ហុង​គ្រី ថា​នឹង​ប្រឹងប្រែង​ជួយ​ការពារ​ EBA មិន​ឲ្យ​បាត់បង់​

1616

​លោក អ៊ាង សុផល្លែត ជំនួយការ​ផ្ទាល់​របស់​សម្តេច​តេ​ជោ ហ៊ុន សែន បានឱ្យដឹងថា នៅក្នុង​ជំនួប​ពិភាក្សា​ការងារ​ជាមួយ​សម្តេច​តេ​ជោ ហ៊ុន សែន លោក​ប្រធានាធិបតី​ហុង​គ្រី​ ​បានអះអាងថា ​នឹង​ប្រឹងប្រែង​ជួយ​ការពារ​ ​ប្រព័ន្ធ​អនុគ្រោះ​ពន្ធ (EBA) មិន​ឲ្យ​បាត់បង់​ឡើយ។​

​លោក អ៊ាង សុផល្លែត បាន​ថ្លែងប្រាប់​អ្នកសារព័ត៌មាន​ថា​៖ «​ដើម្បី​ជំរុញ​ការអភិវឌ្ឍ​កម្ពុជា​រយៈពេល​វែង​ទាំង​សង្គម, ទាំង​ធនធានមនុស្ស​, ទាំង​សុខភាព​ប្រជាជន​យើង​ផង ហុង​គ្រី បានលើកឡើង​សាជាថ្មី​ទៀតថា ហុង​គ្រី នៅ​បន្ត​គាំទ្រ​កម្ពុជា និង​ស្នើសុំ​មិន​ឲ្យ​មានការ​ដកហូត EBA ពី​កម្ពុជា​»​។​

​ការប្រកាស​បង្ហាញ​ជំហរ​ជួយ​ការពារ EBA សម្រាប់​កម្ពុជា បាន​ធ្វើឡើង​ក្នុងពេល​លោក យ៉ា​ណូ​ស អា​ឌ័​រ ជួបពិភាក្សា​ការងារ​ជាមួយ​សម្តេច​តេ​ជោ ហ៊ុន សែន នាយករដ្ឋមន្ត្រី​កម្ពុជា​ ​នៅ​វិមាន​សន្តិភាព​នា​រសៀល​ថ្ងៃទី​២៨ ខែតុលា ឆ្នាំ​២០១៩​កន្លងទៅនេះ​។​

​ប្រធានាធិបតី​ហុង​គ្រី​ ​លោក យ៉ា​ណូ​ស អា​ឌ័​រ និង​ភរិយា​កំពុង​បំពេញ​ទស្សនកិច្ច​ជា​ផ្លូវការ​នៅ​កម្ពុជា​លើក​ទី ១ របស់លោក​ចាប់ពី​ថ្ងៃអាទិត្យ​ដល់​ថ្ងៃ​ពុធ​ ​តប​តាម​ការអញ្ជើញ​របស់​ព្រះមហាក្សត្រ​ព្រះបាទ​សម្ដេច ព្រះ​មរ​ម​នាថ នរោត្តម សីហមុនី​។ លោក​បាន​ជួប​សម្ដែង​ការគួរសម​ជាមួយ​ព្រះមហាក្សត្រ, ប្រធានរដ្ឋសភា សម្ដេច ហេង សំរិន, ប្រធានព្រឹទ្ធសភា សម្ដេច សាយ ឈុំ និង​នាយករដ្ឋមន្ត្រីកម្ពុជា សម្ដេច ហ៊ុន សែន​។​

​សម្តេច​តេ​ជោ ហ៊ុន សែន បាន​ថ្លែងអំណរគុណ​ដល់​លោក​ប្រធានាធិបតី​ហុង​គ្រី ដែល​បានផ្តល់​យុត្តិធម៌​សម្រាប់​កម្ពុជា និង​ជួយ​ការពារ​កម្ពុជា ដើម្បី​រក្សា​ប្រព័ន្ធ​អនុគ្រោះ​ពន្ធ​នេះ​។​

​សូមបញ្ជាក់ថា កាលពី​ខែកុម្ភៈ ឆ្នាំ​២០១៩ កន្លងទៅ សហភាព​អឺរ៉ុប បានប្រកាស​ចាប់ផ្តើម​ដំណើរការ​នីតិវិធី​ដែល​អាច​នាំឱ្យមាន​ការផ្អាក​ជា​បណ្តោះអាសន្ន នូវ​ប្រព័ន្ធ​អនុគ្រោះ​ពន្ធ Everything But Arms (EBA)​។ ប្រព័ន្ធ EBA អាច​នឹង​លុបចោល​ប្រសិនបើ​រកឃើញថា ប្រទេស​ទទួលផល​នេះ មិន​គោរព​សិ​ទិ្ធ​មនុស្ស និង​សិទ្ធិ​ការងារ​សំខាន់ៗ​។​

​កិច្ចព្រមព្រៀង​អនុគ្រោះ​ពន្ធ ឬ EBA (Everything But Arms) ជា​កិច្ចព្រមព្រៀង​ដែល​សហភាព​អឺរ៉ុប បានផ្តល់​ឱ្យ​កម្ពុជា និង ប្រទេស​អភិវឌ្ឍ​តិចតួច​ផ្សេងទៀត​នៅលើ​ពិភពលោក​នូវ​ឱកាស​នាំ​គ្រប់​ផលិតផល​ទាំងអស់ (​លើកលែងតែ​អាវុធ​) ចូលទៅក្នុង​ទីផ្សារ​រួម​តែមួយ​របស់​សហភាព​អឺរ៉ុប ដោយ​មិន​ជាប់​ពន្ធគយ និង​មិន​ជាប់​កូតា​។​

​ការផ្តួចផ្តើម​គំនិត​នេះ មិន​មានន័យថា សហភាព​អឺរ៉ុប​ចាប់ផ្តើម​ព្យួរ​ប្រព័ន្ធ​អនុគ្រោះ​ពន្ធ​ភ្លាមៗ ឬ​ជា​ស្វ័យប្រវត្តិ​នោះឡើយ គ្រាន់តែ​ជា​ពេលវេលា​ដែល​ចាប់ផ្តើម​បើក​នីតិវិធី​ពិគ្រោះ​យោបល់​ជា​ផ្លូវការ​តែប៉ុណ្ណោះ​។ កម្ពុ​ជាមាន​រយៈពេល​៦​ខែ​ក្នុង​ការជជែក​តវ៉ា និង​លើក​ហេតុផល​ផ្សេងៗ​ពន្យល់​ទៅ​គណៈកម្មការ​អឺរ៉ុប​។​

​ប្រសិនបើ​គណៈកម្មការ​អឺរ៉ុប​មិន​ទទួលយក​ការពន្យល់​របស់​កម្ពុជា ហើយ​នៅតែ​សម្រេច​ព្យួរ​ប្រព័ន្ធ​អនុគ្រោះ​ពន្ធ​នេះ​មែន គឺ​ត្រូវ​ប្រើ​រយៈពេល​ចំនួន ១៨​ខែ គិត​ចាប់​ពីថ្ងៃ​ចាប់ផ្តើម (១២ កុម្ភៈ ២០១៩) រហូតដល់​ការចូល​ជា​ធរមាន​។​​ ​ពោល​ទំនិញ​របស់​កម្ពុជា​នៅតែ​បន្ត​នាំចូល​ទៅកាន់​សហភាព​អឺរ៉ុប​ដោយ​មិន​ជាប់ពន្ធ​រយៈពេល​ជាង ១​ឆ្នាំ​ទៀត មុននឹង​មានការ​សម្រេច​ជាថ្មី​។​

​រាជរដ្ឋាភិបាល​កម្ពុជា ធ្លាប់បាន​ប្រកាស​ដោយ​ចាត់ទុកថា ការសម្រេចចិត្ត​អឺរ៉ុប​នេះ ជា​រឿង​ភាពអយុត្តិធម៌​បំផុត ព្រោះនេះ​បង្ហាញ​ឲ្យ​ឃើញថា សហភាព​អ៊ឺរ៉ុប​បាន​បដិសេធ​ដោយ​ចំហរ អំពី​វឌ្ឍនភាព​គួរ​ឲ្យ​កត់សម្គាល់​ដែល​ប្រទេស​កម្ពុជា​សម្រេចបាន​។​

​ទោះជា​យ៉ាងណា រាជរដ្ឋាភិបាល​កម្ពុជា ក៏បាន​ត្រៀមខ្លួន​រួចជាស្រេច ព្រមទាំង​ដាក់ចេញ​នូវ​យន្តការ​ផ្សេងៗ​ទៀត ដើម្បី​ឆ្លើយតប​នឹង​ការដក​ប្រព័ន្ធ​អនុគ្រោះ​ពន្ធ EBA ផងដែរ​៕​