ភ្នំពេញ៖ រាជរដ្ឋាភិបាលកម្ពុជា ដឹងយ៉ាងច្បាស់ថា មានមន្ត្រីច្រើនណាស់ ដែលបាន និងកំពុងប្រព្រឹត្តអំពើពុករលួយ តាមគ្រប់រូបភាព តូចស៊ីតាមតូច ធំស៊ីតាមធំ ស៊ីទាំងតូចស៊ីទាំងធំ ដែលជាឧបសគ្គដ៏ធំ សម្រាប់ការអភិវឌ្ឍជាតិ និងបំបាក់មុខមាត់របស់រាជរដ្ឋាភិបាល ដែលដឹកនាំដោយសម្តេចតេជោ ហ៊ុន សែន។
សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បាននឹងកំពុងប្រយុទ្ធប្រឆាំងយ៉ាងខ្លាំង ចំពោះការប្រព្រឹត្តអំពើពុករលួយនេះយ៉ាងម៉ឺងម៉ាត់ ដោយអនុវត្តន៍អភិក្រមទី៥ គឺ «វះកាត់» ចំពោះមន្ត្រីប្រព្រឹត្តអំពើពុករលួយទាំងនោះ។
ដើម្បីប្រយុទ្ធប្រឆាំងទៅនឹងអំពើពុករលួយ ឲ្យកាន់តែមានប្រសិទ្ធភាព និងម៉ឺងម៉ាត់ថែមទៀតនោះ ថ្មីៗនេះ សម្តេចតេជោ ហ៊ុន សែន បានសម្រេច ដាក់ចេញនូវគោលការណ៍ ឲ្យ អង្គភាពប្រឆាំងអំពើពុករលួយ ចុះទៅចាប់ត្រង់ៗ តែម្ដង ចំពោះមន្ត្រីរលួយស្អុយទាំងនោះ។
សម្តេចតេជោ ហ៊ុន សែន បានបញ្ជាក់ប្រាប់ថា៖ “ពីថ្ងៃនេះទៅ បញ្ជូនអង្គភាពប្រឆាំងអំពើពុករលួយ ចាប់ត្រង់ៗហ្មង ចាប់យកត្រង់ៗហ្មង មិនចាំបាច់មកតាមខ្សែទេ អាហ្នឹងបោកឆៅហ្មង”។
មន្ត្រីប្រព្រឹត្តអំពើពុករលួយ ប្រហែលជា មិនត្រឹមតែអស់ដំណែង ជាប់ពន្ធនាគារទេ ទ្រព្យសម្បត្តិ ដែលបានមកពីអំពើពុករលួយ ក៏ប្រហែលជាត្រូវដកហូតយកដែរ នេះបើតាមការបង្ហើបរបស់ សម្ដេចតេជោ ហ៊ុន សែន បានបញ្ជាក់យ៉ាងដូច្នេះថា៖ “អភិក្រមទី៥ ត្រូវបានអនុវត្តន៍ដោយគ្មានការលើកលែង។ បើមិនអ៊ីចឹងខូច បំផ្លាញជាតិ បំផ្លាញរដ្ឋបាលរបស់ ហ៊ុន សែន ហើយកុំត្រឹមតែដកតំណែង ទ្រព្យសម្បត្តិហ្អែងប៉ុន្មាន មើលអាហ្នឹងទៀត តាមវាឱ្យដល់”។
សូមរំម្លឹកផងដែរថា កាលពីថ្ងៃទី២៧ ខែកក្កដា ឆ្នាំ២០១៩កន្លងទៅនេះ អង្គភាពប្រឆាំងអំពើពុករលួយ ដឹកនាំផ្ទាល់ដោយលោកទេសរដ្ឋមន្ត្រី ឱម យ៉ិនទៀង ប្រធានអង្គភាពប្រឆាំងអំពើពុករលួយ បានចុះទៅចាប់ខ្លួនមន្ត្រីមន្ទីរសុរិយោដីខេត្តពោធិ៍សាត់៣រូប ពាក់ព័ន្ធនឹងការប្រព្រឹត្តអំពើពុករលួយ ទារលុយរហូតដល់ ១០ម៉ឺនដុល្លារសហរដ្ឋអាមេរិក ជាថ្នូរនឹងការអនុញ្ញាតឱ្យសាងសង់សំណង់រោងចក្រ។ មន្ត្រីទាំង៣រូបនោះ រួមមាន៖ ទី១. ឈ្មោះ លៀម ប៊ុនរឿន ប្រធានមន្ទីរសុរិយោដីខេត្តពោធិ៍សាត់, ទី២. ឈ្មោះ ជាង វុទ្ធី អនុប្រធានមន្ទីរទទួលការងារសំណង់ និងទី៣. ឈ្មោះ តែ ប៊ុនថេង មន្ត្រីសុរិយោដីខេត្តទទួលបន្ទុកច្រក។
មន្ត្រីទាំង៣រូប ត្រូវបានចាប់ខ្លួនបាន ដោយសារតែ មន្ត្រីអង្គភាពប្រឆាំងអំពើពុករលួយ បានបន្លំខ្លួនជាអ្នកវិនិយោគទៅចរចា ក្នុងការផ្តល់លុយជូនមន្ត្រីពុករលួយទាំង៣រូបនេះ ហើយនៅថ្ងៃប្រគល់លុយ គឺត្រូវចាប់ខ្លួនតែម្តង៕
