ប្រទេស​កម្ពុជា មាន​សក្ដានុពល​សំខាន់ៗ ៤ + សន្តិភាព សម្រាប់​អ្នកវិនិយោគ​

918

ភ្នំពេញ​៖ សក្ដានុពល និង​ឧត្តមភាព​សំខាន់ៗ​ចំនួន​៤​របស់​កម្ពុជា ត្រូវបាន​លាតត្រដាង​ប្រាប់​ដល់​ធុរជន និង​អ្នកវិនិយោគ សម្រាប់​ធ្វើជា​ទុន​ក្នុងការ​ពិចារណា បោះទុន​វិនិយោគ​នៅក្នុង​ប្រទេស​កម្ពុជា ដោយ​សម្ដេច​តេ​ជោ ហ៊ុន សែន នាយករដ្ឋមន្ដ្រី​នៃ​កម្ពុជា នៅក្នុង​វេទិការ​ធុរកិច្ច​កម្ពុជា​-​នេ​ប៉ាល់ នៅ​រសៀល​ថ្ងៃទី​១៤ ខែឧសភា ឆ្នាំ​២០១៩​។​

សម្ដេច​តេ​ជោ ហ៊ុន សែន និងនាយករដ្ឋមន្ដ្រីនេប៉ាល់

​សម្ដេច​តេ​ជោ ហ៊ុន សែន បានបង្ហាញ​អំពី​សក្ដានុពល​នៃ​ការវិនិយោគ និង​ឧត្តមភាព​សំខាន់ៗ​ចំនួន​៤​របស់​កម្ពុជា រួមមាន​៖

  1. ៖ ភាព​អំណោយផល នៃ​ស្ថិរភាព​នយោបាយ និង​ម៉ាក្រូសេដ្ឋកិច្ច​។​
  2. ៖ ការបើកចំហ​សេដ្ឋកិច្ច​សម្រាប់​អ្នកវិនិយោគ​ទាំងអស់ ដោយ​គ្មាន​ការរើសអើង​រវាង​អ្នកវិនិយោគ​កម្ពុជា និង​អ្នកវិនិយោគ​បរទេស​។​
  3. ៖ កម្លាំង​ពលកម្ម​ដែលមាន​ភាពសម្បូរ​បែប និង​វ័យក្មេង ដែល​ក្នុងនោះ​ប្រជាជន​ដែលមាន​អាយុ​៣៥​ឆ្នាំ​ចុះ មាន​ចំនួន​ដល់​ទៅ​៧២​ភាគរយ នៃ​ចំនួន​ប្រជាជន​សរុប គួបផ្សំ​នឹង​ប្រាក់​ឈ្នួល​ដែលមាន​ភាព​ប្រកួតប្រជែង​។​
  4. ៖ កម្ពុជា​ស្ថិតនៅលើ​ទីតាំង​ជា​យុទ្ធសាស្ត្រ ក្នុង​តំបន់​អាស៊ាន ដែល​តំបន់​នេះ​បាននិងកំពុង​ក្លាយជា «​រោងចក្រ នៃ​អាស៊ី​»​។ ទំនិញ​ផលិត​នៅ​កម្ពុជា អាច​ផ្គត់ផ្គង់​ទីផ្សារ​នៅក្នុង​ស្រុក​, ទីផ្សារ​អនុតំបន់​មេគង្គ​, ទីផ្សារ​អាស៊ាន និង​ទីផ្សារ​សំខាន់ៗ​ដទៃទៀត​ក្នុង​ពិភពលោក​។​

​លើសពី​សក្ដានុពល​សំខាន់ៗ ទាំង​៤ នេះ សម្ដេច​តេ​ជោ ហ៊ុន សែន បាន​យក សន្តិភាព សន្តិសុខ និង​ស្ថិរភាព​នយោបាយ មក​ធានា​ជូន​អ្នកវិនិយោគ​គ្រប់រូប ក៏ដូចជា ស្ថិរភាព​ម៉ាក្រូសេដ្ឋកិច្ច ក្របខណ្ឌ​ច្បាប់ និង​ស្ថាប័ន​ដែល​ប្រកបដោយ​ប្រសិទ្ធភាព តម្លាភាព គណនេយ្យភាព និង​ភាព​អាច​ប៉ាន់ប្រមាណ​បាន​៕

អត្ថបទផ្សេងទៀត៖ កម្ពុជា មាន​ចំណុច​ពិសេស ៥​យ៉ាង សម្រាប់​ទាក់ទាញ​អ្នកវិនិយោគ ឲ្យ​មក​មក​បោះទុន​រកស៊ី​