វៀតណាម៖ លោក Nguyen Xuan Phuc នាយករដ្ឋមន្ត្រីវៀតណាមបានថ្លែងថា វៀតណាមអាចនឹងក្លាយជាប្រទេសអភិវឌ្ឍកសិកម្មមួយ ក្នុងចំណោមប្រទេសអភិវឌ្ឍកសិកម្មទាំង ១៥ នៅលើពិភពលោក ក្នុងអំឡុងពេល ១០ឆ្នាំខាងមុខ។
លោកនាយរដ្ឋមន្ត្រីវៀតណាម បានថ្លែងបែបនេះ នៅក្នុងកិច្ចប្រជុំបូកសរុបលទ្ធផលក្នុងឆ្នាំ២០១៨ និងផែនការក្នុងឆ្នាំ២០១៩ សម្រាប់ក្រសួងកសិកម្ម និងអភិវឌ្ឍន៍ជនបទ កាលពីថ្ងៃទី៣ ខែមករា ឆ្នាំ២០១៩ នៅក្រុងហាណូយ។
លោក Nguyen Xuan Phuc បានឲ្យដឹងថា ក្នុងឆ្នាំ២០១៨ វៀតណាម បានជាប់ចំណាត់ថ្នាក់លេខ២ នៅតំបន់អាស៊ីអាគ្នេយ៍ ក្នុងការនាំចេញផលិតផលកសិកម្ម។ ទន្ទឹមនេះ រោងចក្រកែច្នៃកសិកម្មចំនួន ១៨កន្លែង ត្រូវបានសាងសង់ និងដាក់ឲ្យប្រើប្រាស់។ ជាងនេះទៅទៀត រដ្ឋាភិបាលវៀតណាម បានធ្វើការអនុគ្រោះលើ ១៧៣ចំណុច ក្នុងចំណោម ៣៤៥ចំណុច ដើម្បីបង្កភាពងាយស្រួល ដល់ក្រុមហ៊ុនវិនិយោគនានា។
បន្ថែមពីនេះ លោកនាយករដ្ឋមន្ត្រីវៀតណាម បានដាក់ចេញផែនការ ដើម្បីប្រែក្លាយវៀតណាមជាប្រទេសកែច្នៃនិងនាំចេញឈើ ព្រមទាំងនាំចេញបង្គាធំបំផុតមួយ នៅលើពិភពលោក៕
