គោលនយោបាយ​សេដ្ឋកិច្ច​ឌីជីថល រំពឹង​ដាក់​ឲ្យ​ដំណើរការ​នៅ​ដើមឆ្នាំ ២០២០

724

ភ្នំពេញៈ គោលនយោបាយ​សេដ្ឋកិច្ច​ឌីជីថល ដែល​រដ្ឋាភិបាល​កម្ពុជា​កំពុង​ព្រាង ត្រូវបាន​រំពឹងថា នឹង​អាចដាក់​ឲ្យ​ដំណើរការ​នៅ​ដើមឆ្នាំ ២០២០​ខាងមុខនេះ​។ នេះ​គឺជា​ការលើកឡើង​របស់ លោក វ​ង្សី វិស្សុត រដ្ឋលេខាធិការ​អចិ​ន្រៃ្ត​យ៍​នៃ​ក្រសួង​សេដ្ឋកិច្ច និង​ហិរញ្ញវត្ថុ នៅក្នុង​វេទិកាសាធារណៈ ស្ដីពី​ការគ្រប់គ្រង​ម៉ាក្រូសេដ្ឋកិច្ច និង​ច្បាប់​ថវិកា​ឆ្នាំ ២០១៩ កាលពី​ថ្ងៃទី​១៥ ខែមករា ឆ្នាំ​២០១៩ កន្លងទៅនេះ​។​

លោក វ​ង្សី វិស្សុត បាន​បន្តថា រដ្ឋាភិបាល​កម្ពុជា បាន​បង្កើត​ក្រុមការងារ​បច្ចេកទេស​មួយ សម្រាប់​ព្រាង​គោលនយោបាយ​ស្តីពី​សេដ្ឋកិច្ច​ឌីជីថល នៅក្នុង​ក្រុមប្រឹក្សា​ឧ​ត្ត​ម​ក្រុមប្រឹក្សា​សេដ្ឋកិច្ចជាតិ​។ ក្រុម​នេះ​នឹង​ត្រូវការ​ពេលវេលា ១ ឬ ២ ឆ្នាំ ដើម្បី​បញ្ចប់​សេចក្ដីព្រាង​គោលនយោបាយ​នេះ​។ គោលនយោបាយ​នេះ​រំពឹងថា នឹង​រួចរាល់​សម្រាប់​ការដាក់​ឲ្យ​ដំណើរការ​នៅ​ដើមឆ្នាំ ២០២០​។​

​គោលនយោបាយ​ស្តីពី​សេដ្ឋកិច្ច​ឌីជីថល មានមុខ​ងារ​ជា​ផែនទី​បង្ហាញផ្លូវ ដើម្បី​បង្កើន​កំណើនសេដ្ឋកិច្ច​របស់​ក​ម្ពុ​ជា ដែលមាន​មូលដ្ឋាន​លើ​ការអភិវឌ្ឍ​បច្ចេកវិទ្យា​ថ្មី​។​

​លោក វ​ង្សី វិស្សុត បន្ថែមថា កម្ពុជា​បាន​រក្សា​កំណើនសេដ្ឋកិច្ច​ក្នុង​ល្បឿន​ដ៏​លឿន​ក្នុង​រយៈពេល ២ ទសវត្សរ៍ ហើយ​ប្រទេស​នេះ​នឹង​ចាំបាច់​ត្រូវ​សម្លឹងមើល​បច្ចេកវិទ្យា​ថ្មីៗ និង​ការ​សម្រប​ខ្លួន​ទទួលយក​ឌីជីថល​កាន់តែច្រើន នៅក្នុង​វិស័យ​ផ្សេងៗ ដើម្បី​បន្ត​ការទទួលបាន​ការរីក​ចម្រើន​។​

លោក​ថ្លែងថា​៖ “​បើសិន​យើង​មាន​ក្រុម​នេះ ហើយ​ដាក់​គោលនយោបាយ​ត្រូវ និង​ធ្វើបាន​ល្បឿន​កំណើនសេដ្ឋកិច្ច​អាច​នឹង​លឿន​ជាង​មុន ដូច្នេះ​ឆ្នាំ ២០៣០ យើង​នឹង​អាច​សម្រេចបាន​គោលដៅ​ប្រែក្លាយ​កម្ពុជា​ទៅជា​ប្រទេស​ចំណូល​មធ្យម​កម្រិត​ខ្ពស់​”​។

​លោក វិស្សុត បាន​ឲ្យ​ដឹងថា គោលនយោបាយ​នេះ​នឹង​ចាំបាច់​ដោះស្រាយ​ការងារ​ជាច្រើន​ដូចជា​ការអភិវឌ្ឍ​ហេដ្ឋារចនាសម្ព័ន្ធ​សំខាន់ៗ ឡូ​ជី​ស្ទីក ការតភ្ជាប់​ឌីជីថល និង​មជ្ឈមណ្ឌល​នវានុវត្តន៍​សម្រាប់​សហគ្រិន​វ័យក្មេង​។

​លោក​បន្ថែមថា ការលើកទឹកចិត្ត​រប​ស់​រដ្ឋាភិបាល ដូចជា​ការលើកទឹកចិត្ត​ផ្នែក​ពន្ធ នឹងដាក់​បញ្ចូល​នៅក្នុង​គោលនយោបាយ​នេះ ដើម្បី​ជំរុញ​សហគ្រិន​វ័យក្មេង​ឲ្យ​បង្កើន​ការបង្កើត​ក្រុមហ៊ុន​បង្កើត​ថ្មី​ខាង​បច្ចេកវិទ្យា​៕