ឆ្នាំ​២០១៩​នេះ សេដ្ឋកិច្ចកម្ពុជា នឹងមាន​កំណើន ៧.១ % តែ ឆ្នាំ​២០២០ នឹង​ធ្លាក់ចុះ ហេតុអ្វី​?

2054

​ភ្នំពេញ​៖ សេដ្ឋកិច្ច​របស់​ប្រទេស​កម្ពុជា នៅក្នុង​ឆ្នាំ​២០១៩​នេះ នឹងមាន​កំណើន ៧.១ ភាគរយ និង​មានការ​ធ្លាក់ចុះ នៅក្នុង​ឆ្នាំ​២០២០ ប្រសិនបើ​ប្រទេស​កម្ពុជា មិន​ធ្វើ​ពិពិធ​កម្ម​សេដ្ឋកិច្ច​លើ​គ្រប់​វិស័យ​, គ្មាន​កំណែទម្រង់​ជាក់លាក់ និង​ការអនុវត្ត​គ្មាន​ប្រសិទ្ធភាព​។​

​លោកស្រី ជា សិរី នាយិកា​បច្ចេកទេស​នៃ​ធនាគារជាតិ បាន​ឲ្យ​ដឹងថា ហេតុតែ​សេដ្ឋកិច្ច​របស់​ប្រទេស​កម្ពុជា នៅក្នុង​ឆ្នាំ​២០១៩​នេះ នឹងមាន​កំណើន ៧.១ ភាគរយ ក៏​ព្រោះតែ​មានការ​គាំទ្រ​ដោយ​វិស័យ​សំខាន់ៗ ដូចជា វិស័យ​ឧស្សាហកម្ម ១០,៥ ភាគរយ​, សេវាកម្ម ៦,៦ ភាគរយ ហើយ​គួបផ្សំ​នឹង​ការ​កើន​ល្បឿន​បន្តិច​នៃ​វិស័យ​កសិកម្ម ១,៤ ភាគរយ​។ ម្យ៉ាងវិញទៀត ជញ្ជីងទូទាត់​កម្ពុជា ត្រូវបាន​ប៉ាន់​ស្មានថា​មាន​ស្ថានភាព​ល្អប្រសើរ និង​បន្ត​អតិរេក ៥,៥ ភាគរយ​នៃ​ផលិតផល​ក្នុងស្រុក​សរុប (៧៤១ លាន​ដុល្លារ​អាមេរិក​)​។

​លោកស្រី ជា សិរី នាយិកា​បច្ចេកទេស​នៃ​ធនាគារជាតិ

​ប៉ុន្តែ​លោកស្រី ជា សិរី នាយិកា​បច្ចេកទេស​នៃ​ធនាគារជាតិ លើកឡើង​ផងដែរ​ថា សេដ្ឋកិច្ច​របស់​កម្ពុជា ពឹង​ផ្អែកលើ​វិស័យ​មួយចំនួន​តូច ដូចជា កសិកម្ម កាត់ដេរ សេវាកម្ម និង​សំណង់​ជាដើម​។ កម្ពុជា ងាយ​ប្រឈម​នឹង​ភាពផុយស្រួយ​ដល់​កំណើនសេដ្ឋកិច្ច ប្រសិនបើ​វិស័យ​ណាមួយ​ក្នុងចំណោម​នោះ ជួបប្រទះ​ហានិភ័យ​។ បើ​វិស័យ​កសិកម្ម ជួប​ហានិភ័យ ដោយសារ បម្រែបម្រួល​អាកាសធាតុ វា​នឹង​ប៉ះពាល់​ដល់​ជីវភាព​កសិករ​។ ចំណែក​វិស័យ​កាត់ដេរ បើ​មាន​ប្រែប្រួល​នៃ​តម្រូវការ នោះ​វា​នឹង​នាំ​ឲ្យ​ពលរដ្ឋ​កម្ពុជា​ប្រ​ឈប​នឹង​ភាព​គ្មាន​ការងារ​ធ្វើ​។​

កក្ដា​ដែល​នាំ​ឲ្យ សេដ្ឋកិច្ចកម្ពុជា នៅក្នុង​ឆ្នាំ​២០២០ នឹង​ធ្លាក់ចុះ គឺ​មកពី​កត្តា​ខាងក្នុង និង​កត្តា​ខាងក្រៅ នេះ​បើតាម​ការ​ឲ្យ​ដឹង​ពី​លោក វ​ង្សី វិស្សុត រដ្ឋលេខាធិការ​នៃ​ក្រសួង​សេដ្ឋកិច្ច កន្លងទៅនេះ​នៅក្នុង សិក្ខាសាលា​សភា​ដើម្បី​ឈ្វេងយល់​ពី​ការកសាង​ក្របខ័ណ្ឌ​គោលនយោបាយ​ម៉ាក្រូសេដ្ឋកិច្ច និង​គោលនយោបាយ ហិរញ្ញវត្ថុ​សាធារណៈ សម្រាប់​រៀបចំ​សេចក្តីព្រាង​ច្បាប់​ស្តីពី​ហិរញ្ញវត្ថុ​សម្រាប់​ការគ្រប់គ្រង​ឆ្នាំ​២០២០​។​

លោក វ​ង្សី វិស្សុត រដ្ឋលេខាធិការ​នៃ​ក្រសួង​សេដ្ឋកិច្ច

លោក វ​ង្សី វិស្សុត បានពន្យល់ប្រាប់ថា កត្តា​ខាង​ក្នុងនោះ គឺ​មកពី​កង្វះ​ការយកចិត្តទុកដាក់​កំណែទម្រង់​ឲ្យ​ដល់​កម្រិត ទើប​នាំ​ឲ្យ​កម្ពុជា​ប្រឈមមុខ​នឹង​បញ្ហា​ដក​ប្រព័ន្ធ​អនុគ្រោះ​ពន្ធ​។ ចំណែក​កត្តា​ខាងក្រៅ វិញ គឺ​មកពី​បញ្ហា​សង្គ្រាម​ពាណិជ្ជកម្ម​រវាង​ប្រទេស​មហាអំណាច និង​ការប្រកួតប្រជែង​ផលិតផល​ស្ដង់ដារ ​នៅក្នុង​ទីផ្សារ​ជាដើម​។​

​លោក វ​ង្សី វិស្សុត បាន​អះអាងថា ប្រសិនបើ​រដ្ឋាភិបាល​ធ្វើកំណែទម្រង់​ជាក់លាក់ និង​មាន​ប្រសិទ្ធភាព​រយៈពេល​វែង ដើម្បី​ឆ្លើយតប​ទៅនឹង​បញ្ហា​ប្រឈម​នានា ដែល​កម្ពុជា​នឹង​ជួបប្រទះ​នាពេលខាងមុខនេះ នោះ កម្ពុជា​អាច​រក្សា​កំណើនសេដ្ឋកិច្ច​បាន​ក្នុង​រង្វង ៦,៥ ភាគរយ នៅ​ឆ្នាំ​២០២០​ខាងមុខ ប៉ុន្តែ​បើ​ការអនុវត្ត​គ្មាន​ប្រសិទ្ធភាព​ទេ កំណើនសេដ្ឋកិច្ច​កម្ពុជា អាច​នឹង​ទាប​ជាង​នេះ​។​

​គួរ​រំ​ម្លឹ​ក​ផងដែរ​ថា ធនាគារអភិវឌ្ឍន៍អាស៊ី បានចេញ​របាយការណ៍​ព្យាករ​មួយ កាលពី​ខែមេសា​កន្លងមក​ថា សេដ្ឋកិច្ចកម្ពុជា នឹងមាន​កំណើន​ប្រមាណ ៧ ភាគរយ​ក្នុង​ឆ្នាំ ២០១៩​នេះ និង ៦,៨ ភាគរយ​នៅ​ឆ្នាំ​២០២០​។ ជាងនេះទៅទៀត ធនាគារអភិវឌ្ឍន៍អាស៊ី រកឃើញ​បញ្ហា​ប្រឈម​ជាច្រើន ដែល​ក្នុងនោះ បញ្ហា​ប្រឈម​ដែល​សំខាន​ជាងគេ ដែល​រាជ​រដ្ឋា​ភិ​កម្ពុជា​ត្រូវ​យកចិត្តទុកដាក់ គឺ​ដំណោះស្រាយ​បញ្ហា​គម្លាត​ជំនាញ ដែល​កើតឡើង​ដោយ​ភាពមិន​ស៊ីគ្នា រវាង​ជំនាញ​ដែល​ពឹង​លើ​កម្លាំង​ពលកម្ម និង​ជំនាញ​ដែល​និយោជក​ត្រូវការ​៕