ប្រជាជន​ចិន អំពាវនាវ​ឲ្យឈប់​ប្រើ​ផលិតផល​របស់ Apple ក្រោយ​អាមេរិក បិទផ្លូវ ​Huawei

426

​ប្រទេស​ចិន​៖ ប្រជាជន​ចិន បាន​ប្រតិកម្ម​ទៅនឹង​ការ​សម្ពាធ​របស់​សហរ​ដ្ឋ​អាមេរិក ចំពោះ​ក្រុមហ៊ុន Huawei ដោយបាន​ប្រកាស​ឈប់​ប្រើប្រាស់ ផលិតផល​របស់​ក្រុមហ៊ុន Apple របស់​អាមេរិក​វិញ បន្ទាប់ពី​លោក​ប្រធានាធិបតី​អាមេរិក Donald Trump បាន​ចុះហត្ថលេខា​លើ​បទបញ្ជា​មួយ​កាលពី​ថ្ងៃ​ពុធ ដែល​ហាមប្រាម​ក្រុមហ៊ុន​ទូរគមនាគមន៍​អាមេរិក មិន​ឲ្យ​ប្រើប្រាស់​និង​ដំឡើង​ឧបករណ៍​បរិក្ខារ​រប​ស់បរ​ទេស ដែល​អាច​បង្ក​ការគំរាមកំហែង​ដល់​សន្តិសុខ​ជាតិ និង​ដាក់បទបញ្ជា​ដាច់ដោយឡែក​មួយទៀត ដែល​ហាម​មិន​ឲ្យ​ក្រុមហ៊ុន​បច្ចេកវិទ្យា​អាមេរិក លក់​បច្ចេកវិទ្យា​ទៅ​ឲ្យ​ក្រុមហ៊ុន Huawei ដោយ​គ្មាន​ការយល់ព្រម​ពី​រដ្ឋាភិបាល​អាមេរិក​។​

ហាង Apple នៅប្រទេសចិន

អ្នកប្រើប្រាស់​ចិន​បានសរសេរថា​៖ មុខងារ​របស់​ស្មា​ត​ហ្វូ​ន Huawei គឺ​ស្រដៀង​ទៅនឹង Apple iPhone ឫ​ក៏​ល្អ​ជាង​នេះ​។ យើង​មាន​ជម្រើស​ក្នុងការ​ប្រើប្រាស់​ស្មា​ត​ហ្វូ​ន​ល្អ​បែបនេះ ហេតុអ្វី​យើង​នៅតែ​ប្រើ Apple?”

គណនី​ភាសា​ចិន​មួយ​នៅលើ​បណ្ដាញ Twitter បាន​ប្រតិកម្ម​នៅក្នុង​របៀប​ស្រដៀង​គ្នា​នេះដែរ​ថា​៖ “​ចំពោះ​សង្គ្រាម​ពាណិជ្ជកម្ម​ដែល​បានចាប់ផ្តើម ដោយ​សហរដ្ឋអាមេរិក​នោះ ប្រទេស​ចិន​បានបង្ហាញ​អាកប្បកិរិយា​របស់ខ្លួន​យូរ​មកហើយ​ថា មិន​ចង់​ប្រយុទ្ធ​នោះទេ ប៉ុន្តែ​ក៏​មិន​ភ័យខ្លាច​នៅក្នុង​ការប្រយុទ្ធ​ចំពោះ​សង្គ្រាម​នេះដែរ “​។​

​បើ​យោងតាម​របាយការណ៍ ការលក់​របស់​ក្រុមហ៊ុន Apple នៅក្នុង​ប្រទេស​ចិន បាន​ធ្លាក់ចុះ ២០% នៅក្នុង​ត្រីមាស​ចុងក្រោយ​នៃ​ឆ្នាំ ២០១៨ ខណៈដែល​ការលក់​ស្មា​ត​ហ្វូ​ន​របស់​ក្រុមហ៊ុន Huawei បាន​កើនឡើង​ជិត ២៥% ក្នុង​រយៈពេល​ដូចគ្នា​។​

ហាង Huawei នៅប្រទេសចិន

​លោក Tim Cook អគ្គនាយក​ក្រុមហ៊ុន Apple បាន​សរសេរ​នៅក្នុង​លិខិត​មួយ​ផ្ញើ​ទៅកាន់​អ្នកវិនិយោគទុន​កាលពី​ខែមករា​ថា “​យើង​មិនបាន​មើលឃើញ ពី​ទំហំ​នៃ​ការកាត់បន្ថយ​ខាង​ផ្នែក​សេដ្ឋកិច្ច​នេះ​ទេ ជាពិសេស​នៅក្នុង​ប្រទេស​ចិន​” ។​

​ក្រុមអ្នកវិភាគ​នៅ​ក្រុមហ៊ុន JP Morgan បាន​ប៉ាន់​ស្មានថា ក្រុមហ៊ុន Apple នឹងត្រូវ​បង្កើន​តម្លៃ iPhone រហូតដល់ 14 ភាគរយ​។ ទោះជា​យ៉ាងណាក៏ដោយ ការដាក់ទណ្ឌកម្ម​បន្ថែមទៀត ដែល​គ្របដណ្តប់​លើ​ពន្ធ ដែល​អាច​កើតមាន​របស់​សហរដ្ឋ​អាមេរិក ក្នុង​ទំហំ ៣០០ ពាន់​លាន​ដុល្លារ ក៏​នឹង​រួមបញ្ចូល​ទាំង​កុំព្យូទ័រ​យួរដៃ និង​ស្មា​ត​ហ្វូ​ន ដែល​គេ​ហៅថា “​ម៉ាស៊ីន​ដំណើរការ​ទិន្នន័យ​ដោយ​ស្វ័យប្រវត្តិ​” នៅក្នុង​សំណើ​របស់​រដ្ឋាភិបាល ដែល​នឹងធ្វើ​ឲ្យ Apple កាន់តែ​ពិបាក​៕ ​