កម្ពុជា នឹងពង្រីកលទ្ធភាពផ្គត់ផ្គង់អគ្គិសនី បន្ថែមទៀតនៅក្នុងឆ្នាំ ២០១៩

866
Power poles in Cambodia

ភ្នំពេញ៖ រាជ​រដ្ឋាភិបាលកម្ពុជា បាន​សម្រេច​បង្កើន​លទ្ធភាព​ នៃការ​ផ្គត់ផ្គង់​ថាមពល​អគ្គិសនី ឲ្យដល់​ជាង ២៨៧០​មេហ្គាវ៉ាត់ ដើម្បី​ឆ្លើយតប​ទៅនឹង​តម្រូវការ​ប្រើប្រាស់ ​របស់​ប្រជាពលរដ្ឋ និង​កំណើន​ការ​ពង្រីក​រោងចក្រ​សហគ្រាស​នៅ​កម្ពុជា។ នេះបើតាម​ការចុះផ្សាយ នៅក្នុង​វេបសាយ​ក្រសួងព័ត៌មាន កាលពីថ្ងៃទី​៣ ខែ​មករា ឆ្នាំ​២០១៩។

អ្នក​នាំពាក្យ​ក្រសួង​រ៉ែ និង​ថាមពល លោក វ៉ិចទ័រ ហ្ស៊ូណា ​ បាន​ឲ្យដឹង​ថា ការ​ពង្រីក​លទ្ធភាព​ផ្គត់ផ្គង់​អគ្គិសនី​នេះ ដោយសារតែ​កំណើន​នៃការ​ប្រើប្រាស់​ ក្នុង​រយៈពេល​ចុងក្រោយ​នេះ បាន​កើនឡើង​យ៉ាងច្រើន​ហួស​ប្រមាណ​លើសពីការ​រំពឹង​ទុក ជាពិសេស​ការ​ពង្រីក​គម្រោង​វិនិយោគ​នានា​ទាំង​សំណង់ និង​រោងចក្រ​សហគ្រាស ​ដែល​ត្រូវការ​ថាមពល​អគ្គិសនី​ជាច្រើន។

លោក​បន្ត​ថា ប្រភព​ថាមពល​ដែល​ទទួល​បាន ​គឺ​មកពី​រោងចក្រ​ផលិត​ធ្យូងថ្ម​នៅខេត្ត​ព្រះសីហនុ ការបើក​ឱ្យ​ដំណើរការ​ពេញលេញ​ នៃ​​វារី​អគ្គិសនី​សេសាន​ក្រោម២ និង​គម្រោង​ដាក់​ឱ្យ​ប្រើប្រាស់ ​ថាមពល​អគ្គិសនី​ ដើរដោយ​ថាមពល​ពន្លឺ​ព្រះអាទិត្យ​នៅចុងឆ្នាំ​២០១៩​ខាងមុខ​នេះ។ បន្ថែមពីនេះ​ទៀត គឺការ​នាំចូល​ប្រភព​ថាមពល​អគ្គិសនី​ ពី​ប្រទេស​ជិតខាង​ដូចជា ប្រទេស​វៀតណាម ចំនួន ២៧៧​មេហ្គាវ៉ាត់, ថៃ​ចំនួន​ជាង ១៣៥ មេហ្គាវ៉ាត់ និង​ពី​ប្រទេស​ឡាវ​ចំនួន ៣០​មេហ្គាវ៉ាត់។

មន្រ្តី​អ្នកនាំពាក្យ​រូបនេះ បន្ថែម​ថា ក្នុង​ផែនការ​ពង្រីក​ការ​ផ្គត់ផ្គង់​ប្រភព​ថាមពល​អគ្គិសនី ​ជូនដល់​ប្រជាពលរដ្ឋ​នេះ រាជ​រដ្ឋាភិបាលកម្ពុជា ​ក៏បាន​ត្រៀម​បញ្ចុះ​តម្លៃ​អគ្គិសនី​ផងដែរ ចាប់ពី​ថ្ងៃទី​២០ ខែ​មករា ឆ្នាំ​២០១៩​តទៅ ដើម្បី​ជួយ​សម្រួល​ដល់ការ​ចំណាយ​របស់​ប្រជាពលរដ្ឋ។

យោងតាម​តារាង​តម្លៃ​អគ្គិសនី​សម្រាប់​ឆ្នាំ​២០១៩ បាន​បង្ហាញ​ថា សម្រាប់​លំនៅឋាន​ដែល​ប្រើប្រាស់​អគ្គិសនី​ចាប់ពី៖

-១ ដល់ ១០​គីឡូវ៉ាត់​ម៉ោង​ក្នុង ១​ខែ តម្លៃ​អគ្គិសនី​ នឹងត្រូវ​ចុះពី ៤៨០ រៀល​នៅឆ្នាំ ២០១៨ មក​នៅ ៣៨០​រៀល ក្នុង​ឆ្នាំ​២០១៩ និងឆ្នាំ​២០២០

-ចាប់ពី ១១ដល់៥០ គីឡូវ៉ាត់ក្នុង ១ ខែ នឹងត្រូវចុះពី ៦១០ រៀលនៅឆ្នាំ ២០១៨ ទៅ ៤៨០ រៀលនៅឆ្នាំ ២០១៩ និងឆ្នាំ២០២០

-ចាប់ពី ៥១ដល់២០០ គីឡូវ៉ាត់ក្នុង ១ ខែតម្លៃអគ្គិសនីនឹងត្រូវចុះពី ៧៧០ រៀលនៅឆ្នាំ២០១៨ ទៅ ៦១០ រៀល។

លោក ឆឹង ស៊ីណា តំណាង​អគ្គិសនី​ជនបទ បាន​ឲ្យដឹង​ថា ប្រជាពលរដ្ឋ​នៅតាម​ជនបទ មាន​កំណើន​នៃការ​ប្រើប្រាស់​ថាមពល​អគ្គិសនី​កើនឡើង​ជិត ២ដង ដោយសារ​ការ​ពង្រីក​លំនៅឋាន​ថ្មី និងការ​ប្រើប្រាស់​សម្ភារៈ​អេឡិចត្រូនិច​មាន​ទូរទស្សន៍ កង្ហា ម៉ាស៊ីន​បោក​ខោអាវ និង​ម៉ាស៊ីន​ត្រជាក់​ជាដើម។

លោក​បញ្ជាក់​ថា ក្រុម​សេវាករ​ដែលជា​សមាជិក​ នៃ​សមាគម​អគ្គិសនី​ជនបទ នឹង​ខិតខំ​ពង្រីក​ការ​ត​បណ្តាញ​អគ្គិសនី ជូនដល់​ប្រជាពលរដ្ឋ​ ដែល​រស់នៅ​ភូមិ​ឆ្ងាយៗ​ ពី​ខ្សែ​បណ្តាញ​ជាតិ ដើម្បី​ឱ្យ​ពួកគេ​មាន​លទ្ធភាព​ប្រើប្រាស់​អគ្គិសនី​ ដូច​ប្រជាពលរដ្ឋ​ដ៏ទៃ​ទៀត។

សូម​បញ្ជាក់​ថា កាលពីឆ្នាំ​២០១៨​កន្លងទៅ​នេះ កម្ពុជា​បាន​ប្រើប្រាស់​ប្រភព​ថាមមពល​អគ្គិសនី​ ក្នុង​ទំហំជាង​ ២៦៥០​មេហ្គាវ៉ាត់ ដែលបាន​គ្រប​ដណ្តប់​លំនៅឋាន​របស់​ប្រជាពលរដ្ឋ​ជាង ៨៣ភាគរយ៕