ក្រៅពី​ទីផ្សា​អាមេរិក និង​អ៊ឺរ៉ុប កម្ពុជា នៅមាន​ទីផ្សារ ចិន អាហ្វ្រិក ម​ឈ្ឈិ​ម​បូព៌ា និង​កូរ៉េ​

1908

​ភ្នំពេញ​៖ សម្ដេច​តេ​ជោ ហ៊ុន សែន នាយករដ្ឋមន្ត្រី​នៃ​កម្ពុជា​បាន​ថ្លែង​ពី​ប្រទេស​ចិន​ថា កម្ពុជា​ត្រូវខិតខំ​បើក​ពង្រីក និង​ពង្រឹង​ទីផ្សារ​ឲ្យ​បាន​ច្រើន​ថែមទៀត ក្រៅពី​ទីផ្សា​អាមេរិក ​និង​អ៊ឺរ៉ុប ដើម្បី​បញ្ចេញ​ទំនិញ និង​ផលិតផល​កសិកម្ម​កម្ពុ​ជា ចេញ​ក្រៅ​ដូចជា នៅក្នុង​ប្រទេស​ចិន អាហ្វ្រិក ម​ឈ្ឈិ​ម​បូព៌ា និង​កូរ៉េ​ជាដើម​។​

សម្ដេច​តេ​ជោ ហ៊ុន សែន បានលើកឡើង​បែបនេះ​នៅក្នុង​ពិធី​ជួប​សំណេះសំណាល និង​សួរសុខទុក្ខ កូន​និស្សិត​ចំនួន​៤៦៨​នាក់ ដែល​កំពុង​សិក្សា​នៅក្នុង ប្រទេស​ចិន​កាលពី​ថ្ងៃទី​២០ ខែមករា ឆ្នាំ​២០១៩ ហើយ​សម្តេច​តេ​ជោ ហ៊ុន សែន បាន​ពន្យល់​អំពី​ស្ថានការណ៍​ពិភពលោក ដល់​និស្សិត​ឲ្យ​បាន​យល់ដឹង​ផងដែរ​។​

​សម្តេច​បាន​មានប្រសាសន៍ថា «​សម្តេច​នឹង​បន្ត​ខិតខំ​ដើម្បី​ពង្រឹង​សេដ្ឋកិច្ច​ប្រទេសជាតិ​ឲ្យ​បាន​រឹងមាំ​បន្ថែមទៀត​»​។ ជាមួយគ្នានេះ​ដែល​សម្តេច​តេ​ជោ សប្បាយរីករាយ និង​មាន​មោទនៈភាព​ដែល​បានឃើញ​កូនក្មួយ និស្សិត​មានឱកាស​បានមក​សិក្សា​នៅ​ប្រទេស​ចិន ដែលជា​ប្រទេស​មហាអំណាច​មួយ​។​

​សម្តេច​តេ​ជោ​នាយករដ្ឋមន្ត្រី​នៅបាន​លើកឡើងថា ក្នុង​ទស្សនកិច្ច​ផ្លូវកា​នៅពេលនេះ​សម្តេច នឹង​ខិតខំ​ជំរុញ​នូវ​កិច្ចសហប្រតិបត្តិការ​លើ​គ្រប់​វិស័យ ជាពិសេស​វិស័យសេដ្ឋកិច្ច ពាណិជ្ជកម្ម វិនិយោគ និង​ទេសចរណ៍ ។ នៅក្នុង​ឆ្នាំ​២០១៧ យើង​ទទួលបាន​ទេសចរ​ចិន​ប្រមាណ​១.២ លាន​នាក់ ហើយ​នៅ​ឆ្នាំ​២០១៨ កន្លងទៅនេះ​ទេសចរ​ចិន​បាន​កើនឡើង​ដល់​១.៩​លាន​នាក់ ។​

គួរ​រម្លឹក​ផងដែរ​ថា សព្វថ្ងៃនេះ​ទំហំ​ពាណិជ្ជកម្ម​កម្ពុជា និង​ចិន​ក៏បាន​កើនឡើង​ដល់ ៥,៦០០​លាន​ដុល្លារ​ហើយ ។ ប្រទេស​ចិន គឺជា​ប្រទេស​បោះទុន​វិនិយោគ​ធំជាងគេ​នៅ​កម្ពុជា នៅក្នុង​វិស័យ​ហេ​ដ្ឋា​រចនា​ស​ម្ព័​ន្ឋ​ផ្លូវថ្នល់​ស្ពាន ស្ពាន​អាកាស និង​វា​រី​អគ្គិសនី​ជាដើម​៕