ថៃ ចាញ់ ចិន ឯ វៀតណាម ឡើងទៅ​វគ្គ ៨​ក្រុម នៃ​ពាន Asian Cup 2019

582

ឌូ​បៃ​៖ ក្រុមបាល់ទាត់​ជម្រើសជាតិ​របស់​ប្រទេស​វៀតណាម ឈ្នះ​ក្រុម​ហ្ស៊​កដា​នី បាន​ឡើងទៅ​វគ្គ​៨​ក្រុម​ចុងក្រោយ នៃ​ពានរង្វាន់​ជើងឯក​ប្រចាំ​ទ្វីបអាស៊ី AFC Asian Cup 2019 នៅ​ប្រទេស​អារ៉ាប់​រួម ខណៈ​ក្រុម​ថៃ បាន​ប្រកួត​ចាញ់​ចិន ២-១ ជ្រុះ​ចេញ​ត្រឹម​វគ្គ ១៦​ក្រុម កាលពី​រាត្រី​ថ្ងៃអាទិត្យ ទី​២០ ខែមករា ឆ្នាំ​២០១៩ កន្លងទៅនេះ​។​

ក្រុមវៀតណាម បាន​របូត​១​គ្រាប់​មុន​នៅ​នាទី​ទី​៣៩ ពី​ការទា​ត់បាល់ Free Kick របស់​ក្រុម​ហ្ស៊​កដា​នី មុនពេល​ត្រូវបាន​ក្រុមវៀតណាម​​ វាយបក​តាម​បាន​ស្មើ ១-១ នៅ​នាទី​ទី​៥១ និង​បន្ត​រហូតដល់​ចប់​ការប្រកួត​ពេញ​ម៉ោង ៩០​នាទី និង​ថែម ១៥​នាទី ២​ដង មុនពេល​កំណត់​កាត់សេចក្តី​ប៉េ​ណា​ល់​ទី ខណៈក្រុម​វៀតណាម ទាត់​ចូល ៤​គ្រាប់ និងក្រុម​ហ្ស៊​កដា​នី ទាត់​ចូល​តែ ២​គ្រាប់​ប៉ុណ្ណោះ​ ដែល​ធ្វើ​ឡើ​ង​នៅ​កីឡដ្ឋាន​ស្ថិតក្នុង​ទីក្រុង​ឌូ​បៃ ប្រទេស​អារ៉ាប់​រួម​។​

សម្រាប់​ក្រុម​ថៃ ត្រូវបានក្រុម​ចិន​វាយបក​យកជ័យ​ជម្នះ ២-១ ក្នុង​វគ្គ​ទី​២ បន្ទាប់ពី​ក្រុម ដំរី​ថៃ​បាន​បើក​ការនាំ​មុខ ១​គ្រាប់​តាំងពី​នាទី​ទី​៣១ វគ្គ​ទី​១​មក និង​អស់សិទ្ធិ​ឡើងទៅ​វគ្គ​៨​ក្រុម​ចុងក្រោយ​តែម្តង​។​

ក្នុង​វគ្គ ៨​ក្រុម ក្រុមវៀតណាម​អាច​ជួប​ក្រុម​ជើង​ខ្លាំង​ប្រចាំ​តំបន់ សា​ម៉ូ​រៃ​ជប៉ុន ឬក៏​អា​រ៉ា​ប៊ី​សា​អូឌីត ខណៈ​ពួកគេ​ត្រូវ​ប្រកួត​គ្នា រាត្រី​ថ្ងៃ​ចន្ទ ទី​២១ ខែមករា ឆ្នាំ​២០១៩ ក្នុង​វគ្គ​១៦​ក្រុម​។ នៅពេលនេះ​រកបាន ៣​ក្រុម​ហើយ​ ដើម្បីឡើងទៅ​វគ្គ ៨​ក្រុម​ចុងក្រោយ រួមមាន វៀតណាម ចិន និង​អ៊ីរ៉ង់​៕