មេធាវី​របស់លោក កឹម សុខា (Kem Sokha) គ្រោង​ស្នើសុំ​តុលាការ​បិទ​ការ​ស៊ើប លើ​កូនក្តី​របស់ខ្លួន​

433

​ភ្នំពេញ​៖ សហ​មេធាវី​ម្នាក់​របស់ អតីត​ប្រធាន​គណបក្ស​សង្គ្រោះ​ជាតិ លោក កឹម សុខា (Kem Sokha) គឺ​លោក ចាន់ ចេ​ន បាន​ប្រាប់ថា ក្រុម​មេធាវី​របស់លោក កឹម សុខា គ្រោង​ស្នើសុំ​ទៅ​ចៅក្រម​ស៊ើបសួរ​របស់​សាលាដំបូង​រាជធានី​ភ្នំពេញ ឲ្យ​ធ្វើ​ការបិទ​បញ្ចប់​ការ​ស៊ើបសួរ​លើ​កូនក្តី​របស់ខ្លួន​។

​លោក កឹម សុខា (Kem Sokha) អតីត​ប្រធាន​នៃ​អតីត​គណបក្ស​សង្គ្រោះ​ជាតិ​ត្រូវបាន​ចាប់ខ្លួន​នៅ​ដើមខែ​កញ្ញា​ឆ្នាំ ២០១៧ និង​ត្រូវបាន​ចោទប្រកាន់​ពីបទ​ក្បត់ជាតិ​ដែល​ឃុបឃិត​ជាមួយ​សហរដ្ឋអាមេរិក​។ បន្ទាប់ពី​ត្រូវបាន​ឃុំខ្លួន​ប្រមាណ ១ ឆ្នាំ​នៅក្នុង​ពន្ធនាគារ​ត្រពាំង​ផ្លុ​ង លោក​សុខា​ក៏ត្រូវ​បាន​ដោះលែង​ឱ្យមក​ស្នាក់នៅ​ក្នុងផ្ទះ ប៉ុន្តែ​ដាក់​ឲ្យ​នៅក្រោម​ការត្រួតពិនិត្យរ​បស់​តុលាការ​វិញ កាលពី​ថ្ងៃទី ១០ ខែ កញ្ញា ឆ្នាំ ២០១៨​។​

​រហូតមកដល់​ពេលនេះ លោក កឹម សុខា (Kem Sokha) បាន​ស្ថិតក្នុង​ការឃុំខ្លួន និង​ឃ្លាំមើល​អស់​រយៈពេល​ជិត ២ ឆ្នាំ​មកហើយ ដើម្បីឱ្យ​ចៅក្រម​ស៊ើបសួរ​សាលាដំបូង​រាជធានី​ភ្នំពេញ បើក​ការស៊ើបអង្កេត​លើ​សំណុំរឿង​ក្បត់ជាតិ​ដែល​ចោទប្រកាន់​ឡើង​ដោយ​រដ្ឋាភិបាល​កម្ពុជា​។​

​លោក​មេធាវី ចាន់ ចេ​ន អះអាងថា ដំណើរការ​នីតិវិធី​ស៊ើបអង្កេត​លើ​លោក កឹម សុខា របស់​ចៅក្រម​ស៊ើបសួរ​សាលាដំបូង​រាជធានី​ភ្នំពេញ​មិនមាន​ការវិវត្ត​ទៅមុខ​នោះទេ គឺ​នៅ​ទ្រឹង​នៅឡើយ​។ លោក​បាន​ប្រាប់ថា​៖ “​យើង​ពិត​ជាមាន​គម្រោង​ស្នើឱ្យ​បិទ​ការ​ស៊ើប ក្នុងពេល​ឆាប់ៗ​នេះ ដោយ​ការ​ស៊ើប​របស់​ចៅក្រម​យូរហើយ ជាង ១ ឆ្នាំ​ហើយ សាក្សី​ក៏បាន​សួរ​ច្រើន​ហូរហែ​ហើយ​។”​

លោក កឹម សុខា​ (Kem Sokha) ហូបបាយជាមួយប្រពន្ធ និងម្ដាយ

​លោក ផែង ហេង ដែលជា​សហ​មេធាវី​ការពារ​ក្ដី​ឱ្យ​លោក កឹម សុខា​ (Kem Sokha) ម្នាក់​ដែរ បាន​ប្រាប់​ភ្នំពេញ​ប៉ុស្តិ៍​ថា លោក​មិនទាន់បាន​ជជែក​គ្នា ជាមួយ​សហ​មេធាវី​ផ្សេងទៀត ជុំវិញ​ការសុំ​បិទ​ការ​ស៊ើបសួរ​នោះទេ ក្រៅពី​ការសុំ​ឱ្យ​ទម្លាក់ចោល ការចោទប្រកាន់​មកលើ​លោក កឹម សុខា​ (Kem Sokha) ​។​

លោក​បន្តថា លោក កឹម សុខា (Kem Sokha) កំពុងមាន​បញ្ហា​ជំងឺ​កៀប​សរសៃ​ស្មា​ដែល​នៅតែ​បន្តធ្វើ​ទុក្ខ​ដល់​សុខភាព​របស់លោក​ជា​រៀងរាល់ថ្ងៃ​។​

​គួរ​រំ​ម្លឹ​ក​ផងដែរ​ថា តុលាការ​រាជធានី​ភ្នំពេញ​បាន​បដិសេធ​ចំនួន ៤ លើក​រួចមកហើយ ចំពោះ​សំណើ​សុំឱ្យ​ទម្លាក់ចោល​បទ​ចោទ​លោក កឹម សុខា (Kem Sokha) ។ ការបដិសេធ​ធ្វើឡើង​ក្រោយពេល​ក្រុម​មេធាវី​ការពារ​ក្តី​លោក កឹម សុខា (Kem Sokha) បាន​ព្យាយាម​ដាក់ពាក្យ​ស្នើសុំ​ជាថ្មី​ម្តង​ហើយ​ម្ដងទៀត​។​

ការស្នើសុំ​បិទ​ការ​ស៊ើបសួរ គឺជា​សិទ្ធិ​របស់​មេធាវី ប៉ុន្ដែ​ការសម្រេច គឺ​ចៅក្រម​ស៊ើបសួរ​ជា​អ្នកសម្រេច បើ​យោងទៅតាម​នីតិវិធី​នៃ​ច្បាប់​៕