តើ​បញ្ហា​អ្វីខ្លះ​ត្រូវបាន​ពិភាក្សា រវាង​សម្ដេច ហ៊ុន សែន និង អ្នកសម្របសម្រួល​រប​ស់ អង្គការសហប្រជាជាតិ?​

391

​ភ្នំពេញ​៖ បញ្ហា​ចំនួន ៣ ធំៗ ត្រូវបាន​លើកយក​មក​ធ្វើជា​ប្រធានបទ នៅក្នុង​ជំនួប​ពិភាក្សា​ការងារ រវាង​សម្ដេច​តេ​ជោ ហ៊ុន សែន នាយករដ្ឋមន្ត្រី​កម្ពុជា និង​លោកស្រី ផូ​លីន ថា​មេ​ស៊ី​ស (PAULINE TAMESIS) អ្នកសម្របសម្រួល​អង្គ​ការ​សហប្រជាជាតិ កាលពី​ព្រឹក​ថ្ងៃទី​៦ ឧសភា ឆ្នាំ​២០១៩​កន្លងទៅនេះ នៅ​វិមាន​សន្តិភាព​។​

សម្ដេច ហ៊ុន សែន និងលោកស្រី ផូ​លីន ថា​មេ​ស៊ី​ស (PAULINE TAMESIS)

បញ្ហា​ចំនួន ៣ សំខាន់ៗ ដែល​លោកស្រី ផូ​លីន ថា​មេ​ស៊ី​ស (PAULINE TAMESIS) បានលើកឡើង​នោះ​រួមមាន​៖ ទី​១- ពាក់ព័ន្ធ​នឹង​កិច្ច​គាំពារ​សង្គម ទី​២- ទិន្នន័យ​សម្រាប់​ការអភិវឌ្ឍ​ដោយ​ចីរភាព និង​ទី​៣- បញ្ហា​ការចូលរួម​ពិនិត្យ​របាយការណ៍​ថ្នាក់ជាតិ លើ​ការអនុវត្ត​គោលដៅ​អភិវឌ្ឍន៍ ដោយ​ចីរភាព នៅក្នុង​ទីក្រុង​ញូវយ៉ក នា​ខែកក្កដា​ខាងមុខនេះ​។​

​តាមរយៈ​លោក អ៊ាង សុផល្លែត ជំនួយការ​ផ្ទាល់​របស់​សម្ដេច ហ៊ុន សែន បាន​ឲ្យ​ដឹងថា សម្ដេច ហ៊ុន សែន បាន​ឆ្លើយតប ចំពោះ​កិច្ច​គាំពារ​សង្គម​ថា កម្ពុជា​កាលពី​ដើមឡើយ គឺមាន​ភាពក្រីក្រ​រហូត​ដល់ ១០០% ហើយក៏​មានការ​ចាប់ផ្ដើម​ឡើង​នូវ​ការ​ផ្ដល់នូវ​ការ​គាំពារ​សង្គម​ទៅដល់​ស្ត្រី​មាន​ផ្ទៃពោះ បន្ទាប់​មកដល់​ស្ត្រី​ដែល​ធ្វើការ​នៅតាម​រោងចក្រ​។ បន្ទាប់មកទៀត​ដល់​ស្ត្រី​ដែលមាន​ភាពក្រីក្រ ហើយក៏​បានធ្វើការ​មួយចំនួន​ថែមទៀត​ផង រួមទាំង​ការកាត់បន្ថយ​តម្លៃ​អគ្គិសនី ការកសាង​ហេ​ដ្ឋា​រចនា​ស​ម្ព័​ន្កា​រ ជីក​អណ្តូងទឹក ស្រះ​ទឹកជា​ដើម នោះ​សោត​សុទ្ធសឹងតែ​ជា​កិច្ច​គាំពារ​សង្គម​តែម្ដង​។​

សម្ដេចតេជោ ហ៊ុន សែន

​ទាក់ទង​នឹង​ទិន្នន័យ​សម្រាប់​ការអភិវឌ្ឍ​ដែល​អង្គការសហប្រជាជាតិ ស្នើ​ដើម្បី​ធ្វើយ៉ាងណា​ឲ្យ​បង្កើន​នូវ​ថវិកាជាតិ និង​ពង្រឹងសមត្ថភាព សម្រាប់​ការងារ​ទិន្នន័យ សម្រាប់​ការអភិវឌ្ឍ​នេះ ត្រូវបាន​សម្ដេច​តេ​ជោ ហ៊ុន សែន បាន​បកស្រាយ​ថា កន្លងមក​រាជរដ្ឋាភិបាល បាន​ជំរុញ​ក្នុង​ការបង្កើន​ថវិកាជាតិ​ជាប្រចាំ ហើយ​សង្ឃឹមថានឹង​ឯកភាព​បង្កើន​ថវិកា​បន្ថែមទៀត ។ ចំពោះ​ការពង្រឹង​សមត្ថភាព សម្ដេច ហ៊ុន សែន ក៏បាន​ណែនាំ​ធ្វើយ៉ាងណា ឱ្យមាន​ការជំរុញ​ការសិក្សា​ដល់​ថ្នាក់​បរិញ្ញាបត្រ បរិញ្ញាបត្រ​ជាន់ខ្ពស់​នៅ​កម្ពុជា​។​

​សម្រាប់ បញ្ហា​ការចូលរួម​ពិនិត្យ​របាយការណ៍​ថ្នាក់ជាតិ លើ​ការអនុវត្ត​គោលដៅ​អភិវឌ្ឍន៍ ដោយ​ចីរភាព នៅក្នុង​ទីក្រុង​ញូវយ៉ក នា​ខែកក្កដា​ខាងមុខនេះ សម្ដេច​តេ​ជោ ហ៊ុន សែន បាន​ឆ្លើយតប​វិញ​ថា កម្ពុជា​បាន​ត្រៀមខ្លួន​ជាស្រេច​ហើយ​សម្រាប់​កិច្ចប្រជុំ​នោះ ។​

ក្នុង​សេចក្ដីប្រកាស​ព័ត៌មាន​បន្ទាប់ពី​ជំនួប របស់លោក​ស្រី ផូ​លីន ថា​មេ​ស៊ី​ស បាន​ឲ្យ​ដឹងថា រាជរដ្ឋាភិបាល​កម្ពុជា​កំពុង​ត្រៀម​រៀបចំ ដើម្បី​ធ្វើ​បទ​បង្ហាញ​អំពី​ការត្រួតពិនិត្យ​ថ្នាក់ជាតិ​ដោយ​ស្ម័គ្រចិត្ត ដែល​ផ្ដោតលើ​ផែនការ​អនុវត្តន៍ និង​វឌ្ឍនភាព នៃ​ការអនុវត្ត​គោលដៅ​អភិវឌ្ឍន៍​ប្រកបដោយ​ចីរភាព​នៅ​កម្ពុជា ក្នុងសម័យ​ប្រជុំ​នៃ​វេទិកា​នយោបាយ​កម្រិត​ខ្ពស់ ស្ដីពី​ការអភិវឌ្ឍ​ប្រកបដោយ​ចីរភាព នៅ​ទីក្រុង​ញូវយ៉ក ក្នុង​ខែកក្កដា​ខាងមុខនេះ​។​

​លោកស្រី បាន​ឲ្យ​ដឹង​ទៀតថា ដើម្បី​បោះជំហាន​ទៅមុខ ទាមទារ​ឲ្យ​មានការ​យកចិត្ត​ទុក ដាក់​ខ្ពស់​ជា​អាទិភាព​រវាង​តុល្យភាព​នៃ​កំណើនសេដ្ឋកិច្ច ជាមួយនឹង ការការពារ​បរិស្ថាន​ធម្មជាតិ ការការពារ​សិទ្ធិមនុស្ស និង​ការលើកកម្ពស់​គោលដៅ​សង្គម ដើម្បី​ធានាថា​ប្រជាជន​ក្រីក្រ​ត្រូវបាន​ការពារ​ពី​ហានិភ័យ និង​ធានាថា វិបុលភាព​ត្រូវបាន​ចែករំលែក​ប្រកបដោយ​សមធម៌ ហើយ​ជំនាន់​ក្រោយៗ​ទៀត​ក៏​ទទួលបាន​អត្ថប្រយោជន៍​ពី​ការសម្រេចចិត្ត​ថ្ងៃនេះ អំពី​របៀប​ដែល​ធនធាន​ត្រូវបាន​គ្រប់គ្រង​។​

​លោកស្រី ផូ​លីន ថា​មេ​ស៊ី​ស បាន​អះអាង​បន្ថែមទៀតថា ក្នុង​ក្របខ័ណ្ឌ UNDAF ថ្មី​នេះ អង្គការសហប្រជាជាតិ​នឹង​ផ្ដល់​ការគាំទ្រ​ហិរញ្ញវត្ថុ និង​បច្ចេកទេស​ដល់​រាជរដ្ឋាភិបាល​កម្ពុជា​ក្នុងការ​រៀបចំ និង​អនុវត្ត​ផែនការ​គោលនយោបាយ និង​ក្របខ័ណ្ឌ​នានា ដើម្បី​ចាត់​អាទិភាព​លើ​បញ្ហា​នានា​ដែលមាន​ផលប៉ះពាល់​លើ​ក្រុម​ដែល​ងាយ​រងគ្រោះ​ជាងគេ​៕