សោកស្ដាយ​ចំពោះ អង្ករ​កម្ពុជា ដែល​បាន​អស់សិទ្ធិ​រួច​ពន្ធ​នាំចូល ទៅ​ទីផ្សារ​អឺរ៉ុប តែ​កម្ពុជា អាច​នឹង​ត្រូវធ្វើ​អ្វីមួយ​

1881

​ភ្នំពេញៈ អង្ករ​កម្ពុជា ពុំ​ទទួលបាន​ការលើកលែង​ពន្ធ​តទៅទៀត​ទេ សម្រាប់​ការនាំ​ចូលទៅក្នុង​ទីផ្សារ​អឺរ៉ុប ក្រោម​ហេតុផល​នៃ​ការស៊ើបអង្កេត​មួយ​បាន​បញ្ជាក់ថា ការកើនឡើង​យ៉ាងខ្លាំង​នៃ​ការ​នាំចូល​អង្ករ Indica ពី​កម្ពុជា និង​មី​យ៉ាន់​ម៉ា ទៅក្នុង​សហភាព​អឺរ៉ុប (EU) ដែល​បាន​បណ្ដាល​ឲ្យ​ខូចខាត​សេដ្ឋកិច្ច​ដល់​ប្រទេស​ផលិត​អង្ករ​អឺរ៉ុប​។​

​ទោះបីជា​យ៉ាងណាក៏ដោយ វា​ជា​រឿង​គួរ​ឲ្យ​សោកស្ដាយ​ណាស់ សម្រាប់​ប្រទេស​កម្ពុជា​ដ៏​កំសត់​មួយ​នេះ​។ ជុំវិញ​បញ្ហា​នេះ មាន​ទស្សនៈ​លើកឡើង​ផ្សេងៗ​គ្នា​មួយចំនួន ដូចខាងក្រោម​នេះ​៖

លោក ច័ន្ទ សុផល នាយក​មជ្ឈមណ្ឌល​សិក្សា​គោលនយោបាយ បាន​ប្រាប់​ទៅ​ភ្នំពេញ​ប៉ុស្តិ៍​ថា ការនាំចេញ​អង្ករ​ផ្កាម្លិះ​ពី​កម្ពុជា​ទៅកាន់​សហភាព​អឺរ៉ុប នឹងមិន​រង​ផលប៉ះពាល់​ខ្លាំង​ទេពី​ពន្ធ​ថ្មី​នេះ ប៉ុន្តែ អង្ករ​សនឹង​ប៉ះពាល់​ខ្លាំង តែ​កសិករ​អាច​ប្តូរ​ទៅ​ដាំ​ស្រូវ​ផ្កាម្លិះ ឬ​ដំណាំ​ផ្សេង​វិញ​បើ​អាច​ធ្វើបាន​។​

​លោក​មានប្រសាសន៍ថា​៖ «​ខ្ញុំ​គិតថា វា​នឹង​អាស្រ័យ​លើ​និរន្តរភាព​របស់​អង្ករ​កម្ពុជា នៅ​ហាង​លក់​អង្ករ​ក្នុង​ទីផ្សារ​អឺរ៉ុប​។ បើ​ពួកគេ​ចូលចិត្ត​អង្ករ​កម្ពុជា ផ្សារ​ទំនើប និង​អ្នកប្រើប្រាស់​នៅ​អឺរ៉ុប អាច​មិន​គិតពី​ការចំណាយ​ខ្ពស់​បន្តិច​នោះទេ​។ វា​គួរតែ​មិនមែនជា​ចំណែក​ធំ នៃ​ការចំណាយ​លើ​ការប្រើប្រាស់​របស់​ពួកគេ​ទេ​»​។​

«​រដ្ឋាភិបាល​គួរ​ពិចារណា​កាត់បន្ថយ​តម្លៃ​អគ្គិសនី និង​កម្រៃ​សេវា​កំពង់ផែ ដើម្បី​ជួយ​ឧស្សាហកម្ម​អង្ករ​របស់​យើង​ឲ្យ​នៅតែ ឬ​កាន់​តែមាន​ភាព​ប្រកួតប្រជែង ដែល​នឹង​ជួយ​»​។​

​ចំណែក​លោក ហ៊ុន ឡាក់ អនុប្រធាន​សហព័ន្ធ​ស្រូវ​អង្ករ​កម្ពុជា បាន​លើកឡើងថា ការសម្រេច​របស់​អឺរ៉ុប នឹង​ផ្តល់​ផលប៉ះពាល់​អវិជ្ជមាន​មួយចំនួន ដល់​ឧស្សាហកម្ម​អង្ករ​កម្ពុជា​។​

លោក​លើកឡើងថា​៖ «​កម្ពុជា​នៅតែ​ចាត់ទុកថា អឺរ៉ុប​គឺជា​ទីផ្សារ​សំខាន់​របស់ខ្លួន គ្រាន់តែ​ក្នុងករណី​ដែល​គេ​កំណត់​ឲ្យ​យើង​បង់ពន្ធ គឺ​យើង​ត្រូវតែ​រក​វិធី​ដោះស្រាយ​។ យើង​ក៏ត្រូវ​ពិនិត្យមើល​ទៅលើ​ថ្លៃដើម ដើម្បី​ឲ្យ​មាន​តុល្យភាព​នឹង​ការកំណត់​ឲ្យ​បង់ពន្ធ ដែលមាន​ដូចជា​ការបញ្ចុះ​ថ្លៃដើម ដើម្បី​នៅតែ​អាច​បន្ត​នាំ​ចេញទៅ​ទីផ្សារ​អឺរ៉ុប​បាន​»​។​

ទីផ្សារ​អង្ករ​របស់​កម្ពុជា អាចជា​ការពង្រីក​ការនាំចេញ​ទៅកាន់​ប្រទេស ចិន បន្ថែមទៀត​ព្រោះ ប្រទេស ចិន បានផ្តល់​កូតា​នាំចូល​អង្ករ​ពី​កម្ពុជា ៣០ ម៉ឺន​តោន ក្នុង ១​ឆ្នាំ​។ កាលពី​ឆ្នាំ ២០១៨ តែ​កម្ពុជា​បាន​នាំចេញ​បានត្រឹមតែ ១៧ ម៉ឺន​តោន​ប៉ុណ្ណោះ​។​

ឯខាង​អ្នករកស៊ី​នាំចេញ​អង្ករ លោក សុង សារ៉ន អគ្គនាយក​ក្រុមហ៊ុន AMRU Rice Cambodia បាន​ឲ្យ​ប្រាប់ថា ទីផ្សារ​សហភាព​អឺរ៉ុប នៅ​តែងតែ​សំខាន់​សម្រាប់​អង្ករ​កម្ពុជា ដូច្នេះ​ក្រុមហ៊ុននាំចេញ នឹង​ចាំបាច់​ត្រូវ​ស្វែងរក​ដំណោះស្រាយ ដើម្បី​រក្សា​លទ្ធភាព​នាំចេញ​ទៅកាន់​ទីផ្សារ​នេះ​។​

ក្នុងពេល​ជាមួយគ្នានេះ កម្ពុជា ចាំបាច់​ត្រូវ​លើកកម្ពស់​លទ្ធភាព​ប្រកួតប្រជែង និង​រិះរក​ទីផ្សារ​ថ្មីៗ ដើម្បី​បន្ថយ​ការពឹង​ផ្អែកលើ​ទីផ្សារ​តែមួយ​។

«​យើង​ត្រូវការ​ទីផ្សារ​អឺរ៉ុប ហើយ​យើង​មិនអាច​បាត់បង់​ទីផ្សារ​នេះ​ទេ​។ ដូច្នេះ យើង​នឹង​ស្វែងរក​វិធីសាស្ត្រ ដើម្បី​បន្ទាប​ការចំណាយ​ប្រតិបត្តិការ ដើម្បី​លើកកម្ពស់​ភាព​ប្រកួតប្រជែង​»៕