សម្ដេច ហ៊ុន សែន​៖ “​អ្នក​ពូកែ​បាញ់បោះ​យកទៅ​ញាត់​គុក ទាំងអស់​”

1285

​ភ្នំពេញ​៖ “​អ្នក​ពូកែ​បាញ់បោះ យកទៅ​ញាត់​គុក​ទាំងអស់​។ អ្នក​ហ៊ាន​បាញ់បោះ ត្រូវអស់​បុណ្យស័ក្ដិ និង​យកទៅ​កាត់ទោស​” នេះ​គឺជា​សម្ដី​របស់​សម្ដេច​តេ​ជោ ហ៊ុន សែន នាយករដ្ឋមន្ដ្រី​នៃ​កម្ពុជា ថ្លែង​នៅក្នុង​កិច្ចប្រជុំ​គណៈរដ្ឋមន្ដ្រី នៅ​ព្រឹក​ថ្ងៃទី​០៧ ខែមិថុនា ឆ្នាំ​២០១៩​នេះ ដែល​ត្រូវបាន​លោក ខៀវ កាញារីទ្ធ រដ្ឋមន្ដ្រីក្រសួង​ព័ត៌មាន គត់​ត្រា​បាន​នៅក្នុង​កិច្ចប្រជុំ រួចហើយ​សរសេរ​បង្ហោះ នៅក្នុង​គណនី​ហ្វេ​ស​ប៊ុ​ក​ផ្ទាល់ខ្លួន​របស់លោក​។​

កិច្ចប្រជុំ​គណៈរដ្ឋមន្ដ្រី

​សម្ដេច​តេ​ជោ ហ៊ុន សែន បានដាក់​បទបញ្ជា និង​ការព្រមាន​ដក​បុណ្យស័ក្ដិ​ចោល និង​យកទៅ​ដាក់ទោស​តាមច្បាប់​ចំពោះ​ជន​ទាំងឡាយណា ដែល​ពូកែ​ខាង​បាញ់បោះ​សេរី​នេះ ក៏​ព្រោះតែ​ចង់​ដាស់តឿន​ជាថ្មី​ម្ដងទៀត ដល់​អស់លោក​ដែល​ពូកែ​អួតអាង បង្ហាញ​អំណាច​របស់ខ្លួន ដោយ​ការបាញ់បោះ​សេរី ជាពិសេស​លោក​មន្ត្រី​នៅក្នុង​ជួរ​កងកម្លាំងប្រដាប់អាវុធ និង​មួយទៀត​ជា​សារ​ដាស់តឿន​ជូន​ដល់ អ្នកអនុវត្ត​ច្បាប់​ទាំងអស់ ត្រូវធ្វើ​ទៅតាម​ច្បាប់​ចំពោះ​មនុស្ស​គ្រប់រូប ដោយ​មិន​លើកលែង និង​យោគយល់ ក៏ដូចជា​មាន​អន្ដរាគមន៍ ដោយ​ប្រើប្រាស់​ខ្នងបង្អែក​ជាដើម បើទោះបីជា​ដឹងថា ការបាញ់បោះ​សេរី គឺជា​អំពើ​ខុសច្បាប់​ក៏ដោយ​។

កិច្ចប្រជុំ​គណៈរដ្ឋមន្ដ្រី

​គួរ​រំ​ម្លឹ​ក​ផងដែរ​ថា កាលពីពេល​ថ្មីៗ​កន្លងទៅនេះ អនុប្រធាននាយកដ្ឋាន​នគរបាល​ព្រហ្មទណ្ឌ លោក ឌួង ណាគ្រី ដែល​បាន​បាញ់បោះ​សេរី ទាំង​កណ្ដាល​អា​ធ្រា​ត្រ នៅ​ខណ្ឌ​ច្បារអំពៅ ក៏​ត្រូវបាន​ចាប់ខ្លួន​បញ្ជូន ទៅ​កាត់​តុលាការ រហូត​មានការ​ឃុំខ្លួន​ដាក់ពន្ធនាគារ បើ​ទោះ​មាន​កិច្ច​អន្ដរាគមន៍​យ៉ាងណាក៏ដោយ​។ ហើយ​មួយ​ករណី​មួយទៀត កាលពី​ប៉ុន្មាន​ថ្ងៃមុន មន្ដ្រី​យោធា​ម្នាក់ ដែល​បាន​បាញ់បោះ​នៅ ខារ៉ាអូខេ ប៊ី​ហ្គោ ក៏​ត្រូវបាន​ឃាត់ខ្លួន និង​ត្រូវ​តុលា​ការចេញ​ដីកា​ដាក់ពន្ធនាគារ​ផងដែរ​៕