មន្ត្រី​ពុករលួយ នឹងត្រូវ​ទទួលទោស​តាមច្បាប់, ដកហូត​បុណ្យស័ក្តិ និង​ទ្រព្យសម្បត្តិ​

904

​ភ្នំពេញ​៖ ដើម្បី​កម្ចាត់​អំពើពុករលួយ​ចំពោះ​មន្ត្រីរាជការ និង​កងកម្លាំង​ប្រាប់​អាវុធ គ្រប់លំដាប់​ថ្នាក់​, ការ​កឹ​ប​កេង​ទ្រព្យសម្បត្តិ​រដ្ឋ​, កាប់បំផ្លាញ​ព្រៃឈើ​, ការរំលោភ​យក​ដី​រដ្ឋ ធ្វើជា​ទ្រព្យសម្បត្តិ​ផ្ទាល់ខ្លួន សម្តេច​តេ​ជោ ហ៊ុន សែន នាយករដ្ឋមន្ត្រី​នៃ​កម្ពុជា នឹង​ប្រើប្រាស់ អភិក្រម​ទី​៥ គឺ​អភិក្រម «​វះកាត់​» ដោយ​ត្រូវ​ដកហូត​បុណ្យស័ក្តិ ទ្រព្យសម្បត្តិ និង​ទទួលទោស​តាមច្បាប់​។​

​សម្តេច​តេ​ជោ ហ៊ុន សែន បានដាក់​ចេញ​គោលជំហរ​ម៉ឹងម៉ាត់ ដើម្បី​កម្ចាត់​អំពើពុករលួយ ចំពោះ​មន្ត្រីរាជការ និង​កងកម្លាំង​ប្រាប់​អាវុធ នៅក្នុង​កិច្ចប្រជុំ​គណៈរដ្ឋមន្ត្រី កាល​ថ្ងៃទី​០២ ខែសីហា ឆ្នាំ​២០១៩ កន្លងទៅនេះ​។​

​ការ​ដាស់តឿន រំលឹក របស់​សម្តេច​តេ​ជោ ហ៊ុន សែន ជា​លើក​ទី​២ នេះ ត្រូវបាន​ធ្វើឡើង​បន្ទាប់ពី​សម្ដេច​បានប្រកាស​លើក​ទី​១ ក្នុងពេល​ចុះ​ពិនិត្យ​ការដ្ឋាន​សំណង់ ពហុ​កីឡដ្ឋាន​ជាតិ​មរតក​តេ​ជោ ដោយបាន​ប្រកាស​ឲ្យ​មន្ត្រី​អង្គភាព​ប្រឆាំង​អំពើពុករលួយ ចុះ​ធ្វើ​សកម្មភាព​ដោយផ្ទាល់​តែម្តង ចំពោះ​មន្ត្រី​ប្រព្រឹត្ត​អំពើពុករលួយ ដោយ​គ្មាន​ការយោគយល់ អនុគ្រោះ ឬ​ទទួល​ការអន្តរាគមន៍​អ្វី​ឡើយ​។​

​គួរ​រំ​ម្លឹ​ក​ផងដែរ​ថា មន្ត្រី​ជាច្រើនរូប ត្រូវបាន​ដកហូត​តំណែង និង​ចាប់ខ្លួន ព្រោះតែ​បាន​ប្រព្រឹត្ត​អំពើពុករលួយ តួយ៉ាង​នាពេល​ថ្មីៗ​នេះ ប្រធាន អនុប្រធាន និង​មន្ត្រី​នៅ​មន្ទីរ​សុរិយោដី​ខេត្តពោធិ៍សាត់​សរុប ៣​រូប ត្រូវបាន​អង្គភាព​ប្រឆាំង​អំពើពុករលួយ​ចាប់ខ្លួន បន្ទាប់ពី​ពួកគេ​បាន​ឃុបឃិត​គ្នា ជម្រិត​ទារលុយ​ពី​អ្នកវិនិយោគ​ប្រមាណ ១០​ម៉ឺន​ដុល្លារ ជា​ថ្នូរ​អនុញ្ញាតឱ្យ​សាងសង់​រោងចក្រ​។ រហូតមកដល់​ពេលនេះ មន្ត្រី​ទាំង​៣​រូបនេះ ត្រូវបាន​តុលាការ​ចោទប្រកាន់ និង​ចេញ​ដីកាឃុំខ្លួន​ពួកគេ នៅ​ពន្ធនាគារ ដើម្បី​រងចាំ​និតិ​វិធី​បន្ត​ផងដែរ​៕​