ដូ​ណា​ល់ ត្រាំ (Donald Trump) ប្រាប់​ចិន​ថា កិច្ចព្រមព្រៀង​ពាណិជ្ជកម្ម នឹង​កានតែ​អាក្រក់ បើ​លោក​ជាប់ឆ្នោត​នៅ អណ​ត្តិ​ទី​២

964

​រដ្ឋធានី​វ៉ាស៊ីនតោន​៖ លោក​ប្រធានាធិបតីអាមេរិក ដូ​ណា​ល់ ត្រាំ (Donald Trump) បាន​ប្រាប់​ឲ្យ​ប្រទេស​ចិន ធ្វើការ​សម្រេចចិត្ត ចំពោះ​កិច្ចព្រមព្រៀង​ពាណិជ្ជកម្ម ឲ្យ​បាន​ឆាប់ បើ​មិន​ដូច្នោះ​ទេ កិច្ចព្រមព្រៀង​ពាណិជ្ជកម្ម នេះ​នឹង​កានតែ​អាក្រក់​ឡើង​ចំពោះ​ប្រទេស​ចិន បើ​លោក​ជាប់ឆ្នោត​នៅ​អណ​ត្តិ​ទី​២​។​

សហរដ្ឋអាមេរិក និង​ប្រទេស​ចិន មាន​ជម្លោះ​ពាណិជ្ជកម្ម ដោយ​ការដាក់​ពន្ធ​លើ​គ្នា​ទៅវិញទៅមក និង​បង្ក​ឲ្យ​មានការ​ព្រួយបារម្ភ​ថា វា​អាច​ប៉ះពាល់​ដល់​សេដ្ឋកិច្ចពិភពលោក​ថែម​ទៀតផង​។ អ្នកចរចា​ថ្នាក់ខ្ពស់​របស់​ប្រទេស​ចិន​បាន​និយាយថា ភាគី​ទាំងពីរ​នឹង​ជួបគ្នា​សាជាថ្មី ក្នុងប្រទេស​ចិន ប៉ុន្តែ​ព្រមាន​ថា​ប្រទេស​ចិន នឹងមិន​ធ្វើការ​លះបង់​លើ​បញ្ហា​ទាក់ទិន​នឹង​គោលការណ៍​សំខាន់ៗ​នោះទេ ។​

ដូ​ណា​ល់ ត្រាំ (Donald Trump)​ និង ស៊ី  ជិងភីង

​លោក ដូ​ណា​ល់ ត្រាំ បាន​បង្ហោះ​សារ​នៅលើ​បណ្តាញ​សង្គម Twitter កាលពី​ថ្ងៃ​សៅរ៍​ថា “​ខ្ញុំ​គិតថា​ប្រទេស​ចិន​គិតថា ពួកគេ​ទទួលរង​ការវាយប្រហារ​យ៉ាងខ្លាំង ក្នុង​ការចរចា​កាលពីពេល​ថ្មីៗ​នេះ ហើយ​ពួកគេ​អាច​នឹង​ចង់​រងចាំ រហូតដល់​ការបោះឆ្នោត​ក្រោយ នៅ​ឆ្នាំ ២០២០ ដើម្បី​ផ្សងសំណាង និង​មើលឃើញ​គណបក្ស​ប្រជាធិបតេយ្យ​ឈ្នះ ដែល​អាច​អនុញ្ញាត​ឲ្យ​ពួកគេ បន្ត​កេង​ប្រ​វ័​ញ្ជ​ពី​សហរដ្ឋអាមេរិក ប្រមាណ ៥០០​ប៊ី​លាន​ដុល្លារ​ក្នុង​មួយឆ្នាំ​”​។​

​លោក ដូ​ណា​ល់ ត្រាំ បន្តថា “​ចិន​កំពុងតែ​ស្រមើស្រមៃ​ថា មនុស្ស​អសកម្ម​ដូចជា​លោក Joe Biden ឬមួយ​បុគ្គល​ដទៃ​ផ្សេងទៀត នឹង​អាច​ជាប់ឆ្នោត​ជា​ប្រធានាធិបតី​អាមេរិក​ថ្មី​នៅ​ឆ្នាំ​២០២០ ព្រោះ​ពួកគេ​ចូលចិត្ត​ណាស់ រឿង​កេងចំណេញ​លើ​អាមេរិក​”​។​

ដូ​ណា​ល់ ត្រាំ (Donald Trump)​ និង ស៊ី  ជិងភីង

​គួរ​បញ្ជាក់ដែរថា ទីក្រុង​វ៉ាស៊ីនតោន និង​ទីក្រុង​ប៉េកាំង បាន​និង​កំពុងតែបន្ត​ព្យាយាម​ដោះស្រាយ បញ្ហា​ផ្នែក​ពាណិជ្ជកម្ម​រវាង​គ្នា ដែល​បានចាប់ផ្តើម​ឡើង​ដំបូង​ក្រោយ​កា​រស​ម្រេ​ចិត្ត​របស់លោក ដូ​ណា​ល់ ត្រាំ កាលពី​ខែមិថុនា ឆ្នាំ​២០១៨ ក្នុងការ​ដំឡើង​ពន្ធ​ដល់​ទៅ ២៥​ភាគរយ​លើ​ទំនិញ​របស់​ចិន​ទំហំ ៥០​ពាន់​លាន​ដុល្លារ ក្រោម​គោលដៅ​កែតម្រូវ​ឱនភាព​ពាណិជ្ជកម្ម​អាមេរិក​-​ចិន​។ ទោះបីជា​កិច្ចចរចា​ពាណិជ្ជកម្ម ជុំ​ចុងក្រោយ​កន្លងទៅនេះ​បានទទួល​បរាជ័យ ក៏​ដិត ប្រទេស​ចិន​តាមរយៈ​ក្រសួងការបរទេស បានប្រកាស​កាលពី​សប្តាហ៍​មុន​ថា ខ្លួន​នឹងមិន​ចុះចាញ់​នោះឡើយ បើទោះបីជា​ត្រូវ​រក​សម្ពាធ​ខ្លាំង​យ៉ាងណាក៏ដោយ​៕​