គម្រោង​អភិវឌ្ឍន៍​ដ៏​ធំ​មួយ មានតម្លៃ​សរុប ៧០ លាន​ដុល្លារ នឹង​ផុសឡើង​នៅ​ខេត្តសៀមរាប​

859

​ភ្នំពេញ​៖ គម្រោង​អភិវឌ្ឍន៍ ជល​វប្បដ្ឋាន​ត្រី​ទឹកសាប ទឹកប្រៃ ជម្រក​អភិរក្ស​សត្វ និង​សណ្ឋាគារ​លំដាប់​ពិភពលោក​មួយ នៅ​ខេត្តសៀមរាប ដែលមាន​តម្លៃ​ទុនវិនិយោគ​សរុប ៧០ លាន​ដុល្លារ នឹង​ចាប់ផ្តើម​ការសាងសង់​ក្នុង​ខែឧសភា​នេះហើយ​។ នេះ​បើតាម​សេចក្តីប្រកាស​ព័ត៌មាន​របស់​ក្រុមហ៊ុន Angkor Wildlife and Aquarium ដែលជា​ម្ចាស់​គម្រោង​។​

ក្រុមហ៊ុន Angkor Wildlife and Aquarium កើតឡើង​ពី​ការចាប់​ដៃគូ​គ្នា រវាង​ក្រុមហ៊ុន​ក្នុងស្រុក​ជាមួយ​ក្រុមហ៊ុន​មកពី​ប្រទេស​ជប៉ុន ក្រោម​កិច្ចសហការ​ជាមួយ​ក្រុមហ៊ុន​អាមេរិក​ឈ្មោះ ICM Inc.(International Concept Management Inc.) ដែលជា​ក្រុមហ៊ុន​មាន​ជំនាញ​ក្នុងការ​រៀបចំ​រចនា​ប្លង់ គ្រប់គ្រង​គម្រោង ប្រតិបត្តិការ​ជល​វប្បដ្ឋាន និង​ឧទ្យាន​សមុទ្រ​ទូទាំង​ពិភពលោក ដែល​ធ្លាប់មាន​បទពិសោធ​ធ្វើការ​ជាមួយ​ក្រុមហ៊ុន​ធំៗ​ដូចជា Disney, The San Francisco Academy of Sciences, The Baltimore Aquarium, The Osaka Aquarium, Xcaret Park in Mexico និង Loro Park of the Canary Islands ជាដើម​។​

​យោងតាម​សេចក្តីប្រកាស​ព័ត៌មាន គម្រោង​នេះ​នឹងត្រូវ​សាងសង់​លើ​ផ្ទៃដី​ទំហំ ១០០ ហិកតា ដោយ​ចែកជា ៣ ដំណាក់កាល ដំណាក់កាល​ទី​១ នឹង​ចំណាយ​ទឹកប្រាក់ ១៨​លាន​ដុល្លារ​អាមេរិក ចាប់ផ្តើម​ក្នុង​ខែ ឧសភា ឆ្នាំ ២០១៩ ដោយ​គ្រោង​បញ្ចប់​ក្នុង​រយៈពេល ២​ឆ្នាំ ។ ដំណាក់កាល​ទី ២ សាងសង់​សួន​រុក្ខសាស្ត្រ សាល​តាំងពិព័រណ៍ ជម្រក​ល្មូ​ន កន្លែង​ដើរ​កម្សាន្ដ ហាង​លក់ទំនិញ និង ចុងបញ្ចប់​នៅក្នុង​ដំណាក់កាល​ទី ៣ គឺ​ការអភិវឌ្ឍ​សណ្ឋាគារ​លំដាប់​ពិភពលោក ក្នុង​បំណង​ចូលរួមចំណែក​ជួយ ធ្វើ​ឲ្យ​ការ​ស្នាក់នៅ​របស់​ភ្ញៀវ​ក្នុង​ខេត្តសៀមរាប បាន​កាន់តែ​យូរ​បន្ថែមទៀត​។​

​ថ្លែង​ក្នុង​ពិធី​បើកសម្ពោធ​ការសាងសង់​គម្រោង​រប​ស់ Angkor Wildlife and Aquarium នៅ​និ​វេស​ដ្ឋា​ន​របស់​ឯកអគ្គរដ្ឋទូត​អាមេរិក កាលពី​រាត្រី​ថ្ងៃទី ២៩ ខែ មេសា លោក Roger R. Reynolds ប្រធាន​ក្រុមហ៊ុន Angkor Wildlife and Aquarium និង​ជា​ស្ថាបនិក​ក្រុមហ៊ុន ICM Inc. បាន​ប្រាប់​ឲ្យ​ដឹងថា គម្រោង​នេះ​នឹងត្រូវ​អភិវឌ្ឍ​ទៅជា​មជ្ឈមណ្ឌល​កម្សាន្ត និង​អប់រំ​លំដាប់​ពិភពលោក ដោយមាន​ការអភិរក្ស​សត្វព្រៃ និង​ការពារ​បរិស្ថាន​ផងដែរ​។ លោក​បន្តថា គម្រោង​នេះ​នឹង​ដើរតួនាទី​ដ៏​សំខាន់​ក្នុងការ​សហការ​ជាមួយ​អង្គការ​អភិរក្ស​ក្នុងស្រុក និង​ថ្នាក់​តំបន់​។​

​លោក​ថ្លែងថា​៖ «​យើង​សង្ឃឹមថា គម្រោង​របស់​យើង​នឹង​ក្លាយជា​គោលដៅ​លំដាប់​ពិភពលោក​នៅក្នុង​ខេត្តសៀមរាប​។ យើង​ធានាថា វា​នឹង​ក្លាយជា​គោលដៅ​ទាក់ទាញ​លំដាប់​ទី​២ បន្ទាប់ពី​ប្រាសាទអង្គរវត្ត​»​។​

​លោក ទិ​ត ចន្ថា រដ្ឋលេខាធិការ​នៃ​ក្រសួងទេសចរណ៍ បាន​លើកឡើងថា ទន្ទឹមនឹង​ការរីកចម្រើន​ដ៏​ឆាប់រហ័ស និង​កំណើន​ភ្ញៀវទេសចរ​ដ៏​ច្រើន បច្ចុប្បន្ន​កម្ពុជា​ក៏​ត្រូវការ​ការវិនិយោគ​ជាច្រើន​ទៅលើ​ការកសាង​ហេដ្ឋារចនាសម្ព័ន្ធ ព្រលានយន្តហោះ សណ្ឋាគារ ភោជនីយដ្ឋាន និង​ការសាងសង់​កន្លែង​សម្រាក​កម្សាន្ត​ជាច្រើន​ផងដែរ​។​

​លោក​បាន​បន្តថា​៖ «​ខ្ញុំ​ជឿថា គម្រោង Angkor Wildlife and Aquarium លំដាប់​ពិភពលោក ដែល​ដឹកនាំ​ដោយ​លោក ម៉េង ហៀ​ង ដែលជា​សហគ្រិន​កម្ពុជា​នេះ​នឹង​ទទួលបាន​ជោគជ័យ ហើយ​វា​នឹង​ផ្តល់​តម្លៃបន្ថែម​ដល់​ការ​ស្នាក់នៅ​សម្រាប់​ភ្ញៀវទេសចរ​នៅ​ខេត្តសៀមរាប និង​ប្រទេស កម្ពុជា ទាំងមូល​»​។​

​លោក Michael Newbill ភារធារី​ស្ថានទូត​អាមេរិក ប្រចាំ​កម្ពុជា បាន​និយាយថា នេះ​គឺជា​គម្រោង​ធំ​នៅក្នុង​ចំណោម​គម្រោង​ធំ​របស់​សហរដ្ឋអាមេរិក​នៅ​កម្ពុ​ជានា​រយៈពេល​ប៉ុន្មាន​ឆ្នាំ​កន្លងមកនេះ​។​

​គម្រោង Angkor Wildlife and Aquarium មានទីតាំងស្ថិតនៅក្នុង​ភូមិ​ក្បូន ឃុំ​ខ្ចាស់ ស្រុក​សូទ្រនិគម ខេត្តសៀមរាប​៕