កិច្ចប្រជុំ​កំពូល “​ត្រាំ​-​គីម​” លើក​ទី​ពីរ ត្រូវបាន​បរាជ័យ ដោយសារតែ ហេតុផល​នេះ​

443

ហាណូយ​៖ កិច្ចប្រជុំ​កំពូល “​ត្រាំ​-​គីម​” លើក​ទី​ពីរ ត្រូវបាន​បញ្ចប់​មុន​កាលកំណត់ កាលពី​ម្សិលមិញ យ៉ាង​តក់ក្រហល និង​ទាំង​ពុំមាន​កិច្ចព្រមព្រៀង​អ្វី​ទាំងអស់ ដែលជា​សញ្ញា​ប្រាប់ថា ភាគី​ទាំង​២ និយាយ​ពុំ​ត្រូវ​គ្នា ក្នុងការ​ដោះដូរ​ដើម្បី​ផលប្រយោជន៍ សម្រាប់​ប្រទេសជាតិ​របស់ខ្លួន​រៀងៗ​ខ្លួន​។​

​តើ​មូល​ហេតុអ្វី​បានជា​កិច្ចប្រជុំ​កំពូល “​ត្រាំ​-​គីម​” លើក​ទី​ពីរ បរាជ័យ​?

​ប្រធានាធិបតី​អាមេរិក​លោក ដូ​ណា​ល់ ត្រាំ ថ្លែង​ក្នុង​សន្និសីទ​សារព័ត៌មាន បន្ទាប់ពី​ជំនួប​កំពូល “​ត្រាំ​-​គីម​” ថា កូរ៉េខាងជើង បានទាមទារ​ឲ្យ​មាន​ការដក​ទណ្ឌកម្ម​ទាំងអស់​តែម្តង ជា​ថ្នូរ​នឹង​ការកម្ទេច​មូលដ្ឋាន​អភិវឌ្ឍន៍ អាវុធ​នុយក្លេអ៊ែរ​នៅក្នុង​តំបន់ យ៉ុង​ប្យុ​ន (Yongbyon)​។​

​ក៏ប៉ុន្តែ ក្នុង​សន្និសីទ​សារព័ត៌មាន​មួយ​នៅឯ​ទីក្រុង​ហាណូយ ប្រទេស​វៀតណាម បែ​ជា​រដ្ឋមន្ត្រីការបរទេស​កូរ៉េខាងជើង លោក រី យ៉ុង​ហូ (Ri Yong Ho) បានធ្វើការ​បកស្រាយ​ផ្ទុយទៅនឹង​អ្វី ដែល​ប្រធានាធិបតី​អាមេរិក​លោក ដូ​ណា​ល់ ត្រាំ បាន​ថ្លៃ​ង អំពី​ភាពបរាជ័យ​នៃ​កិច្ចប្រជុំ​កំពូល​លើក​ទី​ពីរ នេះ​ទៅវិញ​។​

​រដ្ឋមន្ត្រីការបរទេស​កូរ៉េខាងជើង លោក រី យ៉ុង​ហូ (Ri Yong Ho)

​លោក រី យ៉ុង​ហូ ត្រូវបាន​សារព័ត៌មាន​ចិន ស៊ីន​ហួរ ដកស្រង​សម្ដី នៅ​ព្រឹក​ថ្ងៃ​សុក្រ ទី​០១ ខែមីនា ឆ្នាំ​២០១៩ ថា​​ទីក្រុង​ព្យុងយ៉ាង​បានស្នើ​ឲ្យ​មាន​ដក​ទណ្ឌកម្ម​ចំនួន ០៥​ប៉ុណ្ណោះ ក្នុងចំណោម​ទណ្ឌកម្ម​ទាំង ១១ របស់​ក្រុមប្រឹក្សាសន្តិសុខ​នៃ​អង្គការសហប្រជាជាតិ ព្រោះ​ទណ្ឌកម្ម​ទាំង ០៥​នោះ គឺ​បាន​ប៉ះពាល់​ជាខ្លាំង​ដល់​ជីវភាព​រស់នៅ របស់​ប្រជាជន​កូរ៉េខាងជើង​។​

​លោក រី យ៉ុង​ហូ បាន​ប្រាប់​ទៅ​សារព័ត៌មាន​ចិន ស៊ីន​ហួរ ទៀតថា បើ​អាមេរិក​ព្រម​ទទួលយក​សំណើរ​នេះ កូរ៉េខាងជើង​នឹង​បំផ្លាញចោល​រាល់​មូលដ្ឋាន ផលិត​វត្ថុធាតុដើម​បង្កើត​អាវុធ​នុយក្លេអ៊ែរ​ក្នុង​តំបន់ Yongbyon នៅ​ចំពោះមុខ​ក្រុម​អ្នកជំនាញ​អាមេរិក​ចោល​ទាំងស្រុង និង​ជា​អចិន្ត្រៃយ៍​តែម្តង ហើយ​មិនតែប៉ុណ្ណោះ ទីក្រុង​ព្យុងយ៉ាង ក៏បាន​ត្រៀមលក្ខណៈ​រួចជាស្រេច ដើម្បី​សរសេរ​ជា​លាយលក្ខណ៍អក្សរ នូវ​ការផ្អាក​ជា​អចិន្ត្រៃយ៍ ចំពោះ​ការធ្វើ​តេស្ត​អាវុធ​នុយក្លេអ៊ែរ និង​មី​ស៊ី​ល​ផ្លោង​ឆ្លង​ទ្វីប របស់ខ្លួន​ថែមទៀត​ផង ប៉ុន្តែ​ទីក្រុង​វ៉ាស៊ីនតោន បាន​បោះចោល​ឱកាស​ទាំងនេះ ដែល​ប្រហែលជា​នឹង​គ្មាន​ថ្ងៃ ទទួលបាន​ម្តងទៀត​នោះឡើយ​។​

​លោក​បន្តថា គោលជំហរ​របស់​កូរ៉េខាងជើង​នឹងមិន​ប្រែប្រួល​ឡើយ បើទោះបីជា​សហរដ្ឋអាមេរិក បន្ត​ព្យាយាម​ស្វែងរក​កិច្ចចរចា​ទៅមុខទៀត​ក៏ដោយ ហើយ​ជាមួយគ្នានេះដែរ លោក គីម ប្រហែលជា​នឹង​លែងមាន​ឆន្ទៈ ចង់​បន្ត​កិច្ចចរចា​ក៏​ថា​បានដែរ​។​

​សូមជម្រាបថា លោក គីម ជុង​អ៊ុន កំពុងស្ថិត​នៅក្នុង​ប្រទេស​វៀតណាម ជួបពិភាក្សា​ជាមួយ​មេដឹកនាំ​វៀតណាម នៅ​ថ្ងៃ​សុក្រ​នេះ ហើយនឹង​ចេញដំណើរ​ត្រឡប់​ទៅ​ប្រទេស​ខ្លួន​វិញ​នៅ​ថ្ងៃ​សៅរ៍ តាម​រថភ្លើង​ពិសេស​របស់លោក​៕