លោក លឺ ឡាយស្រេង​៖ “​អរគុណ​សម្ដេច​ណាស់​… លែង​និយាយ​ហើយ​… និយាយ​ហើយ​រត់ចោលស្រុក​”

44453

ភ្នំពេញ​៖ លោក លឺ ឡាយស្រេង បាន​បង្ហោះ​ឃ្លី​ប​មួយ​កាលពី​ម្សិលមិញ ជាការ​ឆ្លើយតប​ទៅ​សម្ដេច ហ៊ុន សែន វិញ​ថា លោក​រំភើបចិត្ត​ណាស់ ដែល​ត្រូវបាន​សម្ដេច​តេ​ជោ ហ៊ុន សែន ប្រកាស​ឲ្យ​ចូល​ស្រុក​វិញ ដោយ​មិន​ប្រកាន​ទោសពៃរ៍ ចំពោះ​រឿង​បរិហារកេរ្តិ៍ និង​ប្រមាថ​ព្រះមហាក្សត្រ​កន្លងមក​។​

​លោក លឺ ឡាយស្រេង បាន​បញ្ជាក់ថា លោក​ត្រូវ​ទៅពិនិត្យ​សុខភាព​ជាមុនសិន មុននឹង​លោក​ត្រលប់មក​ស្រុកកំណើត​វិញ នៅក្នុង​សបា្ដហ៍​នេះ តែ​លោក​ត្រូវ​ទៅ​ជួប​ជាមួយ​ពេទ្យ​សិន ព្រោះ​លោក​មាន​ជំងឺ​បេះដូង ស្ត្រូ​ក និង​ខួរក្បាល ដែល​ត្រូវ​ទៅ​ត្រួតពិនិត្យ ១​ខែម្ដង​។​

លោក លឺ ឡាយស្រេង និងសម្ដេចតេជោ ហ៊ុន សែន

​លោក លឺ ឡាយស្រេង ក៏បាន​ថ្លែង​សុំ​ខ​មាល​ទោស​ពី​ព្រះមហាក្សត្រ​ផងដែរ ដោយ​លោក​បាន​ពោលថា​៖ “​លែង​និយាយ​លែង​អី​ហើយ ព្រោះ​និយាយ​ទៅ វា​រត់ចោលស្រុក វា​ប៉ះពាល់​ដល់​កិត្តិនាម ព្រះនាម​ព្រះ​កូ​ណា​ម្ដងទៀត សុំ​ខមាទោស​សុំ​ព្រះរាជទាន​ទោស ដល់​ទូលព្រះបង្គំ​ដែល​ធ្លាប់​បម្រើ​តាំងពី​ព្រះរាជ​បិតា រហូតដល់​ព្រះអង្គ​សព្វថ្ងៃនេះ​ព្រោះ​ចង់បាន​ឲ្យ​ព្រះអង្គ​ចេញមក​ដោះស្រាយ​ឲ្យ​ចប់​ឆាប់ៗ​។​”

​គួរ​រំ​ម្លឹ​ក​ផងដែរ​ថា សម្ដេច​តេ​ជោ ហ៊ុន សែន បានប្រកាស​នៅក្នុង​ពិធី​ចែក​សញ្ញាបត្រ ដល់​និស្សិត​វិទ្យាស្ថាន​វ៉ាន់ដា ជាង ៣ ពាន់​នាក់ កាលពី​ថ្ងៃ​ចន្ទ​សបា្ដហ៍​នេះ​ថា​៖ “​អញ្ជើញ​មក​លោកតា គ្មាន​អាណា​គេ​ចាប់​ទេ​.. ឥឡូវ​បើក លឺ ឡាយស្រេង ចូល​ស្រុក​មក​។ តា​អើយ​តា ត្រឡប់មកវិញ​មក ហើយ​គ្រាន់តែ​សុំ​កុំ​ឡប់​តទៅទៀត​”​។​

​ការដែល​សម្ដេច ហ៊ុន សែន បានធ្វើការ​ប្រកាស​បែប​នេះ ក៏​ព្រោះតែ​សម្ដេច​បានទទួល​ដំណឹង​តាមរយៈ​ការ​បង្ហោះ នៅក្នុង​គណនី​ហ្វេ​ស​ប៊ុ​ករ​បស់ លោក លឺ ឡាយស្រេង កាលពី​ថ្ងៃ​ព្រហស្បតិ៍​សប្ដាហ៍​មុន​ថា​៖ “​គួរ​ឲ្យ​ស្រណោះ​ចាស់​ម្នាក់ ធ្វើ​ខុស​បន្តិចបន្តួច​រត់​មក​នៅ​ប្រទេស​គេ ហើយ​ប្រទេស​គេ​នេះ​មិន​ដូច​ប្រទេស​យើង នឹក​បងប្អូន​ណាស់ នឹក​ប្រទេសជាតិ​ណាស់​។ មិនដឹង​ជា​ថ្ងៃ​ណា​នឹង​បាន​ចូលទៅ​វិញ​ឬក៏​ចោល​ឆ្អឹង​នៅ​ស្រុក​គេ​ក៏​មិនដឹង ព្រោះ​ចេះតែមាន​ជំងឺ​មានអី​ផង​។ ខ្ញុំ​បាន​និយាយ​ច្រើនដង​ហើយ សុំ​ឲ្យ​សម្ដេចនាយក​អនុគ្រោះ​និយាយ​ខុសត្រូវ​អី ខុស​អី​តិចតួច​ហ្នឹង​ទុកជា​មោ​ឃៈ​ទៅ​។ អនុញ្ញាត​ឲ្យ​ខ្ញុំ​ទៅ​ស្រុក​វិញ​ទៅ​ពីព្រោះ​ខ្ញុំ​បាន​បម្រើ​ជាមួយ​សម្ដេច​ហ្នឹង ៣ អាណត្តិ​មកហើយ ខ្ញុំ​បាន​និយាយ​ច្រើនដង​ហើយ​រឿង​ហ្នឹង​។​”​​

លោក លឺ ឡាយស្រេង និងសម្ដេចតេជោ ហ៊ុន សែន

លោក លឺ ឡាយស្រេង បាន​ជាប់​បណ្ដឹង​ចំនួន ៣ នៅ​ឆ្នាំ ២០១៧ ក្រោយពេល​លោក​សន្ទនា​ឯកជន​ជាមួយ លោកស្រី គី លំអង ដែល​បន្ទាប់មក​សារ​សន្ទនា​នោះ ត្រូវបាន​បែកធ្លាយ ពី​ការដែល​លោក ប្រមាថ​ដល់​អង្គ​ព្រះមហាក្សត្រ​។​

លោក លឺ ឡាយស្រេង ក៏ត្រូវ​បាន​ប្ដឹង​ដោយ​សម្ដេច​តេ​ជោ ហ៊ុន សែន តាមរយៈ​មេធាវី​តំណាង ក្នុងករណី​ដែលថា​សម្ដេច​តេ​ជោ បាន​សូកប៉ាន់​ឲ្យ​គណបក្ស​ហ្វ៊ុនស៊ិនប៉ិច ទទួលយក​កៅអី​ទំនេរ ក្រោយពី​គណបក្ស​សង្គ្រោះ​ជាតិ ត្រូវបាន​រំលាយ​។​ បន្ថែមពីលើនេះ ​លោក ក៏ត្រូវ​បាន​គណបក្ស​ហ្វ៊ុនស៊ិនប៉ិច ប្ដឹង​ចោទប្រកាន់​ពីបទ​បរិហារកេរ្តិ៍​ផងដែរ ដោយសារតែ​លោក​លើកឡើងថា អ្នក​ដែល​ទទួល​កៅអី ជា​តំណែង​តំណាងរាស្ត្រ ពី​គណបក្ស​សង្គ្រោះ​ជាតិ ត្រូវ​ផ្ដល់ប្រាក់ ២ ម៉ឺន​ដុល្លារ​ម្នាក់ ទៅ​មេដឹកនាំ​គណបក្ស​ហ្វ៊ុនស៊ិនប៉ិច​។​

កាលពីដើម​ឆ្នាំមុន លោក លឺ ឡាយស្រេង ត្រូវបាន​សាលាដំបូង​រាជធានី​ភ្នំពេញ កាត់ក្ដី​ឲ្យ​ចាញ់​បណ្ដឹង​របស់​សម្ដេច ហ៊ុន សែន ដោយ​ផ្ដន្ទាទោស​ឲ្យ​សងជំងឺចិត្ត ៥០០ លាន​រៀល​ដែល​ស្មើនឹង​ប្រមាណ ១២ ម៉ឺន ៥ ពាន់​ដុល្លារ​៕