ទីក្រុងហ្សាការតា៖ ផែនការផ្លាស់ប្តូររដ្ឋធានីថ្មី ពីទីក្រុងហ្សាការតា ទៅកាន់ទីកន្លែងថ្មីមួយទៀត របស់ប្រទេសឥណ្តូណេស៊ី ត្រូវបានប៉ាន់ប្រមាណថា ត្រូវការចំណាយកញ្ចប់ថវិកាជាតិអស់ ៣០.៩ទ្រីលានរូពី ស្មើនឹង ២.១ពាន់លានដុល្លារអាមេរិក ។
លោក Bambang Brodjonegoro រដ្ឋមន្ត្រីអភិវឌ្ឍន៍ផែនការឥណ្តូណេស៊ីបានឲ្យដឹងថា ផែនការប្តូររដ្ឋធានីនេះ មានរយៈពេល ០៥ឆ្នាំ ហើយត្រូវប្រើប្រាស់ថវិកាជាតិ ដើម្បីទ្រទ្រង់គម្រោងនេះទាំងស្រុង។
គួររំម្លឹកផងដែរថា មានកត្តាជាច្រើនដែល ប្រទេសឥណ្តូណេស៊ី ត្រូវធ្វើការផ្លាស់ប្តូររាជធានីរបស់ខ្លួន និងជាកិច្ចការចំបាច់បំផុតមួយ ពីព្រោះកត្តាមួយក្នុងចំណោមនោះ គឺអ្នកស្រាវជ្រាវបានរកឃើញថា នៅត្រឹមឆ្នាំ ២០៥០ គឺក្នុងរយៈពេល ៣០ ឆ្នាំទៀតប៉ុណ្ណោះ ទីក្រុងហ្សាការតា មួយភាគធំអាចស្ថិតនៅក្រោមទឹកទាំងស្រុងតែម្ដង។ ហេតុដូច្នោះហើយបានជា កាលពីខែមេសាកន្លងទៅនេះ ប្រធានាធិបតីឥណ្ឌូណេស៊ីលោក ចូកូ វីដូដូ បានប្រកាសអំពីផែនការផ្លាស់ប្តូររដ្ឋធានីថ្មី ពីទីក្រុងហ្សាការតា ទៅកាន់ទីកន្លែងថ្មីមួយទៀត ដែលអាចស្ថិតនៅក្នុងខេត្ត Kalimantan ភាគខាងលិច ឬកណ្តាល ដែលមានទំហំយ៉ាងហោចណាស់ ៤០,០០០ហិកតា៕
