ភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានលើកឡើងថា ការខ្វះខាត់អគ្គិសនីក្នុងឆ្នាំនេះ គឺជាបទពិសោធន៍ និងផ្ដល់ជាមេរៀនយ៉ាងច្រើន សម្រាប់រាជរដ្ឋាភិបាលកម្ពុជា ប៉ុន្តែបន្ទាប់ពីឆ្លងកាត់មេរៀននេះរួចហើយ សម្តេច ហ៊ុន សែន បានបញ្ជាក់អះអាងថា នឹងគ្មានបញ្ហាដូចនេះ កើតឡើងជាថ្មីទៀតឡើយនៅឆ្នាំក្រោយ។
សម្តេចតេជោ ហ៊ុន សែន បានលើកឡើងបែបនេះ នៅក្នុងឱកាសដែលសម្តេចអញ្ជើញជាអធិបតីភាព ក្នុងពិធីប្រគល់សញ្ញាបត្រ ដល់និស្សិតសាកលវិទ្យាល័យភូមិន្ទភ្នំពេញ (RUPP) ប្រមាណ ៣,១៦១នាក់ នៅមជ្ឈមណ្ឌលពិព័រណ៍ និងសន្និបាតកោះពេជ្រ កាលពីថ្ងៃទី០៣ ខែមិថុនា ឆ្នាំ២០១៩ កន្លងទៅនេះ។
តើ សម្ដេច ហ៊ុន សែន សំអាងទៅលើហេតុផលអ្វីខ្លះ ទើបសម្ដេចហ៊ានអះអាងបែបនេះ?
ហេតុផលមានច្រើន ដូចជា រាជរដ្ឋាភិបាលកម្ពុជា បាននិងកំពុងដាក់ដំណើរការប្រមូលអគ្គិសនី ពីប្រភពផ្សេងៗទៀត ក្រៅពីការពឹងផ្អែកលើវារីអគ្គិសនី ដែលមិនអាចដំណើរការបាន នៅពេលគ្មានទឹកគ្រប់គ្រាន់ ពោលគឺនៅក្នុងរដូវប្រាំង។ ប្រភពអគ្គិសនីទាំងនោះរួមមាន រោងចក្រអគ្គិសនីដើរដោយធ្យូងថ្ម, ការវិនិយោគលើម៉ាស៊ីភ្លើងដោយប្រើប្រេង និងរោងចក្រអគ្គិសនី ប្រើប្រាស់ថាមពលពន្លឺព្រះអាទិត្យ ជាដើម។
បច្ចុប្បន្ននេះរោងចក្រផលិតអគ្គិសនី ដើរដោយធ្យូងថ្មចំនួន៣ បានដំណើរការហើយ ដែលមានកម្លាំង ៣៧០មេហ្គាវ៉ាត់ និងរោងចក្រមួយទៀតដែលមានអនុភាព ១៣០មេហ្គាវ៉ាត់ នឹងត្រូវដាក់ឲ្យដំណើរការផងដែរ។
សម្រាប់ឆ្នាំក្រោយនៅទីក្រុងភ្នំពេញ គឺត្រូវមានម៉ាស៊ីនភ្លើងត្រៀម ដែលមានអនុភាព៤០០មេហ្គាវ៉ាត់ (២០០មេហ្គាវ៉ាត់ បានមកពីទិញម៉ាស៊ីនពីប្រទេសហ្វាំងឡង់ និង២០០មេហ្គាវ៉ាត់ទៀតទិញអាល្លឺមង៉ ដែលប្រើប្រេងខ្មៅ) ដែលត្រូវបានអនុម័តថវិកា និងចាប់ផ្តើមបញ្ជាទិញ ធ្វើយ៉ាងណាខែតុលាឆ្នាំនេះឲ្យរួចរាល់ ដើម្បីត្រៀមទុកពេលវារីអគ្គិសនីបញ្ចេញភ្លើងមិនគ្រប់ គឺម៉ាស៊ីនភ្លើង ៤០០មេហ្គាវ៉ាត់ នេះ នឹងជួយផ្គត់ផ្គង់ថាមពលនៅទីក្រុងភ្នំពេញ។
បន្ថែមពីនេះទៅទៀតនោះ ក្នុងដំណើរទស្សនកិច្ចនៅប្រទេសជប៉ុន កាលពីសប្តាហ៍មុននេះ សម្តេចតេជោ ហ៊ុន សែន ក៏បានពិភាក្សាជាមួយលោកនាយករដ្ឋមន្ត្រីជប៉ុន ដើម្បីឲ្យរដ្ឋាភិបាលជប៉ុនជួយដល់កម្ពុជា លើបញ្ហាខ្វះខាតអគ្គិសនី ដោយសុំឲ្យជប៉ុនផ្តល់នូវហិរញ្ញប្បទាន ដើម្បីបន្តការវិនិយោគលើបណ្តាញតង់ស្យុងខ្ពស់ ៥០០គីឡូវ៉ុល ចាប់ពីព្រំដែនឡាវ មកដល់រាជធានីភ្នំពេញ ដែលមានចម្ងាយ ៣៥០គីឡូម៉ែត្រ ព្រោះកម្ពុជាបានចរចាជាមួយឡាវរួចហើយ ដោយឡាវមានអគ្គិសនីតែគ្មានទីផ្សារដើម្បីបញ្ចេញ។
ចំណែកផែនការសម្រាប់វិស័យអគ្គិសនី ត្រូវបានរៀបចំឡើងវិញផងដែរ ដើម្បីឆ្លើយតបនឹងការរីកលូតលាស់ដ៏ឆាប់រហ័ស របស់ប្រទេសកម្ពុជា។
អ្វីៗដែលរាជរដ្ឋាភិបាលកម្ពុជាបានខិតខំធ្វើនេះ នឹងធ្វើឲ្យឆ្នាំក្រោយនៅទីក្រុងភ្នំពេញ មិនខ្វះអគ្គិសនីប្រើប្រាស់ ឬហេតុផលណាមួយ ដែលនាំឲ្យខ្វះអគ្គិសនីប្រើប្រាស់ ទៀតនោះទេ។
ដូចដែលសម្ដេចតេជោ ហ៊ុន សែន បានលើកឡើងថា “យើងនៅមានបញ្ហាខ្វះខាតទឹក សម្រាប់ប្រើប្រាស់លើវារីអគ្គិសនី ដែលធ្វើឲ្យអគ្គិសនីរបស់យើង គ្មានស្ថិរភាពនៅក្នុងការផ្គត់ផ្គង់។ ឆ្នាំនេះជាបទពិសោធន៍ផ្តល់មេរៀនឲ្យយើងច្រើន ដែលយើងត្រូវខិតខំរកវិធីដោះស្រាយ ដើម្បីកុំឲ្យជួយបញ្ហាច្រំដែលនៅឆ្នាំខាងមុខ ។ វារីអគ្គិសនីរបស់យើងមានកម្លាំងជិត ១៤០០មេហ្គាវ៉ាត់ ប៉ុន្តែផលិតថ្ងៃខ្លះបានត្រឹមតែ១០០ឬ ២០០មេហ្គាវ៉ាត់ទេ យប់មិញផលិតបានទៅដល់៦០០មេហ្គាវ៉ាត់ ….. ចំនួននេះ គឺជាចំនួនមិនគ្រប់ទេ តែយើងបានប្រឹងប្រែងអស់លទ្ធភាព ដើម្បីកាត់បន្ថយការដាច់អគ្គិសនី”។
សម្តេចតេជោ ហ៊ុន សែន ក៏បានថ្លែងសុំការយោគយល់ពីប្រជាពលរដ្ឋ ដែលជួបការលំបាកដោយសារការខ្វះថាមពលអគ្គិសនី នាពេលកន្លងទៅដែលមានការកាត់ផ្តាច់ភ្លើង ប៉ុន្តែនៅឆ្នាំក្រោយមិនមានបញ្ហាបែបនេះ កើតឡើងទៀតនោះឡើយ បើវារីអគ្គិសនីមិនដើរ ក៏ម៉ាស៊ីនផលិតថាមពលដើរដោយធ្យូងថ្ម ដើរដោយហ្គាស និងដើរដោយប្រេងនៅតែដំណើរការ ដើម្បីបំពេញនូវការខ្វះខាត៕
