ត្រូវ​ចំណាយ​ប្រាក់​ប្រមាណ ២០០​លាន​ដុល្លារ ដើម្បី​បញ្ចៀស​ទឹក​កខ្វក់ កុំឱ្យ​ហូរ​ចូលទៅក្នុង​សមុទ្រ​

920

​ព្រះសីហនុ​៖ ដើម្បី​បញ្ចៀស​ទឹក​កខ្វក់ កុំឱ្យ​ហូរ​ចូលទៅក្នុង​សមុទ្រ និង​ទៅ​ទីកន្លែង​នានា​ដែលនាំឱ្យ​ប៉ះពាល់​ដល់​ទឹកសមុទ្រ និង​បរិស្ថាន​នៅក្នុង​ខេត្ត​ព្រះសីហនុ គឺ​ត្រូវ​សាងសង​ស្ថានីយ​ចម្រោះ​ទឹក​កខ្វក់​មួយ​បន្ថែមទៀត ដែលមាន​សមត្ថភាព​ចម្រោះ​ទឹក​រហូតដល់​ទៅ ២៥,០០០​ម៉ែត្រគូប​ក្នុង​មួយថ្ងៃ និង​ដាក់​ប្រព័ន្ធ​លូ​សរុប​ប្រវែង​ប្រមាណ ១៥៧​គីឡូម៉ែត្រ ដែល​ត្រូវការ​ថវិការ​ប្រមាណ ២០០​លាន​ដុល្លារ​អាមេរិក​។

​នេះ​ជាការ​លើកឡើង​របស់លោក​ទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួង​សាធារណការ និង​ដឹកជញ្ជូន ខណៈដែល​លោក រួមជាមួយ​លោក​ឧបនាយករដ្ឋមន្ត្រី អូន ព័ន្ធមុនីរ័ត្ន រដ្ឋមន្ត្រីក្រសួង​សេដ្ឋកិច្ច និង​ហិរញ្ញវត្ថុ អមដោយ​អភិបាលខេត្ត​ព្រះសីហនុ លោក យន្ត មីន និង​មន្ត្រី​ជំនាញ​ជាច្រើនរូប​ផ្សេងទៀត បានធ្វើ​ដំណើរ​រួមគ្នា​ចុះ​ពិនិត្យ និង​សិក្សា​នៅ​ទីតាំង​ស្ថានីយ​ចម្រោះ​ទឹក​កខ្វក់​ស្ថិតនៅ​ក្រុងព្រះសីហនុ ខេត្ត​ព្រះសីហនុ កាលពី​ថ្ងៃទី​៣០ ខែមេសា ឆ្នាំ​២០១៩​កន្លងទៅនេះ​។​

​លោក​ទេសរដ្ឋមន្ត្រី ស៊ុន ចាន់ថុល បាន​ប្រាប់ថា ស្ថានីយ​ចម្រោះ​ទឹក​កខ្វក់​នាពេល​បច្ចុប្បន្ន​នេះ មាន​សមត្ថភាព​ចម្រោះ​ទឹកបាន​ប្រមាណ​តែ​៥​ពាន់​ម៉ែត្រគូប​តែប៉ុណ្ណោះ ខណៈ​ដឹក​កខ្វក់​បង្ហូរ​ពី​តាម​លំនៅឋាន អាហា​រដ្ឋា​ន និង​សណ្ឋាគារ​ជាដើម​កំពុងមាន​កម្រិត​ខ្ពស់​រហូតដល់​ទៅ ២៥,០០០​ម៉ែត្រគូប​ក្នុង​មួយថ្ងៃ​។​

​លោក​បាន​បន្តទៀតថា ដើម្បី​ចម្រោះ​ទឹក​កខ្វក់​ដែល​កំពុង​មានកំណើត​យ៉ាងគំហុក​នាពេល​បច្ចុប្បន្ន គឺ​ក្រសួង​បាន​សិក្សា​សាងសង់​អាង​ចម្រោះ​ទឹក​កខ្វក់​បន្ថែមទៀត ដែល​គោលបំណង​ធ្វើឱ្យ​ស្ថានីយ​ចម្រោះ​ទឹក​កខ្វក់​នេះ​មាន​សមត្ថភាព​ចម្រោះ​ទឹក​កខ្វក់​ឱ្យបាន​៦​ម៉ឺន​គូប​ក្នុង​មួយថ្ងៃ​។ ការកសាង​អាង​ចម្រោះ​ទឹក​ថ្មី ក៏ដូចជា​ការដាក់​ប្រព័ន្ធ​លូ​សរុប​ប្រវែង​ប្រមាណ ១៥៧​គីឡូម៉ែត្រ​ផង​នោះ គឺ​ត្រូវការ​ថវិកា​ប្រមាណ ២០០​លាន​ដុល្លារ​អាមេរិក​។

​គួរ​រំ​ម្លឹ​ក​ផងដែរ​ថា ក្នុង​ពិធីបុណ្យ​សមុទ្រ​នៅ​ខេត្តកោះកុង​កាលពី​ចុងឆ្នាំ​២០១៨ សម្តេច​តេ​ជោ ហ៊ុន សែន បាន​ប្រាប់​ឲ្យ​គណៈកម្មការ​គ្រប់គ្រង​ឆ្នេរសមុទ្រ ដែលមាន​លោក​ឧបនាយករដ្ឋមន្ត្រី ជា សុផារ៉ា រដ្ឋមន្ត្រីក្រសួង​រៀបចំ​ដែនដី នគរូបនីយកម្ម និង​សំណង់ ជា​ប្រធាន រួម​នឹង​អាជ្ញាធរ​ពាក់ព័ន្ធ​ទាំងអស់ រួមគ្នា​លុបបំបាត់​ការបង្ហូរ​ទឹក​កខ្វក់​ចូលទៅក្នុង​សមុទ្រ​៕​