សម្ដេច ហ៊ុន សែន​៖ មេខ្លោង​របស់​វា​នៅ​កន្លែង​ណា​? រឿង​គ្រឿងញៀន​នៅ​ក្លឹប​កម្សាន្ត Rock ដល់​ណា​ហើយ​?

2131

​ភ្នំពេញ​៖ សម្ដេច​តេ​ជោ ហ៊ុន សែន សង្ឃឹមថា ក្រសួងមហាផ្ទៃ នឹង​បន្ត​ចាត់វិធានការ​តាមផ្លូវ​ច្បាប់ ​ចំពោះ​ក្លឹប​កម្សាន្ត Rock ឲ្យ​បានម៉ឺងម៉ាត់​បំផុត ដើម្បី​កុំ​ឲ្យ​មាន​ការវិល​ត្រលប់​មកវិញ សម្រាប់​អា​កន្លែង​ចង្រៃ​មួយ​នោះ ខណៈដំណើរ​ការស្វែងរក ស៊ីជម្រៅ​រកមេ​ខ្លោង​នៅក្នុង​រឿងនេះ ហាក់ដូចជា​មិនទាន់​ត្រូវបាន​បញ្ចេញ បើទោះបីជា​ដឹងថា ម្ចាស់​ក្លឹប​កម្សាន្ត Rock នេះ​ជាន​ណាក៏ដោយ​។

​សម្ដេច ហ៊ុន សែន បានលើកឡើង​បែបនេះ ក្នុងឱកាស​ដែល​សម្តេច​អញ្ជើញ​ប្រគល់​សញ្ញាបត្រ​ជូន និស្សិត​សាកលវិទ្យាល័យ​ភូមិន្ទ​នីតិសាស្ត្រ និង​វិទ្យាសាស្ត្រ​សេដ្ឋកិច្ច (RULES) ជាង​៣​ពាន់​នាក់ ដែល​បានបញ្ចប់​ការសិក្សា​ដោយ​ជោគជ័យ នៅ​ព្រឹក​ថ្ងៃទី​១១ ខែមីនា ឆ្នាំ​២០១៩​នេះ​។​

សម្តេច បាន​មានប្រសាសន៍ថា​៖ “​សង្ឃឹមថា ក្រសួងមហាផ្ទៃ នឹង​បន្ត​ចាត់វិធានការ លើ​បញ្ហា​នេះ​បូក​ជាមួយ​ការ​ដំណើរការ​ក្តី​របស់​តុលាការ ត្រូវតែ​ម៉ឺងម៉ាត់ ជាមួយនឹង​ការមិន​វិលត្រឡប់ នៃ​អំពើ​ពាលា​អាវ៉ាសែ សម្រាប់​កន្លែង​មួយ​នេះ ដែល​ត្រូវដាក់​ទោសទណ្ឌ​ឱ្យបាន​ធ្ងន់ធ្ងរ ហើយ​ស្វែងរក​ឱ្យដល់​ទីជម្រៅ នូវ​មេខ្លោង​របស់​វា​នៅ​កន្លែង​ណា មិនមែន​រករឿង​កម្ម​ករ​តូចតាច​ទេ ប៉ុន្តែ​រឿង​វា​ជ្រៅ​ទៅ​ពីនេះ អញ្ចឹង​ត្រូវ​រកឱ្យឃើញ ព្រោះ​អ្វីដែល​មាននៅ​ក្នុង​ដៃ​រួចទៅហើយ គឺជា​មធ្យោបាយ​ដើម្បី​ឈានទៅរក​ការជីក​រឹសគល់ នៃ​អ្នក​ជួញ​គ្រឿង ក៏ដូចជា​អ្នក​ដែល​ពាក់ព័ន្ធ​ក្នុង​សំណុំរឿង​មួយ​នេះ​”​។​

​គួរ​រំ​ម្លឹ​ក​ផងដែរ​ថា កាលពី​ថ្ងៃទី​២៣ ខែកុម្ភៈ ឆ្នាំ ២០១៩ កម្លាំង​សមត្ថកិច្ច​នៃ​ស្នងការដ្ឋាន​នគរបាល​រាជធានី​ភ្នំពេញ បាន​បើក​ប្រតិបត្តិ​ការបង្ក្រាប​បទល្មើស​គ្រឿងញៀន​នៅ​មជ្ឈមណ្ឌល​កម្សាន្ត​រ៉ក់ មាន​ទីតាំង​ស្ថិតនៅតាម​បណ្ដោយ​មហាវិថី​ព្រះមុនីវង្ស សង្កាត់​ទន្លេបាសាក់ ខណ្ឌចំការមន រាជធានី​ភ្នំពេញ​ដោយបាន​ឃាត់ខ្លួន​ជនសង្ស័យ​ចំនួន ៣១១ នាក់ ដែល​ក្នុងនោះ​មាន​ជនជាតិ​ចិន ១៤​នាក់ ហើយ​ដកហូត​បាន​គ្រឿងញៀន​ជាង ៣៩ គីឡូក្រាម និង​សារធាតុ​ញៀន​ជា​ទឹក​៩​គីឡូ ២ ខាំ ជញ្ជីង​ថ្លឹង​គ្រឿងញៀន​១២ និង​កាំភ្លើងខ្លី ១​ដើម​។​

​ហើយ​នៅ​ថ្ងៃទី​២ ខែមីនា ឆ្នាំ​២០១៩ កន្លងទៅនេះ សមត្ថកិច្ច​បានសម្រេច​បញ្ជូន​ជនសង្ស័យ ចំនួន​១៧​រូប នៃ​ករណី​បង្ក្រាប​គ្រឿងញៀន ទ្រង់ទ្រាយ​ធំ​នៅ​មជ្ឈមណ្ឌល​កម្សាន្ត​រ៉ក់ (Rock) ទៅ​តុលាការ ក្រោយពី​ធ្វើ​កោសល្យវិច័យ​ទឹកនោម និង​បាន​ប្រមូល​វត្ថុតាង​គ្រប់គ្រាន់​។ ជនសង្ស័យ​ទាំង​ទាំង​១៧​នាក់​នោះ មាន​ស្ត្រី​ម្នាក់​ផង ភាគច្រើន​ជា​យុវជន និង​យុវតី មាន​អាយុ​ចាប់ពី ១៩ ដល់ ២១​ឆ្នាំ​៕ ​