កម្ពុជា នឹង​ចរចា​ជាមួយ ចិន ដើម្បី​នាំចេញ ផ្លែស្វាយ​, ល្ហុង​, ស្រកានាគ និង​សំបុក​ត្រចៀកកាំ​

1112

ភ្នំពេញ​៖ លោក វ៉េង សាខុន រដ្ឋមន្ត្រី​ក្រសួងកសិកម្ម បាន​បង្ហើប​ឲ្យ​ដឹង​កាលពី​សប្តាហ៍​មុន​ថា ប្រទេស​កម្ពុជា និង​ប្រទេស​ចិន នឹងធ្វើ​ការចរចា នៅ​ខែកក្កដា​ខាងមុខនេះ ដើម្បី​ពិភាក្សា​ពី​ការនាំចេញ​នូវ​ផ្លែស្វាយ​, ផ្លែ​ល្ហុង​, ផ្លែ​ស្រកានាគ និង​សំបុក​ត្រចៀកកាំ ទៅកាន់​ទីផ្សារ​ប្រទេស​ចិន​។​

​ការលើកឡើង​របស់លោក​រដ្ឋមន្ត្រី វ៉េង សាខុន បាន​ធ្វើឡើង​នៅក្នុង​ពិធី​សម្ពោធ​រោងចក្រ​វេច​ខ្ចប់ និង​នាំចេញ ចេកអំបូង​លឿង ទៅកាន់​ប្រទេស​ចិន នៅក្នុង​ខេត្តកំពត ដែលមាន​ឈ្មោះ Longmat Agriculture Co., Ltd ។​

លោក​រដ្ឋមន្ត្រី វ៉េង សាខុន

​លោក​រដ្ឋមន្ត្រី វ៉េង សាខុន បាន​បញ្ជាក់ថា​៖ “​ខ្ញុំ​បានស្នើ​សុំ​ឲ្យ​អគ្គនាយក​នៃ​វិស័យ​កសិកម្ម ធ្វើការ​ជាមួយ​ក្រុមហ៊ុន​ត្រួតពិនិត្យ និង​អធិការកិច្ច ចិន និង​ក្រសួងការបរទេស​ដើម្បី​ព​ន្លឿ​ន​ដំណើរការ​នេះ​។​”

​ទន្ទឹមនឹង​នេះដែរ លោក​រដ្ឋមន្ត្រី វ៉េង សាខុន បាន​ប្រាប់ទៀតថា ការនាំចេញ​ផ្លែស្វាយ​កម្ពុជា​ទៅ​កូរ៉េខាងត្បូង​លើកដំបូង​នឹង​ត្រូវបាន​ពន្យារពេល ដោយសារតែ​ក្រុមហ៊ុននាំចេញ Hyundai Corporation មិនទាន់បាន​ឆ្លងកាត់​ការត្រួតពិនិត្យ ដោយ​ទីភ្នាក់ងារ​សត្វ កាកសំណល់​សត្វ រុក្ខជាតិ (APQA) កាលពី​ខែមីនា​។ ដូចនេះ​ក្រុមហ៊ុននាំចេញ​ត្រូវបំពេញ​តាម​ស្តង់ដារ អនាម័យ ផលិតផល​កសិកម្ម នៅក្នុង​ទីផ្សារ​ប្រទេស​កូរ៉េ ជាមុនសិន​ទើប​អាច​ចាប់ផ្ដើម​នាំចេញ​ទៅបាន ទោះបីជា​ក្រុមហ៊ុន Hyundai បាន​ប្រើប្រាស់​បច្ចេកវិទ្យា​ចុងក្រោយ ដើម្បី​ការពារ លាង​សម្អាត​ផលិតផល​របស់ខ្លួន​ក៏ដោយ ក៏ APQA មិនបាន​អនុញ្ញាត​ឲ្យ​មានការ​ដឹកជញ្ជូន​ដែរ​។​

ផ្លែស្វាយ

​គួរ​រំ​ម្លឹ​ក​ផងដែរ​ថា ក្រុមហ៊ុន Hyundai របស់​ប្រទេស​កូរ៉េ បាន​សហការ​ជាមួយ​ក្រុមហ៊ុន​ដាំ​ស្វាយ​ក្នុងស្រុក​ឈ្មោះ Mao Legacy ដើម្បី​ដាំ​ដើម​ស្វាយ​នៅលើ​ផ្ទៃដី ២៤០០ ហិកតា​នៅ​ខេត្តកំពង់ស្ពឺ​។ ហើយ​កាលពី​ខែធ្នូ ឆ្នាំ​២០១៨ ក្រុមហ៊ុន Hyundai បាន​បើក​ដំណើរការ​រោងចក្រ​សម្អាត​ផ្លែឈើ ដែលមាន​ទំហំ ៣ ហិកតា នៅក្នុង​ស្រុក​ភ្នំស្រួច ខេត្តកំពង់ស្ពឺ ដែល​អាច​នាំចេញ​ផ្លែឈើ​សម្អាត​រួច​រហូតដល់​ទៅ ៥០.០០០ តោន​ក្នុង​មួយឆ្នាំ ដោយ​រួមបញ្ចូល​ទាំង​ផ្លែ​ដូង​, ផ្លែ​ធូ​រេ​ន និង​ផ្លែ​មង្ឃុត​៕​