គេហទំព័រ Apple Insider បានឲ្យដឹងកាលពីថ្ងៃទី១៤ មករា កន្លងមកនេះថា វាមិនមែនជាការភ្ញាក់ផ្អើលទេ ដែលការព្រមានពីការធ្លាក់ចុះ នៃទីផ្សារស្មាតហ្វូនពិភពលោកបានលេចឡើង បន្ទាប់ពី Apple ទទួលស្គាល់ថា ប្រាក់ចំណូលខ្លួនសម្រាប់ត្រីមាសមុន ទាបជាងការគិតទុកដល់ទៅ៥ប៊ីលានដុល្លារ រួមទាំងការធ្លាក់ចុះនៃប្រាក់ចំណូលរបស់ Samsung ព្រោះតែទីផ្សារក្នុងប្រទេសចិនមានការអន់ថយ ។ ប៉ុន្តែអ្នកវិភាគនៅ Credit Suisse គិតថា ការធ្លាក់ចុះនេះគឺពិតជាសំខាន់ណាស់ ។
Apple Insider បានឲ្យដឹងមកថា ផលិតកម្មស្មាតហ្វូនកំពុងតែធ្លាក់ចុះហើយវាអាចនឹងបន្តធ្លាក់ចុះទៅទៀត ។ Credit Suisse បានឲ្យដឹងមកថា ផលិតកម្មស្មាតហ្វូនសម្រាប់ត្រីមាសចុងក្រោយនាឆ្នាំ ២០១៨ ស្មើប្រមាណ ៣៥៧លានគ្រឿង ឬទាបជាងឆ្នាំ មុន៣% ខណៈដែលផលិតកម្មសម្រាប់ត្រីមាសទី១នាឆ្នាំនេះវិញអាចនឹងស្មើតែ ២៨៩លានគ្រឿងប៉ុណ្ណោះ ។
ជាលទ្ធផលផលិតកម្មស្មាតហ្វូនប្រចាំឆ្នាំអាចនឹងធ្លាក់ចុះដល់ទៅ១៩% មកដល់កម្រិតកាលពីឆ្នាំ ២០១៣ ។ រហូតមកដល់ការព្រមានរបស់ Apple កាលពីខែមករានេះ ក្រុមហ៊ុន Apple មិនទាន់មើលឃើញផលប៉ះពាល់ច្រើនទេ ខណៈដែលក្រុមហ៊ុនដទៃដូចជា Samsung មើលឃើញការអន់ថយ ។
អ្នកវិភាគនិង Apple បាននិយយាថា ប្រទេសចិនគឺជាកត្តាសំខាន់ដែលបង្កឲ្យការលក់មានកម្រិតទាបជាងការគិតទុកក្នុងរយៈពេលប៉ុន្មានខែថ្មីៗនេះ ។
លោក Tim Cook ដែលជានាយកប្រតិបត្តិរបស់ Apple បាននិយាយមកថា ការដែលប្រាក់ចំណូលបានពីការលក់ iPhone មានទាបជាងការគិតទុកដែលភាគច្រើននៅប្រទេសចិន ជាកត្តាបង្កឲ្យប្រាក់ចំណូលធ្លាក់ចុះ ។ ប៉ុន្តែការអន់ថយនៃចំនួនលក់មិនត្រឹមតែកើតមានឡើងក្នុងប្រទេសចិនទេ តែក៏មានក្នុងទីផ្សារដទៃដែរ ។
របាយការណ៍មួយពី Pew ដែលបានចេញកាលពីខែតុលាបានឲ្យដឹងថា ៩៥% នៃមនុស្សពេញវ័យក្នុងសហរដ្ឋអាមេរិកនៅឆ្នាំ ២០១៨ មាន និងប្រើប្រាស់ទូរស័ព្ទដៃ ខណៈដែលមាន៧៧%មាននិងប្រើប្រាស់ស្មាតហ្វូនហើយ ។ វាមានន័យថា ក្រុមហ៊ុនទូរស័ព្ទមិនមានលទ្ធភាពច្រើនក្នុងការបង្កើនការលក់ទៅកាន់អតិថិជនថ្មីៗក្នុងសហរដ្ឋអាមេរិកទេ ៕