សម្ដេច​ក្រឡាហោម ស ខេង បញ្ជា​ឲ្យ​លុបបំបាត់​ទីកន្លែង​កំសាន្ត មាន​គ្រឿងញៀន ឲ្យ​បាន​ក្នុង​ឆ្នាំ​២០១៩​នេះ​

820

ភ្នំពេញ​៖ ក្នុង​ពិធី​ប្រកាស​ចូលកាន់​តំណែង​អភិបាលខេត្ដ និង​អភិបាលរង នៅ​ព្រឹក​ថ្ងៃទី​១០ ខែឧសភា ឆ្នាំ​២០១៩​នេះ សម្ដេច​ក្រឡាហោម ស ខេង ឧបនាយករដ្ឋមន្ដ្រី រដ្ឋមន្ដ្រី​ក្រសួងមហាផ្ទៃ បានដាក់​បញ្ជា​ឲ្យ​មន្ត្រី និង​កងកម្លាំង​ទាំងអស់ ត្រូវ​បង្ក្រាប និង​លុបបំបាត់​គ្រឿងញៀន នៅតាម​ទីកន្លែង​កម្សាន្ត និង ក្លិប ទាំងអស់​ឲ្យ​បាន​ក្នុង​ឆ្នាំ​២០១៩​នេះ​។​

​សម្ដេច​ក្រឡាហោម ស ខេង បាន​ប្រាប់ថា ទីកន្លែង​កម្សាន្ត និង ក្លិប ដែល​លួចលាក់​ជួញដូរ និង​ប្រើប្រាស់​គ្រឿងញៀន​នេះ គឺជា​កន្លែង​ដែល​បំពុល និង​ពង្វក់ស្មារតី​យុវជន​ឲ្យ​ដើរ​ផ្លូវខុស និង​បំផ្លាញ​អនាគត​របស់​ពួកគេ​។ ដូចនេះ​ទីកន្លែង​កម្សាន្ត និង ក្លឹប ទាំងនោះ​ត្រូវ បិទ ឬ​រឹបអូស ក្នុងករណី​សមត្ថកិច្ច​បង្ក្រាប​ម្ដង​ជា​ពីរដង​ហើយ នៅតែ​មិន​រាងចាល នៅ​លបលួច​លាក់​ប្រើប្រាស់ និង​ជួញដូរ​គ្រឿងញៀន​ទៀត​នោះ​។​

​គួរ​រំ​ម្លឹ​ក​ផងដែរ​ថា កន្លងមកនេះ​សមត្ថកិច្ច បាន​បង្ក្រាប​ក្លិប​កម្សាន្ត​រ៉ក និង​ក្លិប ម៉ៃ អា​មី ដោយបាន​ឃាត់ខ្លួន​មនុស្ស​រាប់រយ​នាក់ ពាក់ព័ន្ធ​នឹង​ករណី​ប្រើប្រាស់​គ្រឿងញៀន ជាមួយ​ការ​សារ​ទរ​យ៉ាងខ្លាំង​ពី​ប្រជាពលរដ្ឋ​ចំពោះ​ចំណាត់ការ​នេះ​។​​