ភ្នំពេញ៖ សមិទ្ធផលនៃផែនការធំៗ ចំនួន ៦ ដែលសម្រេចបានក្នុងឆ្នាំ២០១៨ ត្រូវបានលោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានធ្វើការបង្ហាញ នៅ នារសៀលថ្ងៃទី១០ ខែមករា ឆ្នាំ២០១៩ ក្នុងឱកាសដែលលោកបាន ចូលរួមក្នុងពិធីបិទសន្និបាទបូកសរុបការងារ របស់ក្រសួងសាធារណការ និងដឹកជញ្ជូន ក្រោមអធិបតីភាពលោកឧបនាយករដ្ឋមន្រ្តី អូន ព័ន្ធមុនីរ័ត្ន រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ ព្រមទាំងមានមន្ត្រីគ្រប់ជាន់ថ្នាក់ ចូលរួមជាច្រើន រូបទៀតផងដែរ នៅសាលសន្និសីទចតុមុខ។
![](http://cambodianews.today/wp-content/uploads/2019/01/sun-chanthol.jpg)
លោកទេសរដ្ឋមន្ត្រី បានថ្លែងថា សមិទ្ធផលការងារឆ្នាំ២០១៨ បានមកពីការគាំទ្រ និងជឿទុកចិត្តខ្លាំងពី បងប្អូនប្រជាពលរដ្ឋ មកលើក្រសួងសាធារណការ និងដឹកជញ្ជូន ហើយក្រសួងបានអនុវត្តការងារ ទទួលបានជោគជ័យតាមការសន្យា ហើយសមិទ្ធផលការងារសំខាន់ៗទាំងនោះរួមមានដូចជា៖
![](http://cambodianews.today/wp-content/uploads/2019/01/fn-2019-01-11-14-28-07-1-1024x682.jpg)
ទី១៖ ការងារដឹកជញ្ជូនផ្លូវគោក និងសុវត្ថិភាពចរាចរណ៍
- បន្តកែលម្អប្រព័ន្ធស្វ័យប្រវត្តិកម្មលើការចុះបញ្ជី និងត្រួតពិនិត្យលក្ខណៈបច្ចេកទេសយានយន្ដ និងការពង្រីកការផ្តល់សេវាសាធារណៈ ទៅដល់ប្រជាពលរដ្ឋនៅតាមមន្ទីរសាធារណការ និងដឹកជញ្ជូន រាជធានីខេត្ត ក្រុងមួយចំនួនទៀត
- តភ្ជាប់ប្រព័ន្ធស្វ័យប្រវត្តិកម្ម ផ្ទៀងផ្ទាត់ការចុះបញ្ជីយានយន្ត ជាមួយប្រព័ន្ធទិន្ន័យពន្ធគយ របស់អគ្គនាយកដ្ឋានគយ និងរដ្ឋាករកម្ពុជា
- ពង្រីកទីតាំងផ្ដល់សេវាប័ណ្ណបើកបរនៅផ្សារទំនើប aeon mall២
- ដាក់ឲ្យប្រើប្រាស់ជាផ្លូវការ នៅមជ្ឈមណ្ឌលបណ្ដុះបណ្ដាលបើកបរយានយន្តធុនធ្ងន់
- គិតត្រឹមឆ្នាំ២០១៨ ក្រសួងបានចែកមួកសុវត្ថិភាពប្រមាណ៥៦,២៩៣មួក និងស្ទិកឃ័រចំណាំងផ្លាត ជូនប្រជាពលរដ្ឋសរុបប្រមាណ៣,៤០០,០០០សន្លឹក
- ត្រួតពិនិត្យ និងឃាត់រថយន្តដឹកជញ្ជូនលើសទម្ងន់កម្រិតកំណត់ចំនួន ២,៦៨៨គ្រឿង និងពិន័យជាថវិកាសរុប ៦,០១៨លានរៀល និងបានកាត់ទ្រុងរថយន្តកែច្នៃខុសបច្ចេកទេសបានសរុបចំនួន ១,៧៩២គ្រឿង។
![](http://cambodianews.today/wp-content/uploads/2019/01/fn-2018-07-13-19-11-09-3-1024x767.jpg)
ទី២៖ ការងារដឹកជញ្ជូនផ្លូវទឹកផ្លូវសមុទ្រ និងកំពង់ផែ
- ក្រសួងបានដាក់ឲ្យដំណើរការការណូតដឹកអ្នកដំណើរ តាមផ្លូវទឹកពីឬស្សីកែវទៅតាខ្មៅ (៥ស្ថានីយ៍៖ ឬស្សីកែវ ផ្សារចាស់ ចតុមុខ ច្បារអំពៅ និងក្រុងតាខ្មៅ)
- *សាងសង់ផែបណ្ដែត និងស្ពានចុះផែ នៅខេត្តកំពង់ឆ្នាំង និងស្វាយរៀង
ទី៣៖ ការងារផ្លូវដែក
![](http://cambodianews.today/wp-content/uploads/2019/01/fn-2018-10-29-06-49-22-3-1024x576.jpg)
- ដាក់ឲ្យប្រើប្រាស់រថភ្លើងដឹកអ្នកដំណើរ ពីស្ថានីយភ្នំពេញទៅព្រលានយន្តហោះអន្តរជាតិភ្នំពេញ
- បញ្ចប់គម្រោងស្ដារសាងសង់ឡើងវិញ និងដាក់ឲ្យដំណើរការជាបណ្ដោះអាសន្នផ្លូវដែកភាគខាងជើង (ប៉ោយប៉ែត-ភ្នំពេញ) និងជួសជុលស្ថានីយ៍រថភ្លើងប៉ោយប៉ែត និងបំពាក់ប្រព័ន្ធសុវត្ថិភាពចរាចរផ្លូវដែកភាគខាងជើង។
ទី៤៖ ការងារសាធារណការ
- បញ្ចប់ការជួសជុល និងស្តារឡើងវិញនូវកំណាត់ផ្លូវជាតិលេខ៤៨ ប្រមាណជាង៦៣គីឡូម៉ែត្រ ទាន់ពេលវេលា
- ជិះកង់ទៅពិនិត្យមើលផ្លូវ (ផ្លូវខូច ប្រេះស្រកានាគ)
- បើកការដ្ឋានសាងសង់ស្ពានឆ្លងកាត់ទន្លេមេគង្គស្ទឹងត្រង់-ក្រូចឆ្មា ផ្លូវជាតិលេខ១១ កំណាត់ផ្លូវជាតិលេខ៥ ព្រែកក្តាម- ឆ្មារម្អម (៤គន្លង) គម្រោងពង្រីកកំណាត់ផ្លូវជាតិលេខ៣ ចោមចៅ-ក្រុងកំពត
- ដាក់ឲ្យប្រើប្រាស់កំណាត់ផ្លូវជាតិលេខ១ ប្រវែង ១,៥៧៧គីឡូម៉ែត្រ សេកសក-សំឡូត កំណាត់ផ្លូវជាតិលេខ៦ ថ្នល់កែងកំពង់ចាម-អង្រងសៀមរាប
- បញ្ចប់ការសិក្សាសមិទ្ធផលផែនការមេ សម្រាប់អភិវឌ្ឍហេដ្ឋារចនាសម្ព័ន្ធបណ្ដាញលូ ការសាងសង់ស្ថានីយ៍ប្រព្រឹត្តកម្មទឹកកខ្វក់ នៅក្រុងច្បារមន និងនៅក្រុងព្រះសីហនុ។
ទី៥៖ ការងារភស្តុភារកម្ម
- បញ្ចប់ និងផ្សព្វផ្សាយជាសាធារណៈ ឯកសារនៃការសិក្សាផែនការមេភស្តុភារកម្ម ដែលគាំទ្រដោយWB និង JICA
- សហការជាមួយក្រុមជំនាញការ ធនាគារអភិវឌ្ឍន៍អាស៊ី សាជីវកម្មហិរញ្ញវត្ថុអន្តរជាតិ (IFC) និងស្ថាប័នពាក់ព័ន្ធ សិក្សាគម្រោងអភិវឌ្ឍន៍ភស្តុភាកម្មភ្នំពេញ និងគម្រោងអភិវឌ្ឍន៍មជ្ឈមណ្ឌលភស្តុភាកម្មក្រុងព្រះសីហនុ
![](http://cambodianews.today/wp-content/uploads/2019/01/fn-2018-07-13-19-11-09-6-1024x682.jpg)
និងទី៦៖ អង្គភាពសហគ្រាសសាធារណៈ
- ដាក់ឲ្យដំណើរការ គម្រោងពង្រីកចំណតផែកុងតឺន័រLM១៧ ជំហានទី២ នៅកំពង់ផែស្វ័យយ័តភ្នំពេញ
- ដាក់ឲ្យប្រើប្រាស់ចំណតកំពង់ផែ ពហុបំណងកំពង់ផែស្វ័យយ័តក្រុងព្រះសីហនុ
- កាំសាបបានបញ្ចុះតម្លៃ២០% នៃតម្លៃសេវាកុងត្រាកុងតឺន័រ លើសម៉ោង និង២០% នៃតំលៃត្រួតពិនិត្យកុងតឺន័រ នៅពេលលើកដាក់នៅលើនេះវា
- ផ្តល់សេវាពិសោធន៍សំណង់ និងសាធារណការ ជូនដល់ក្រុមហ៊ុនកងវិស្វកម្ម មន្ទីរសាធារណការខេត្ត ក្រុង និងអង្គភាពពាក់ព័ន្ធបានសរុប១,៣៧៥ករណី៕