ភ្នំពេញ៖ សម្ដេចតេជោ ហ៊ុន សែន បានប្រកាសត្រង់ៗថា សម្តេច ទើបតែសម្រេចផ្តល់ថវិកា ៤០លានដុល្លារបន្ថែម លើ២០០លានដុល្លារ កាលពីលើកមុន ដើម្បីទិញអាវុធពីចិន ដើម្បីពង្រឹងសមត្ថភាពកងទ័ពកម្ពុជា ព្រោះតែនៅពេលនេះ អាវុធមួយចំនួនរបស់កងទ័ពកម្ពុជា គឺចាស់ៗ ដែលត្រូវដូរចេញ។
ការលើកឡើងរបស់សម្ដេចតេជោ ហ៊ុន សែន ខាងលើនេះបានធ្វើឡើងកាលពីព្រឹកថ្ងៃទី២៩ ខែកក្កដា ឆ្នាំ២០១៩នេះ នៅក្នុងពិធីពិនិត្យការដ្ឋានសាងសង់ ពហុកីឡដ្ឋានជាតិ មរតកតេជោ នៅសង្កាត់ជ្រោយចង្វារ។
នាពេលនោះ សម្ដេចតេជោ ក៏បានប្រកាសច្រានចោលយ៉ាងដាច់អហង្ការចំពោះការចោទថាកម្ពុជា អនុញ្ញាតឲ្យចិន កសាងមូលដ្ឋានទ័ពនៅកម្ពុជា។
សម្ដេចតេជោ បានមានប្រសាសន៍ថា៖ “កម្ពុជា គ្មានភាពចំបាច់ដែលត្រូវចុះកិច្ចព្រមព្រៀងសម្ងាត់ជាមួយចិន ឲ្យចិន កសាងមូលដ្ឋានទ័ពនោះទេ។ តែខ្ញុំ នឹងទិញអាវុធពីចិន និយាយឲ្យត្រង់ៗអ៊ីចឹងតែម្តងទៅ”។
គួររំម្លឹកផងដែរថា កាលពីពេលថ្មីៗនេះ សារព័ត៌មាន The Wall Street Journalបានចុះផ្សាយព័ត៌មានក្លែងក្លាយ ខុសពីការពិតចំពោះប្រទេសកម្ពុជា ដោយសរសេរថា ៖ “ប្រទេសចិនបានចុះហត្ថលេខាលើកិច្ចព្រមព្រៀងជាសម្ងាត់មួយ ដើម្បីអនុញ្ញាតឲ្យកងទ័ពរបស់ខ្លួន ប្រើប្រាស់មូលដ្ឋានទ័ពជើងទឹកកម្ពុជា។ កិច្ចព្រមព្រៀងនោះគឺកម្ពុជាផ្តល់ឲ្យភាគីចិននូវសិទ្ធិផ្តាច់មុខ ធ្វើជាមូលដ្ឋានទាហានជើងទឹកចិនជាផ្នែកមួយនៅឈូងសមុទ្រខ្មែរ ហើយនៅជិតព្រលានយន្តហោះធំមួយ ដែលកសាងដោយចិននឹងអនុញ្ញាតឲ្យចិនប្រើជាមូលដ្ឋានយោធារយៈពេល៣០ឆ្នាំ ដាក់ទ័ព ដាក់គ្រឿងសព្វាវុធ កន្លែងចតជាដើម”៕
