លោកនាយក​រដ្ឋមន្ត្រី លី ស៊ាន​ឡុង តើ​ការកាត់ទោស មេដឹកនាំ​ខ្មែរក្រហម កន្លងទៅនេះ ជាការ​ត្រឹមត្រូវ​ដែរ​ឬ​អត់​?

873

ភ្នំពេញ​៖ សម្តេច​តេ​ជោ ហ៊ុន សែន នាយករដ្ឋមន្ត្រី​កម្ពុជា បានធ្វើការ​ចោទសួរ​ទៅ​លោក លី ស៊ាន​ឡុង នាយករដ្ឋមន្ត្រី​សិង្ហ​បុរី ថា តើ​លោក លី ស៊ាន​ឡុង ចាត់ទុក​ការកាត់ទោស មេដឹកនាំ​ខ្មែរក្រហម កន្លងទៅនេះ​ថា ជាការ​ត្រឹមត្រូវ​ដែរ​ឬ​អត់​?

ការ​ចោទសួរ​របស់​សម្ដេច ហ៊ុន សែន បានធ្វើ​ក្រោយ​ពេលដែល​លោក នាយករដ្ឋមន្ត្រី​សឹង្ហ​បុរី លី ស៊ាន​ឡុង បាន​បង្ហោះ​តាម​ទំព័រ ហ្វេ​ស​ប៊ុ​ក​របស់លោក កាលពី​ថ្ងៃទី​៣១ ខែឧសភា​កន្លង​ទៅដោយ​លើកឡើងថា “​ពេលដែល​គាត់ (​ឧ​ត្ត​ម​សេនី​យ៏ ព្រេ​ម​) ធ្វើជា​នាយករដ្ឋមន្ត្រី (​ថៃ​) គាប់​ជួន​នឹង​ពេលដែល​សមាជិក ASEAN (​កាលនោះ​គ្នា យើង ៥ ប្រទេស​) រួមគ្នា​ប្រឆាំង​ការឈ្លានពាន​របស់​វៀត​ណា​ម​មកលើ​កម្ពុជា និង​ប្រឆាំង​រដ្ឋាភិបាល​កម្ពុជា ដែល​បាន​ជំនួស​ខ្មែរក្រហម​។​…”​។​

សម្ដេច ហ៊ុន សែន និងលោក  លី ស៊ាន​ឡុង

​សម្ដេច ហ៊ុន សែន បាន​សម្ដែង​ការសោកស្ដាយ​យ៉ាងខ្លាំង ចំពោះ​ការ​បង្ហោះ​សារ​របស់លោក នាយករដ្ឋមន្ត្រី​សឹង្ហ​បុរី លី ស៊ាន​ឡុង ព្រោះតែ ការលើកឡើង​នេះ​បង្ហាញថា កាលនោះ​សឹង្ហ​បុរី បាន​គាំទ្រ​របប​ប្រល័យ​ពូជ​សាស​ន៏ និង​ចង់​ឲ្យ​របប​ប្រល័យ​ពូជ​សាស​ន៏​វិល​ត្រឡប់មក​កម្ពុជា​វិញ​ដែរ​។ សឹង្ហ​បុរី បាន​ធ្វើជា​ម្ចាស់ផ្ទះ​រៀបចំ​ការប្រជុំ ដែល​នាំ​ដល់​ការបង្កើត​រដ្ឋាភិបាលចំរុះ​ត្រីភាគី កម្ពុជា​ប្រជាធិបតេយ្យ និង​អូសបន្លាយ​សង្គ្រាម​នៅ​កម្ពុជា និង​ទុក្ខវេទនា​របស់​ប្រជាជន​កម្ពុជា ជាង​១០ ឆ្នាំ​ថែមទៀត ហើយ​ដែល​ស្មើនឹង ការប្រឆាំង​នឹង​ការ​រស់​ឡើងវិញ របស់​ប្រជាជន​កម្ពុជា​ផងដែរ​។​

​សម្ដេច​តេ​ជោ បាន​បន្តទៀតថា ការលើកឡើង​នេះ ក៏​ជាការ​ប្រមាថ​ដល់​ពលិកម្ម​សាច់​ស្រស់​ឈាម​ស្រស់ របស់​កងទ័ព​ស្ម័គ្រចិត្ត​វៀតណាម ដែល​បាន​ជួយ​រំដោះ​កម្ពុជា ឲ្យ​រួច​ផុតពី​របប​ប្រល័យ​ពូជ​សាស​ន៏​ប៉ុលពត​។ ការលើកឡើង​របស់​ឯក​ឧ​ត្ត​ម លី ស៊ាន​ឡុង នាពេលនេះ​ក៏បាន​បង្ហាញ​ប្រជាជន​សាំង​កាពួ និង​ពិភពលោក​ថា មេដឹកនាំ​សឹង្ហ​បុរី​នាពេលនោះ បានរួម​ចំណែក​សម្លាប់​ប្រជាជន​កម្ពុជា​យ៉ាងពិត​ប្រាកដ​។​

​ក្នុង​កិច្ចប្រជុំ​គណៈរដ្ឋមន្ត្រី​នៅ​ព្រឹក​ថ្ងៃទី​០៧ ខែមិថុនា ឆ្នាំ​២០១៩​នេះ សម្តេច​តេ​ជោ ហ៊ុន សែន បាន​ទូន្មាន​ទៅកាន់​នាយករដ្ឋមន្ត្រី​សិង្ហ​បុរី លោក លី ស៊ាន​ឡុង​ថា “​យើង​គួរ​ថ្នាក់ថ្នម​ទំនាក់ទំនង​រវាង​រដ្ឋា​ភិ​បាល និង​រដ្ឋាភិបាល​ក៏ដូចជា​ប្រជាជន​និង​ប្រជាជន នៅក្នុង​ប្រជាជាតិ​អាស៊ាន​”​។​

​ការលើកឡើង​របស់លោក លី ស៊ាន​ឡុង នាយករដ្ឋមន្ត្រី​សិង្ហ​បុរី ចាត់ទុកជា​ការជ្រៀតជ្រែក​ដល់​ដែន​អធិបតេយ្យ​ជាតិ​កម្ពុជា​ផ្ទុយ​ពី​រដ្ឋធម្មនុញ្ញ​អាស៊ាន​៕​