ភ្នំពេញ៖ ស្នាដៃសិល្បៈគំនូរដ៏អស្ចារ្យ ធ្លុះបញ្ជាំងពីសម្រស់បរិស្ថានធម្មជាតិ បែបព្រៃភ្នំ និងសត្វព្រៃ បង្កប់នូវអត្ថន័យការពារបរិស្ថាន និង ជីវចំរុះ របស់វិចិត្រករ ឈើន ចាន់នី នឹងត្រូវយកមកដាក់តាំងបង្ហាញ នៅ សណ្ឋាគារសូហ្វីតែល ភ្នំពេញភូគីត្រា ចាប់ពីខែសីហា រហូតដល់ខែតុលា ឆ្នាំ២០១៩ ខាងមុខនេះហើយ។
ស្នាដៃសិល្បៈគំនូរ ដែលលោក ឈើន ចាន់នី នឹងយកមកដាក់តាំងបង្ហាញ មានចំណងជើងថា “Out of Control” ឬជាភាសាខ្មែរមានន័យថា “មិនអាចគ្រប់គ្រងបាន” ដែលមានគោលបំណងឆ្លុះបញ្ចាំង ពីបញ្ហាប្រឈមមួយចំនួន ដែលជាហានិភ័យ ដល់ជីវិតសត្វស្លាបដោយសារការបំពុលបរិស្ថាន និងបញ្ហាក្នុងសង្គមកម្ពុជាសព្វថ្ងៃ ដែលបញ្ហារទាំងនោះ គឺមិនអាចគ្រប់គ្រងបាននៅឡើយ ដូចជាការសេពគ្រឿងស្រវឹង និង ផ្សែងបារីជាដើម។
វិចិត្រករ វ័យ៣១ឆ្នាំរូបនេះ មានក្ដីរំពឹងទុកចំពោះការដាក់តាំងបង្ហាញស្នាដៃរបស់ខ្លួនថា នេះគឺជាឱកាសមួយ ដែលអាចអប់រំមនុស្ស អោយបានយល់ដឹងពីបញ្ហារទាំងនេះ តាមរយៈផ្ទាំងគំនូររបស់លោក បើទោះជាផ្ទាំងគំនូរទាំងនេះ មិនអាចបញ្ឈប់ទង្វើអាក្រក់ទាំងអស់ក៏ដោយ យ៉ាងហោចណាស់ក៏បានខ្លះដែរ ក្នុងការចូលរួមនៅក្នុងសង្គម។
លោក ឈើន ចាន់នី បានឲ្យដឹងថា៖ “ជាកិត្តិយសដ៏ធំមួយរបស់ខ្ញុំ សម្រាប់វត្តមាននៃការដាក់បង្ហាញស្នាដៃគំនូរ នៅសណ្ឋាគារសូហ្វីតែលភ្នំពេញភូគីត្រា។ គំនូរ គឺជាប្រភពនៃសុភមង្គលរបស់ខ្ញុំ ហើយខ្ញុំតែងតែផ្តោតអារម្មណ៍ យកចិត្តទុកដាក់យ៉ាងខ្លាំង ដែលជំរុញឲ្យខ្ញុំអាចធ្វើកាងារនេះ កាន់តែប្រសើរទ្វេរដង។ ខ្ញុំសង្ឃឹមថា ពិព័រណ៍នេះនឹងជួយបង្កើនការយល់ដឹង ដល់សាធារណជនអំពីបញ្ហាសង្គម និងបរិស្ថាន របស់យើងទាំងមូល”។
លោក ឈើន ចាន់នី មានដើមកំណើតនៅខេត្តបាត់ដំបង ភាគពាយ័ព្យនៃប្រទេសកម្ពុជា ជាកូនច្បងនៅក្នុងគ្រួសារ ដែលមានឪពុកជា ទាហានជើងចាស់។ កុមារភាព របស់លោក ឈើន ចាន់នី គឺមិនស្រណុកសុខស្រួលដូចអ្នកដទៃនោះទេ ដោយសារជីវភាពក្នុងក្រុមគ្រួសារ បានតម្រូវឲ្យលោក ហែលឆ្លងការលំបាករហូតស្នាក់នៅក្រោមដើមឈើ និងតាមវត្តអារាមក៏មាន និងជាពិសេសត្រូវបង្ខំចិត្ត បោះបង់ចោលការសិក្សាត្រឹមថ្នាក់ទី៧ ព្រោះសាលារៀនស្ថិតនៅឆ្ងាយពីកន្លែងរស់នៅពេក។
លោក ឈើន ចាន់នី មានឧបនិស្ស័យខាងផ្នែកគំនូរតាំងពីតូច ដោយលោកបានគូររូបភាពផ្សេងៗ ដាក់ក្នុងសៀវភៅរៀន គូរលើដី និងគូរលើដើមឈើ ក៏មានដែរ។
ការចាប់សត្វស្លាបក្នុងព្រៃ ធ្វើជាការកម្សាន្តរបស់ខ្លួន ដោយមិនខ្វល់ពីអ្វីទាំងអស់ កាលពីកុមារភាព បានផ្ដល់នូវការបណ្ដុះគំនិត សម្រាប់លោក ឈើន ចាន់នី ក្នុងការបង្កើតនូវផ្ទាំងគំនូររបស់ខ្លួន ពីព្រោះនៅពេលនេះលោក បានយល់ដឹងពីសារៈប្រយោជន៍ របស់បរិស្ថាន ធនធានធម្មជាតិ ជាពិសេសទៅទៀតនោះ លោកចង់តបស្នងទៅនឹងអ្វី ដែលខ្លួនបានធ្វើខុសពីមុនមក ដោយព្យាយាមបង្ហាញពីស្ថានភាពសត្វព្រៃ និងចង់ឲ្យមនុស្សគ្រប់គ្នា នាំគ្នាស្រលាញ់សត្វទាំងអស់ តាមរយៈស្នាដៃគំនូររបស់ខ្លួន។
ដើម្បីផ្សារភ្ជាប់ជាមួយវត្ថុបំណងចម្បង របស់ សណ្ឋាគារសូហ្វីតែលភ្នំពេញភូគីត្រា “សិល្បៈគំនូរ និង ប្រពៃណី” តែងតែត្រូវបានទទួលការជ្រោមជ្រែង ក្នុងការដាក់បង្ហាញនៅក្នុងវិចិត្រសាលសិល្បៈ នៃសណ្ឋាគារលំដាប់ផ្កាយ ៥ មួយនេះ។
លោក Charles-Henri Chevet អ្នកចាត់ការទូទៅ នៃសណ្ឋាគារសូហ្វីតែលភ្នំពេញភូគីត្រា បានឲ្យដឹងថា៖ “ពួកយើងមានសេចក្តីសោមន្សយ៉ាងខ្លាំង ក្នុងការរៀបចំបង្កើតឲ្យមានការតាំងពិព័រណ៍ ទេពកោសល្យគំនូរជាថ្មីម្តងទៀត នៅក្នុងវិចិត្រសាលសិល្បៈរបស់យើង ដែលជាចំណែកមួយ ក្នុងការផ្សព្វផ្សាយសិល្បៈគំនូរ នៅទីក្រុងភ្នំពេញ។ ការតាំងពិព័រណ៍នេះគឺជាឱកាសដ៏ល្អមួយ សម្រាប់អ្នកចូលរួមទស្សនា ក្នុងការស្វែងយល់ពីអត្ថន័យនៃគំនូរនីមួយៗ ដែលឆ្លុះបង្ហាញពីគំនិត និង បរិស្ថានយើងរបស់ ដោយវិចិត្រករ ឈើន ចាន់នី”។
សាធារណជនទាំងអស់ អាចចូលរួមទស្សនា ដោយឥតគិតថ្លៃសម្រាប់ពិព័រណ៍ស្នាដៃសិល្បៈគំនូរជាច្រើន របស់លោក ឈើន ចាន់នី ដែលនឹងចាប់ផ្តើមចាប់ពីខែសីហា រហូតដល់ខែតុលា ឆ្នាំ២០១៩ នៅវិចិត្រសាលសិល្បៈ នៃសណ្ឋាគារសូហ្វីតែលភ្នំពេញភូគីត្រា៕
