ស្ថានីយ​រថភ្លើង​ភ្នំពេញ នឹងត្រូវ​ជួសជុល​កែប្រែ​ទៅជា អគារ​ពាណិជ្ជកម្ម Royal Train Square

652

ភ្នំពេញ​៖ ស្ថានីយ​រថភ្លើង​ភ្នំពេញ នឹងត្រូវ​អភិវឌ្ឍ ឲ្យ​ក្លាយទៅជា​អគារ​ពាណិជ្ជកម្ម​មានឈ្មោះ​ថា Royal Train Square ដោយ​ក្នុងនោះ​រួមមាន​ហាង​ទំនើប​ផ្សេងៗ ហាង​កាហ្វេ ភោជនីយដ្ឋាន ធនាគារ ទូរ ATM ជាដើម ព្រមទាំង​ជា​កន្លែង​សម្រាប់​ជួល​ធ្វើជា​ការិយាល័យ​, សម្រាប់​រៀបចំ​ព្រឹត្តិការណ៍ និង​កម្មវិធី​ពិ​ណ៌​ផ្សេងៗ នៅក្នុង​រយៈពេល ​៣ ទៅ​៤​ខែ ​ខាងមុខ​នេះហើយ​។​

​គម្រោង​អភិវឌ្ឍ ស្ថានីយ​រថភ្លើង​ភ្នំពេញ នេះ ទទួលបាន​ការគាំទ្រ​ថវិកា ដោយ​ក្រុម​អ្នក​បណ្តាក់ទុន​មកពី​អាមេរិក និង​ដៃគូ​សហការ​មកពី​អឺរ៉ុប ក្នុង​​ទឹកប្រាក់​៥​លាន​ដុល្លារ។

Royal Train Square

​គម្រោង​អភិវឌ្ឍ​ ស្ថានីយ​រថភ្លើងភ្នំពេញ ទៅជា​អគារពាណិជ្ជកម្ម Royal Train Square មិន​ត្រឹមតែ​ផ្ដល់​ឲ្យ​អ្នកដំណើរ​ដោយ​រថភ្លើង​ទាំង​ទៅ​ទាំង​មក នូវ​បរិយាកាស​ថ្មី​នោះទេ គឺ​ថែមទាំង​ផ្តល់​ឲ្យ​ប្រជាពលរដ្ឋ​កម្ពុជា​ដែល​មិន​ធ្វើដំណើរ នូវ​កន្លែង​ថ្មី​មួយ​ដើម្បី​ជួបជុំគ្នា ញ៉ាំ​អាហារ​ពេល​ល្ងាច និង​សម្រាកលំហែរ ជាមួយ​ទិដ្ឋភាព​ជុំវិញខ្លួន​ដ៏​ស្រស់ស្អាត រួមជាមួយ​នឹង​ហាង​កាហ្វេ ភោជនីយដ្ឋាន និង​ហាង​ជាច្រើន​ទៀត​។​

​គួរ​រំ​ម្លឹ​ក​ផងដែរ​ថា ស្ថានីយ​រថភ្លើង​ភ្នំពេញ ត្រូវបាន​សាងសង់ឡើង​ដោយ​អាណានិគម​បារាំង ក្នុង​ឆ្នាំ​១៩៣២ កាលពី​ថ្មីៗ​នេះ ស្ថានីយ​រថភ្លើង​ភ្នំពេញ ទើបតែ​បាន​បំពេញ​ការសាងសង់​ខ្សែ​ផ្លូវដែក​របស់ខ្លួន ទៅកាន់​ខេត្តបាត់ដំបង​។​

ស្ថានីយ​រថភ្លើង​ក្រុងភ្នំពេញ

​ស្ថានីយ​រថភ្លើងភ្នំពេញ ត្រូវបាន​ជួសជុល​កែលម្អ​ឡើងវិញ កាលពី​ឆ្នាំ​២០១២ ហើយ​ក្នុង​រយៈពេល​៥​ឆ្នាំ​ចុង​ក្រោយនេះ ស្ថានីយ​រថភ្លើង​ភ្នំពេញ ក្រោម​ការគ្រប់គ្រង​រប​ស់​ក្រុមហ៊ុន Royal Railways បានដាក់​ឲ្យ​ដំណើរ​ជាធម្មតា​ឡើងវិញ នូវ​សេវា​ធ្វើដំណើរ​ដោយ​រថភ្លើង ទៅកាន់​ខេត្តកំពត ព្រះសីហនុ ពោធិ៍សាត់ និង​ប៉ោយប៉ែត ក៏ដូចជា​សេវា​ដឹកជញ្ជូន​ជា​ទៀងទាត់ ទៅកាន់​អាកាសយានដ្ឋាន​អន្តរជាតិ​ភ្នំពេញ​ផងដែរ​៕