ផ្លែ​ខ្វិត មាន​អត្ថប្រយោជន៍​ច្រើន សម្រាប់​សុខភាព ទាំង​នៅពេល​ខ្ចី​, ចាស់ និង​ទុំ​

4611
SONY DSC

ខ្វិត​ជា​ដំណាំ​ឈើ​ហូប​ផ្លែ​មួយ​ប្រភេទ​ ​ដែល​ពេញនិយម​ណាស់នៅ​​កម្ពុជា។ ផ្លែ​ខ្វិត​អាច​ទទួលទាន​បាន​ទាំង​នៅពេល​ខ្ចី​, ចាស់ និង​ទុំ គ្រាន់តែ​នៅពេល​ខ្ចី ​វា​មាន​រសជាតិ​ចត់ ហើយ​ជូរអែម​នៅពេល​ចាស់ ឬ​ទុំ។ ទោះបីជា​ភាគច្រើន​មនុស្សគ្រប់គ្នាបាន​ស្គាល់ និង​ធ្លាប់​បរិភោគ​ផ្លែឈើ​នេះ​ក៏ដោយ ប៉ុន្តែ​ប្រហែលជា​មិនបាន​ដឹងថា ផ្លែ​ខ្វិត​អាច​អត្ថប្រយោជន៍យ៉ាងច្រើន​ចំពោះ​សុខភាពឡើយ។ ខាងក្រោមនេះ គឺជា អត្ថប្រយោជន៍របស់ ផ្លែខ្វិត៖

១. ល្អ​សម្រាប់​សុខភាព​ថ្លើម និង​តម្រងនោម ៖ ផ្លែ​ខ្វិត​មាន​ផ្ទុក និង​សម្បូរ​ទៅដោយ​សារធាតុ​ប្រឆាំង​អុកស៊ីតកម្ម និង​សមាសធាតុ​មួយចំនួន​ ដែល​ប្រយុទ្ធប្រឆាំង​រ៉ាឌីកាល់​សេរី ហើយ​ថែមទាំង​ជួយ​ធ្វើ​ឲ្យ​ដំណើរការ​មុខងារផ្សេងៗ ​នៃ​រាងកាយ​មាន​លក្ខណៈ​កាន់តែ​ប្រសើរឡើង​ផងដែរ។ ផ្លែ​ខ្វិត ​ជា​ប្រភព​ដ៏​ល្អ​នៃ​សារធាតុ Beta-carotene, សារធាតុ Thiamine និង Riboflavin ដែល​ជួយ​ពង្រឹង​សុខភាព​ថ្លើម ហើយ​សាច់​នៃ​ផ្លែឈើ​នេះ​​ ក៏​ដើរតួនាទី​ជា​សារធាតុ​បន្សាប​ជាតិពុល​ផ្សេងៗ តាម​បែប​ធម្មជាតិ​ ដែល​ជួយ​ការពារ​សុខភាព​តម្រង​នោម និង​ថ្លើម ។​

២. គ្រប់គ្រង​កម្រិត​ជាតិ​ស្ករ​ក្នុង​ឈាម (​ករណី​បង្កដោយ Fluoride) ៖ Fluoride ជា​កត្តា​ដ៏​សំខាន់បំផុត​មួយ​ ដែល​ជះឥទ្ធិពល​លើ​កម្រិត​ នៃ​ជាតិ​ស្ករ​ក្នុង​ឈាម​។ សារធាតុ Fluoride ​​ក្នុង​ទឹក​ដែល​អ្នក​ទទួលទាន​ បង្កើន​ការ​ធន់​ទៅនឹង​ជាតិ​គ្លុយកូស​ នៃ​ឈាម​ដែល​បណ្ដាល​ឲ្យ​កើត​ បញ្ហា​ជាតិ​ស្ករ​ក្នុង​ឈាម​ឡើង​ខ្ពស់។ ផ្លែ​ខ្វិត គឺមាន​ប្រយោជន៍​ណាស់​ក្នុងការ​គ្រប់គ្រង​សារធាតុ fluoride ដែល​បង្កជាបញ្ហា​ជាតិ​ស្ករ​ក្នុង​ឈាម​ឡើង​ខ្ពស់ ក៏​ព្រោះ​សាច់​នៃ​ផ្លែឈើ​នេះ​ មាន​ផ្ទុក​សមាសធាតុ​ដូចជា Saponis, Phytosterols, Flavonoids, Polyphenols និង Ascorbic acid ដែលមាន​ប្រសិទ្ធភាព​គ្រប់គ្រង​កម្រិត​នៃ​ជាតិ​ស្ករ​ក្នុង​ឈាម ។ ដូច្នេះ​ការទទួល​ទាន​ផ្លែ​ខ្វិត ​អាចជួយ​កាត់បន្ថយ​កម្រិត​នៃ​ជាតិ​ស្ករ​ក្នុង​ឈាម​បាន​យ៉ាង​ប្រសើរ។​

៣.​ព្យាបាល​ពស់​ចឹក និង​ឃ្មុំ​ទិច ៖ តាំងពី​សម័យបុរាណ​មក ​នៅក្នុង​ប្រទេស​ឥណ្ឌា​ សំបក​នៃ​ដើម​ខ្វិត ​ត្រូវបាន​គេ​ប្រើ​សម្រាប់​ព្យាបាលពេលត្រូវពស់​ចឹក ហើយ​សំបក​ផ្លែ​ខ្វិត​វិញ គឺ​ប្រើ​សម្រាប់​ព្យាបាល​ពេលត្រូវឃ្មុំ​ទិច។​

៤. ជួយ​រំលាយ​អាហារ៖ ការទទួល​ទាន​ផ្លែ​ខ្វិត​ទុំ អាចជួយ​ទប់ស្កាត់ ​បញ្ហា​ទល់លាមក​បាន​យ៉ាង​មាន​ប្រសិទ្ធិភាព ​តាមរយៈ​សារធាតុ laxative ដែល​វា​មាន។ ផ្លែ​ខ្វិត ក៏​ជួយ​កម្ចាត់​ប៉ា​រ៉ា​សិត​ក្នុង​ពោះវៀន និង​ជា​ឱសថ​មួយ​ដ៏​ល្អ ​សម្រាប់​ព្យាបាល​ជំងឺ​រំលាយ​អាហារ​ផងដែរ​។​

៥.​ ជា​ប្រភព​ដ៏​ប្រសើរ​នៃ​សារធាតុចិញ្ចឹម​ច្រើន​ប្រភេទ៖ ផ្លែ​ខ្វិត មាន​ផ្ទុក​សម្បូរ​ទៅដោយ Carbohydrates និង ប្រូតេអ៊ីន រួមទាំង​វីតាមីន A, B, C ជាតិ​កាល់ស្យូម​, ផូស្វ័រ ក៏ដូចជា​ជាតិ​ស​សៃ ដែល​ជួយ​រក្សាសុខ​ភា​ពរាងកា​យ​ល្អ​រឹងមាំ ជៀស​ផុតពី​ជំងឺ ផ្សេងៗ​។​

​ទោះជា​យ៉ាងណា កុំ​ទទួលទាន​ច្រើនពេក​ ​ព្រោះ​វា​អាច​បណ្ដាល​ឲ្យ​អ្នក​ ហើមពោះ​, ឈឺពោះ និង​ឈឺបំពង់ក​បានដែរ៕ (​ដងស្រង់ពី Health.com.kh)