក្រុមហ៊ុន Huawei) យើង​នឹង​បន្ថយ​ការទិញ​ផលិតផល​ពី​សហរដ្ឋអាមេរិក ហើយ​ប្រើប្រាស់​របស់ខ្លួន​ឯង​តែ​កាន់តែច្រើន​”​។​

​លោក រិ​ន ចេង​ហ្វី (Ren Zhengfei) បាន​និយាយថា មិនចាំបាច់​មាន​កិច្ចចរចា​ជុំវិញ​បញ្ហា​របស់​ក្រុមហ៊ុន Huawei ព្រោះ​សហរដ្ឋអាមេរិក​មិនដែល​ទិញ​ផលិតផល​ពី ក្រុមហ៊ុន Huawei នោះទេ ហើយ​ប្រសិនបើ​នៅពេល​អនាគត​សហរដ្ឋអាមេរិក​ចង់​ទិញ​ក៏ដោយ ក៏​លោក​ប្រហែលជា​អាច​មិន​លក់​ឲ្យ​ឡើយ​។​

​សូមបញ្ជាក់ថា លោក ដូ​ណា​ល់ ត្រាំ ចង់​បញ្ចូល​បញ្ហា​របស់​ក្រុមហ៊ុន Huawei ទៅក្នុង​កិច្ចចរចា​នៃ សង្គ្រាម​ពាណិជ្ជកម្ម រវាង​ចិន​និង​អាមេរិក ដែល​កំពុង​ជាប់គាំង​៕